Aizaaya 33 - EBƆRƐ BE KAWƆL

Kekule n fin kechɛto be asheŋ

¹ Asheŋ maaŋ nyalɛ n sa an doŋana! B suge anyi be asɔ nseŋ naŋ debɔr anyi, ama esa kama maŋ naŋ suge bumo ere be asɔ ŋko debɔr bumo. Bumo be kasuge nɛ kedebɔr be jemanɛ beeŋ fo ekar nɛ beko malɛ e suge bumo be asɔ nseŋ debɔr bumo.

² Jande, Enyɛnpe Ebɔrɛ, wu anyi kuwɔr. Fo nɛ an ta anyi be tama n deŋi so. Baa kuŋ anyi karechɛ kama nsaa mɔlga anyi ashi etɔrɔ to.

³ Enyɛnpe Ebɔrɛ, nɛ fo baa kɔ a sa anyi, efuli pɔtɛana be basa beeŋ nu kena be asheŋ nseŋ shile.

⁴ Saŋɛ na so anyeeŋ mel abar so fanɛ elotɔr n fuu bumo be asɔ n shile.

⁵ Enyɛnpe Ebɔrɛ na e chɔ esa kikɛ nsaa ji kuwura kusɔ kama so. E beeŋ shin nɛ kashenteŋji nɛ asheŋ niŋiso be kebaawora e bɔlɔ Jerusalɛm to.

⁶ Mo nɛ anyee fute a yige so, ŋkpal e kaa bee mɔlga mbe basa jemanɛ kikɛ nsaa sa bumo kanyiasheŋ nɛ kashennyi damta so. Kebaaŋana Enyɛnpe Ebɔrɛ nsaa nu a sa mo nɛ baaŋ baa sha kewora ga a chɔ kusɔ kikɛ.

⁷ Benapo nɛ b kɔ kenyɛn bee kɔ a fin kechɛto ashi kadegboŋ na be agbembi so nna. Anyi be mbɔ daa tama kayurwushi nna, ama kushu nɛ b ta m ba epe.

⁸ Esa kikɛ daa maŋ naa yɔ enite to nɛ ekpaana na kikɛ dese fuloŋ. Basa maŋ naa wora a bɔlɔ kɔnɔkoŋwule be ŋkre so. Bumo alɛ maaŋ naa sa esa kama nɛ e bee bɛ mbe nnɔ naseso so bunyaŋ.

⁹ Nsawule kikɛ wɔl a dese jiga. Lebanɔn be kupo na wɔl ŋ gbaŋgbaŋ afantaŋ nɛ Sharɔn be ketaŋɛ lela na ki fanɛ keshishɛrsawule. Ndibi nɛ a wɔ Bashan nɛ kebee nɛ baa tre Kamɛl na so gbaŋgbaŋ amo be afantaŋ.

Enyɛnpe Ebɔrɛ na ka fiɛ mo doŋana so be asheŋ

¹⁰ Ndoŋ nna nɛ Enyɛnpe Ebɔrɛ na kaŋɛ efuli pɔtɛana na le: “Naniere meeŋ wora kusɔ ko ŋ ŋini ma eleŋgboŋ.

¹¹ Menyee kaa kre ŋkre fuloŋ nɛ kusɔ kama nɛ menyee wora bee to jiga. Ma kɔnɔ to be afu du fanɛ edɛ nɛ k beeŋ mur menyi nna.

¹² Menyeeŋ chɔɔ ŋ ki nsunɔ fanɛ afitiri wɔlso ka ji edɛ na.

¹³ Bekama nɛ b wɔ kufɔ ŋko n taga to, beeŋ nu kusɔ nɛ n wora nseŋ shuli so fanɛ ma eleŋgboŋ bee shuŋ kashenteŋto.”

¹⁴ Kufugboŋ beeŋ tɔr Jerusalɛm be basa lubi nɛ b maa ŋana Ebɔrɛ na so nɛ b baa chicha. B yɛ: “Ebɔrɛ be demuji du fanɛ edɛ nɛ k bee chɔ a maa duŋ nna. Anyi to be beko beeŋ tiŋ n luri edɛ ere to n lar nɛ anyi maaŋ wu a?”

¹⁵ Nɛ menyee kaŋɛ nsaa wora kusɔ nɛ k daga bre, menyeeŋ ji n lar Ebɔrɛ be demuji to. Amoso men sa maŋ ta eleŋ nɛ men kɔ na a puni betirpo. Menyi alɛ e sa maa sɔ brɔbu. Men sa maa tu basa nɛ baa kre basa be kamɔ ŋko a wora asheŋ alubi na a wora asheŋ.

¹⁶ Aloŋ e naaŋ shin nɛ men nya menyi be amu, nsaa du fanɛ basa nɛ b wɔ ebu lempo jeŋgreŋ nɛ k bee kuŋ basa na to. Menyi alɛ beeŋ naa nya a ji nsaa nuu yila yila so jemanɛ kikɛ.

Echefoso be kemaŋkura be asheŋ

¹⁷ Ade kikɛ be kaman, menyeeŋ naŋ wu ewura ko ka bee ji kuwura kemaŋkuraso ashi kasawule nɛ k dese n sɔ kaplɛkama a yɔ na so.

¹⁸ Saŋɛ na so nɛ men bishi menyi be amu le: “Nnɛ nɛ ekrachi nɛ b daa ta kufu a da anyi nsaa tintiŋ anyi nɛ anyee ka elampo damta na wɔ?”

¹⁹ Menyi alɛ maaŋ naaŋ wu befɔ nɛ baa wu bumo be amu a fɛ fanɛ b shi ga nsaa gbar ŋgbar nɛ menyi maa nu na kenishiso kikɛ.

²⁰ Men to anishi ŋ keni Zayɔn be kebee nɛ anyee ji anyi be nchɛgboŋ kumo so na. Menyeeŋ wu fanɛ Jerusalɛm la kakpa nɛ anyi beeŋ tiŋ n nya anyi be amu a wɔtɔ nna. K du fanɛ wajɛbu nɛ k yil a maa gbuŋgbuŋ nna. Kumo be ayir maa tia nɛ kumo be efɔlana malɛ gba maa tuge to kikɛ.

²¹ Enyɛnpe Ebɔrɛ na beeŋ lara mbe kemaŋkura ŋ ŋini anyi nɛ an chena m mata elɔr nɛ a wɔ nchiŋ nɛ mbombi nɛ e wɔ mpar na. Ama an doŋana be nchu so be ekuloŋgboŋ maaŋ nite nchuana na so.

²² Enyɛnpe Ebɔrɛ na e la anyi be demujipo nɛ esa nɛ e bee ji kuwura anyi so. Mo e la anyi be ewura nɛ e bee kuŋ anyi nɛ an nya anyi be amu a wɔtɔ.

²³ Ama asɔ nɛ efuli pɔtɛana ta n chɛ bumo be nchu so be ekuloŋgboŋ so na maŋ chɛ nɛnɛ a kɔ eleŋ; Ewajɛ nɛ b ta n chɛ ekuloŋgboŋ na so nɛ afu e baa ber amo a nite nchu so na maŋ parga to. Anyeeŋ suge bedoŋ be benapo be asɔ damta, hale nɛ ebobi gba e nya asɔ n sɔ bumo kutɔ.

²⁴ Enyɛnpe Ebɔrɛ na beeŋ ta menyi be alubi m paŋ menyi, nɛ esa kama nɛ e wɔ anyi be kasawule so maaŋ naŋ fubel ŋ kaŋɛ le: “Mee lɔ nna!”