Aizaaya 29 - EBƆRƐ BE KAWƆL

Jerusalɛm nɛ k la ewura Deevid be kadegboŋ na be asheŋ

¹ Asheŋ maaŋ nyalɛ n sa Jerusalɛm, kakpa nɛ ma bɔrɛsure na wɔ nɛ k la kadegboŋ nɛ Deevid daŋ chena kumo to na! Kumo to be basa beeŋ tiŋ a ji bumo be nchɛgboŋ kafɛ kafɛ kikɛ.

² Ama Ebɔrɛ beeŋ shin nɛ jɛrbi e ba kadegboŋ nɛ baa tre “Ebɔrɛ be bɔrɛsure” na so. Kagbenejija nɛ kushu beeŋ baa wɔ kadegboŋ na to nɛ k ki fanɛ bɔrɛsure nɛ ŋklaŋ gbiti kumo kikɛ na.

³ Ebɔrɛ beeŋ kre kena m ba kulti kadegboŋ na kikɛ n wɔtɔ ŋ kɔ kumo.

⁴ Jerusalɛm beeŋ ki fanɛ kebuniyoyu ka wɔ nchaŋ to a wora ania nɛ e malga fanɛ ebɔl ka fɛa nseŋ shi kasawule to a malga nɛ k maa nu to na.

⁵ Afu beeŋ ber befɔ kama nɛ baa kɔ fo, Jerusalɛm, na n yɔ fanɛ kalabɛr na, nɛ bumo be benapo nɛ bumo be asheŋ kɔ kufu na e firgi n choŋ fanɛ amimi na. Jemanɛ nɛ ekama maa tama fanɛ kusɔ ko beeŋ wora na

⁶ nɛ Enyɛnpetale Ebɔrɛ na beeŋ bɔla bɔrɛfugboŋ nɛ kebembeŋ so ŋ kɔ n suge menyi n yige. E beeŋ shin nɛ afugboŋ nɛ edɛ wuloŋwuloŋ e ba.

⁷ Kumo be kaman nɛ efuliana nɛ a bee kɔ Jerusalɛm nɛ k la Ebɔrɛ be bɔrɛsure be kadegboŋ na be benapo nɛ bumo be akɔsɔ kikɛ e foe basa be anishi so fanɛ esa ka ku edare kanyɛso nseŋ teŋ kumo so kachipurso na.

⁸ Efuliana nɛ a beeŋ gama abar so a kɔ Jerusalɛm na beeŋ baa du fanɛ esa nɛ akoŋ bee mɔ nɛ e ku edare fanɛ e kaa bee ji nseŋ yeŋi n tiŋi na nna. Ŋko achukoŋ ka bee mɔ esa nɛ e ku edare fanɛ e kaa bee nuu nchu nseŋ yeŋi n tiŋi nɛ mbe ebɔlto kraŋ wɔlto na nna.

Kegal kasokpele n lɛ be asheŋ

⁹ Asheŋ beeŋ chinchiŋ menyi anebiana na nseŋ mɔ menyi kɔnɔ! Menyeeŋ buu anishi so fanɛ etanpo a wɔtɔ! Menyeeŋ boo a jante nɛ menyi maŋ nuu nsa!

¹⁰ Enyɛnpe Ebɔrɛ na e shin nɛ menyi be anishi bee biri menyi nɛ edi bee la menyi na. Menyi anebiana na e daga fanɛ b baa wu asheŋ a kaŋɛ basa na, ama Ebɔrɛ buu menyi be anishi so nna nɛ men maŋ naa wu asheŋ a pin to.

¹¹ Kewuŋkaŋɛ be bɔrɛdare kikɛ be kifito beeŋ ŋana menyi so. K beeŋ baa du fanɛ kawɔl nɛ b ber so nna n ta n sa menyi. Men ta kumo n yɔ esa nɛ e nyi kakraŋ kutɔ fanɛ e kraŋ kumo n sa menyi gba, e beeŋ kaŋɛ fanɛ e maaŋ tiŋ ŋkpal k kaa ber so so.

¹² Menyi alɛ ta kumo n sa esa nɛ e maŋ nyi kakraŋ fanɛ e kraŋ kumo n sa menyi, e beeŋ kaŋɛ fanɛ e maŋ nyi kakraŋ.

¹³ Ade be kaman nɛ Enyɛnpe Ebɔrɛ na kaŋɛ le: “Nnɔ fuloŋ nɛ basa ere kɔ a shuŋ ma nɛ bumo be ŋgbene malɛ maŋ wɔ ma so. Edimɛdi be mbra nɛ edaŋkare nɛ b bii n wɔtɔ amu to nawule nɛ baa bɛ so a shuŋ Ebɔrɛ.

¹⁴ Amoso meeŋ wora asheŋ nɛ a beeŋ chinchiŋ bumo nseŋ chɔɔ bumo be ŋgbene to nɛ bumo be nnɔ e mɔ bumo. Bumo to be benyiashempo beeŋ ki bewulpo nɛ bumo be kashennyi e ki jiga.”

Echefoso be tama be asheŋ

¹⁵ Asheŋ maaŋ nyalɛ n sa bekama nɛ baa ta bumo be ŋkre a ŋana Enyɛnpe Ebɔrɛ na so na! Baa wora asheŋ ŋgbalanto nna a fɛ fanɛ esa kikɛ maaŋ wu bumo ŋko m pin kusɔ nɛ baa wora na.

¹⁶ Baa melgi kusɔ kama na nna a buu. Epɔrpo nɛ ebɔ nɛ e kɔ a pɔr na, emo e bɔ? Kusɔ nɛ esa lɔŋɛ beeŋ tiŋ ŋ kaŋɛ esa na fanɛ: “Manɛ fo e lɔŋɛ ma a?” Ŋko ŋ kaŋɛ mo fanɛ “Fo maŋ nyi kusɔ nɛ fee wora ere a?”

¹⁷ Aloŋ nɛ baa kaa kaŋɛ fanɛ k maaŋ chɛr, kupuŋ beeŋ ki kudɔsawule nɛ kudɔsawule malɛ e ki kupuŋ.

¹⁸ Kachɛ na kaŋ fo, ekpawu beeŋ nu b kaa bee kraŋ kawɔl awɔrso nɛ etanpo, nɛ b wɔ tentembiri to, e bugi anishi a wu.

¹⁹ Nɛ betirpo nɛ basa nɛ b du boeŋ e nya kagbenefuli nɛ Enyɛnpe, Israɛl be Ebɔrɛ cheembi na bee sa na.

²⁰ Basa nɛ baa mɛaŋ beko nsaa keni Ebɔrɛ jiga na be ekar nna na. Alubiworapo kikɛ beeŋ mur loŋ be kachɛ na.

²¹ Ebɔrɛ beeŋ mur bekama nɛ baa ku efɛ a jija beko be atre, nɛ bumo nɛ baa kuŋ belubiworapo ashi kasogberge to na. E beeŋ mur bekama nɛ baa ku efɛ demujikpa a shin nɛ basa nɛ baa ji kashenteŋ maa nya kashenteŋ na gba.

²² Amoso kusɔ nɛ Enyɛnpe, Israɛl be Ebɔrɛ nɛ e mɔlga bumo nananyɛn Eebraham dra dra na ashi etɔrɔ to na kaŋɛ nde: “Menyi ma basa maaŋ naŋ ji anishinyɔr kikɛ, nyɔmɔ malɛ maaŋ naŋ mɔ menyi.

²³ Men kaŋ wu mbia nɛ meeŋ sa menyi na pɔɛŋ nɛ menyeeŋ pin fanɛ ma e la Israɛl be Ebɔrɛ cheembi na. Saŋɛ na so menyeeŋ maŋkura ma nseŋ bunyaŋ ma.

²⁴ Kumo be kaman nɛ basa nɛ b maa pin asheŋ to na e fara a pin asheŋ to, nɛ bumo nɛ baa munto a bile asheŋ malɛ e sɔ ma keŋini kagbenefuliso.”