Aizaaya 28 - EBƆRƐ BE KAWƆL

Samɛria be kasogberge be asheŋ

¹ Asheŋ maaŋ nyalɛ n sa Israɛl be kuwurji na. Kadegboŋ nɛ baa tre Samɛria nɛ k dese ketaŋɛ nɛ k bee wora adɔjibi ga na be ekarso na wɔ asheŋ to pasaa. Kumo be bejuŋkparpoana la basa booso nsaa maŋ bumo be amu so, a sha kebaaji nsaa nuu nsa a boo ga. Baaŋ ki fanɛ atoto a wɔl m bolo nna.

² Enyɛnpe Ebɔrɛ na teŋ nya esa ko nɛ e kɔ eleŋ nɛ yuku nseŋ wora shiriya nɛ e kɔ bumo. E la esa nɛ e beeŋ ba fanɛ bɔrɛfugboŋ nɛ kumo nɛ bɔrɛchu wea abar to a ba nɛ k ba buu kasawule so na nna.

³ Bejuŋkparpo booso na be kusɔ nɛ baa puchi so beeŋ mur nɛ basa e baa chichi kumo a choŋ.

⁴ Bumo be kemaŋkura nɛ k bee terge na beeŋ foe fanɛ asɔrso nɛ a juŋkpar m bel kafɛ to, nɛ basa bee fuu amo a ji na.

⁵ Loŋ be kacha na, Enyɛnpetale Ebɔrɛ na beeŋ baa du fanɛ atoto be kuwurwuro lela n sa mbe basa nɛ baaŋ ji efute a wɔtɔ na; mannɛ fanɛ Samɛria nɛ k du fanɛ atoto nɛ a wɔl m bolo n chuge n tɔr na.

⁶ Enyɛnpe Ebɔrɛ na beeŋ sa demujipoana kashenteŋji be nfɛra nseŋ sa kadegboŋ na be mbuna kenipoana kenyɛn be kagbene nɛ b baa tiŋ a kuŋ kadegboŋ na.

Aizaaya nɛ Juda be anebi boosoana na be asheŋ

⁷ Anebiana nɛ bɔrɛmatapoana gba boo nna a jante. B nuu yabra nɛ nsa booso ga nna hale nɛ bumo be nfɛra mel to. Anebiana na kaa bee boo ga so, b maŋ naa pin ebɔrɛdare nɛ Ebɔrɛ sa bumo na to. Bɔrɛmatapoana na malɛ gba kaa bee boo ga so, b maŋ naa tiŋ a ji asheŋ nɛ basa bee ta a ba bumo kutɔ nɛnɛ.

⁸ B kwiɛ n sɔ mbɛ nɛ b chena so na kikɛ nna nɛ ndoŋ kikɛ bee dufɛ ekwiɛ.

⁹ A le nɛ b daa bile asheŋ a kaŋɛ a laŋɛ ma kaplɛa so: “Wanɛ nɛ kanyɛn ere bee fɛ fanɛ e bee ŋini asheŋ? Wanɛ e naa sha mbe kubɔya? K walɛ n sa mbibi nɛ b baŋ ku kenyipo nawule nna!

¹⁰ E bee wora ania nna nɛ e baa ŋini anyi nsibɛbi nɛ mmalgabi nɛ a maŋ kɔ afito.”

¹¹ Nɛ menyi maaŋ nu n sa ma, kumo ere Ebɔrɛ beeŋ shin nɛ befɔ nɛ baa gbar ŋgbar pɔtɛ e ŋini menyi asheŋ.

¹² E bee sha kesa menyi kikɛ ewushi nɛ kayurwushi nna, ama men kini kenu n sa mo.

¹³ Amoso nɛ Enyɛnpe Ebɔrɛ na bee sha keŋini menyi nsibɛbi nɛ mmalgabi nɛ menyi maaŋ pin to na. Kumo be kaman keya kama nɛ menyeeŋ tia, menyeeŋ fiti n tɔr n doro nɛ b naŋ pɛ menyi fanɛ anya.

Zayɔn be kebonfu to be kejembu na be asheŋ

¹⁴ To, menyi basa kpeŋso nɛ menyee ji kuwura basa ere so ashi Jerusalɛm to na e kaŋ asoe n nu kusɔ nɛ Enyɛnpe Ebɔrɛ na bee kaŋɛ.

¹⁵ Menyee ka kaŋɛ fanɛ menyi ere nɛ luwu wora kɔnɔ nna, nɛ menyi nɛ basa nɛ b wu n yɔ bubuni to be nnɔ wora kukoŋwule. Men yirda fanɛ jɛrbi kama nɛ k beeŋ ba maaŋ wora menyi shɛŋ ŋkpal efɛ nɛ kafule be kebaawɔtɔ nɛ men wɔtɔ na so.

¹⁶ To, kusɔ nɛ Enyɛnpetale Ebɔrɛ na bee kaŋɛ nde: “Mee tɔl gbaltɔlase nɛ k kɔ eleŋ a yil a maa gbuŋgbuŋ nna ashi Zayɔn to. Ma alɛ beeŋ ta kejembu nɛ bepɔrpo keni to n lara fanɛ kebonfu to be kejembu nɛ k kɔ eleŋ ga na nna n nase gbaltɔlase na, nɛ b sibɛ le n deŋi kumo so, ‘Yirda nɛ k yil to kpakpa kɔ kanyiti nna.’

¹⁷ Kewora asheŋ nɛ amo be ekpa so nɛ asheŋ niŋiso e naaŋ baa la efɔl nɛ meeŋ baa ta a kargaso a pɔr nɛ k baa niŋi. Bɔrɛjembubi nɛ bɔrɛchu beeŋ bɔlɔ m mur efɛsheŋ nɛ men ta a kuŋ menyi be amu na nseŋ sulɔ amo kikɛ n ya lɛ.”

¹⁸ Menyi nɛ luwu be kɔnɔ nɛ men wora na nɛ kananɛ menyi nɛ basa nɛ b wu n yɔ bubuni to be nnɔ wora kukoŋwule na beeŋ ba ekar. Kumo be kaman nɛ jɛrbi e ba menyi so fanɛ nchu ka bɔlɔ n sulɔ menyi n yɔ na.

¹⁹ Jɛrbi beeŋ gbelge menyi so kachipurso nɛ kapaso nɛ kanyɛso kikɛ nna fanɛ nchu ka bee bɔlɔ a ba na. Kubɔya popɔr kama malɛ nɛ k beeŋ shi Ebɔrɛ kutɔ m ba menyi kutɔ beeŋ ta kufugboŋ m pɛ menyi!

²⁰ Menyeeŋ baa du fanɛ esa nɛ b bɔ keŋasa ere a laŋɛ mbe kaplɛa so na nna. B yɛ, e wora ania nɛ e dese gedo shiimbi nɛ e maaŋ tiŋ n teŋi mbe aya to so nseŋ naŋ ta keta nɛ k maŋ wɔ mpar nɛ k tiŋ m buu mo kikɛ so m buu nna.

²¹ Kananɛ Enyɛnpe Ebɔrɛ na baŋ kɔ kenishipereso ashi kebee nɛ baa tre Perazim na so nɛ ketaŋɛ nɛ baa tre Gibiɔn na to na nɛ e beeŋ naŋ kɔ le be jemanɛ ere gba. Saŋɛ na so e beeŋ wora kusɔ nɛ e kre kewora na, nɛ k chinchiŋ menyi ŋkpal men ka maa tama kumo so.

²² Men sa maŋ kaa mushe kasokpele nɛ mee sa menyi ere! Nɛ men kaŋ wora loŋ, k beeŋ baa du kpakpa n sa menyi nɛ men nya n lar asheŋ to. N nu fanɛ Enyɛnpetale Ebɔrɛ na yili kumo nna fanɛ e beeŋ mur efuli na kikɛ.

Ebɔrɛ be kanyiasheŋ be asheŋ

²³ Men nu kusɔ mee malga ere nseŋ wɔtɔ lakal kusɔ nɛ mee kaŋɛ menyi ere to.

²⁴ Edɔpo kikɛ maŋ wɔtɔ a lɔŋɛ mbe kudɔ so jemanɛ kikɛ mbaanaayɔ.

²⁵ E baŋ lɔŋɛ so n dɔ n loge e bee ŋmenyaŋ epofantaŋ be aduuso nna. Kumo be kaman nɛ e duu aboyu nɛ ayu mbure so nseŋ duu aduuso pɔtɛ n wɔtɔ egbaŋ to.

²⁶ Edɔpo na nyi mbe kushuŋ nna ŋkpal manɛ so, Ebɔrɛ e ŋini mo kumo.

²⁷ E maa ta ndibi gbɛgbɛso a beri ayu a bɛa amo to. Ndibi nɛ a kukwe nseŋ daga nɛ e bee ta a beri amo.

²⁸ Mo alɛ maa beri ayu na nna hale nɛ a nia n luri eshishɛr to ŋko nɛ a bɛa to ŋ ki nyifu. E bee beri amo nna a lara bibi na ashi amimi na to.

²⁹ Kanyiasheŋ ere kikɛ shi Enyɛnpetale Ebɔrɛ na kutɔ nna. Ebɔrɛ bee kre ŋkre kanyiasheŋ so nna, nɛ amo alɛ bee wora a bɔlɔ so jemanɛ kikɛ!