Aizaaya 31 - EBƆRƐ BE KAWƆL

Ebɔrɛ ka beeŋ kuŋ Jerusalɛm be asheŋ

¹ Asheŋ maaŋ nyalɛ n sa bekama nɛ baa yɔ Ijipt be efuli so n ya kaa fin kechɛto na! Baa ta bumo be amu nna a deŋi Ijipt be benapo be egbaŋɛ nɛ egbaŋɛturko be keshi nɛ benapo lempo so. Ama b maa ta bumo be amu a deŋi Enyɛnpe, Israɛl be Ebɔrɛ cheembi na so ŋko a fin mbe kechɛto.

² Enyɛnpe Ebɔrɛ na malɛ nyi kusɔ nɛ e bee wora! Mo e naa sa ekpa nɛ jɛrbi bee ba. Kusɔ kama nɛ e kaŋɛ, kumo nɛ e bee wora. Mo e naa gberge basa lubi nɛ bumo be bekumpo kikɛ kusoe.

³ Ijiptebi na maŋ la Ebɔrɛ, edimɛdi e la bumo. Bumo be egbaŋɛ gba maŋ la kiyoyu to be asɔ nɛ a beeŋ baa wɔtɔ mbaanaayɔ. Enyɛnpe Ebɔrɛ baaŋ ŋini mbe eleŋgboŋ, efuli lempo bee mur nna nɛ efuli pɔso nɛ k bee chɛ to na e tɔr. Saŋɛ na so nɛ efuli anyɔ na kikɛ e mur.

⁴ Ade be kaman nɛ Enyɛnpe Ebɔrɛ na kaŋɛ ma le: “Awɔr kama nɛ mbolpɔkpapo beeŋ wora maaŋ tiŋ n funti buluŋ nɛ e yige kusɔbɔya nɛ e pɛ na. Aloŋ koŋwule na nɛ shɛŋ maaŋ tiŋ n shin nɛ ma Enyɛnpetale Ebɔrɛ na, e yige kebaakuŋ Zayɔn be kebee na.

⁵ Kananɛ kabuibi bee firgi a kulti kumo be kesha a kuŋ kumo be bibi na nɛ ma Enyɛnpetale Ebɔrɛ na beeŋ kɔ ŋ kuŋ Jerusalɛm.”

⁶ Kede be kaman nɛ Enyɛnpe Ebɔrɛ na naŋ kaŋɛ: “Menyi Israɛl be basa wora kulubi n da ma so nseŋ kini ma. Ama naniere, men bɛta m ba ma kutɔ!

⁷ Jemanɛ ko bee ba nɛ menyi kikɛ e ta agbir nɛ men ta shuwa nɛ gbiti n lɔŋɛ nseŋ bɔla amo so n wora alubi n da ma so na n lɛ.

⁸ Saŋɛ na so Asiriya be basa beeŋ mur kena to nɛ mannɛ dimɛdi be eleŋ e mur bumo. Baaŋ shile kena nɛ bumo doŋana e pɛ bumo be mbrantiɛfɔlbi ŋ ki anya.

⁹ Bumo be ewurgboŋ beeŋ lara keya n shile ŋkpal kufu so nɛ kufugboŋ e tɔr bumo be benapo be benimuana na so nɛ b shile ŋ ka bumo be kena to be etuuta n lɛ kaman.” Kusɔ nɛ Enyɛnpe Ebɔrɛ nɛ baa shuŋ mo Jerusalɛm to nɛ mbe edɛ bee chɔɔ esarga ndoŋ na kaŋɛ nna na.