Aizaaya 27 - EBƆRƐ BE KAWƆL

Israɛl be kumɔlga be asheŋ

¹ Kamɔnchɛ kaŋ fo, Enyɛnpe Ebɔrɛ na beeŋ ta mbe tokobi nɛ k kɔ eleŋ ga na ŋ gberge kusɔbɔya gbeyeso gboŋgboŋi nɛ k wɔ teku to nɛ baa tre kumo Liviatan na kusoe m mɔ kumo.

² Kachɛ na kaŋ fo, le nɛ Enyɛnpe Ebɔrɛ na beeŋ kaŋɛ a laŋɛ mbe ndibi sɔrso be kudɔ lela na be kaplɛa so:

³ “Mee keni kudɔ na so nna nsaa wurge kumo so nchu jemanɛ kikɛ. Ma alɛ naa kuŋ kumo kapa nɛ kanyɛ nna nɛ esa kikɛ e sa maŋ tiŋ n tɔrɔ kumo.

⁴ Kumo be kaman, m maŋ naŋ nya agbo n wɔtɔ ndibi sɔrso be kudɔ na. Nɛ fanɛ ewi be yiri yiri kɔr kumo to gba, meeŋ tia amo kikɛ n chɔɔ m mur cheche.

⁵ Ama nɛ ma basa bumo doŋana bee sha fanɛ m baa kuŋ bumo bre, b shin nɛ ma nɛ bumo e nya kayurwushi anyi be kefɛato.”

⁶ Kachako bee ba nɛ Israɛl be basa nɛ b la Jeekɔb be kaman to ebi na e mur achin fanɛ kedibi nɛ k purge nseŋ wora atoto na. Saŋɛ na so bumo be asɔrso beeŋ chase durnya be kaplɛkama.

⁷ Enyɛnpe Ebɔrɛ na maŋ naŋ gberge Israɛl be basa kusoe kenishipereso nseŋ mɔ bumo be basa fanɛ kananɛ e gberge bumo doŋana kusoe nseŋ mɔ bumo be basa na.

⁸ Kasogberge nɛ Enyɛnpe Ebɔrɛ na sa mbe basa e la fanɛ e shin nna nɛ bumo doŋana kɔ m pɔɔ bumo so nseŋ pɛ bumo n yɔ efuli pɔtɛ so n ya ki anya. Bumo bedoŋana na daa du fanɛ epeŋilarkpa be afu tushiso nna m ba ber bumo n yɔ kufɔ kufɔ.

⁹ Ekpa koŋwule so nɛ Israɛlebi beeŋ tiŋ m bɔla so n nya bumo be alubi nɛ kewora n jija be ketampaŋ. A daga fanɛ b bure nnyamase be agbirsure nɛ b pɔr a chɔɔ eduwu amo so na nseŋ tia kegbirche nɛ baa tre Ashira na be ndibi tenteŋ nɛ b yuu na kikɛ n lɛ.

¹⁰ Kadegboŋ nɛ k kɔ egbal kuŋso lempoana na e ki alambure fanɛ keshishɛrsawule nɛ ekama maŋ wɔ kumo to, a dese na. K ki ana be ejikpa nɛ kakpa nɛ baa dese a wushi nna.

¹¹ Kumo to be ndibi be ayabi bee wɔl nna a buri a tɔr nɛ beche bee kil amo a puga edɛ. Ŋkpal basa na ka maŋ pin asheŋ to na so, Ebɔrɛ nɛ e to bumo na maaŋ wu bumo kuwɔr ŋko n shu bumo so.

¹² Jemanɛ ko bee ba nɛ Enyɛnpe Ebɔrɛ na e yili Lɔrgboŋ nɛ baa tre Yufreetes na n ya fo Ijipt be egbaŋ to na ŋ gama mbe basa abar so fanɛ kananɛ baa beri ayu a chela to a deŋi abar so na.

¹³ Kachɛ na kaŋ fo, kabel beeŋ shu awɔrso n tre Israɛlebi nɛ b pɛ n yɔ kenyaya to ashi Asiriya nɛ Ijipt be efuliana so na. Baaŋ bɛta m ba kaa shuŋ Enyɛnpe Ebɔrɛ na mbe kebee cheembi na so ashi Jerusalɛm to.