Aizaaya 19 - EBƆRƐ BE KAWƆL

Ebɔrɛ ka beeŋ gberge Ijipt kusoe be asheŋ

¹ Kubɔya nɛ k wɔtɔ a laŋɛ Ijipt be efuli be kaplɛa so nde. Enyɛnpe Ebɔrɛ na bɔla kuwɔlpa so nna a ba Ijipt be efuli so manaŋ manaŋ. Kufu pɛ Ijipt be agbirana nna nɛ a bee chicha mbe anishito, nɛ kumo be basa malɛ be ŋgbene jija bumo ga nɛ b paŋ kenyɛn.

² Ndoŋ nna nɛ Enyɛnpe Ebɔrɛ na kaŋɛ le: “Meeŋ shin nɛ kelantokɔ e ku Ijipt be efuli so nɛ bekurgepo e kilgi a kɔ abar nɛ bechenashapo malɛ gba e baa kɔ abar. Kadegboŋ ko beeŋ kɔ kuko kena nɛ kuwurgboŋ ko e kɔ kuwurgboŋ nyɔsopo kena.

³ Ma alɛ beeŋ shin nɛ Ijiptebi be ŋkre e mel to nɛ bumo be ŋgbene e jija bumo nɛ b paŋ kenyɛn. Baaŋ ya fin kechɛto bumo be agbirana kutɔ nseŋ naaŋ yɔ belejipo kutɔ n ya bishi so a fin kenu kusɔ ko ashi bubuni kutɔ.

⁴ Ma alɛ kraa beeŋ shin nɛ ewura nɛ e maa wu kuwɔr nsaa kute a wɔtɔ basa ebesa to na e ji kuwura bumo so. Ma, Enyɛnpetale Ebɔrɛ na e kaŋɛ na.”

⁵ Lɔrgboŋ nɛ k wɔ Ijipt be efuli so nɛ baa tre kumo Nail na beeŋ wɔlto m baŋɛ to.

⁶ Mbombi nɛ a bee shile a luri lɔrgboŋ na to na be nchu beeŋ bɛ a dufɛ nɛ Ijipt be efuli so maaŋ naa kɔ nchu nuuso. Agasa nɛ afitiri tenteŋ nɛ a yil lɔrkar na kikɛ beeŋ bolo n wɔl.

⁷ Ndoŋ nna nɛ adɔsawule nɛ a dese m mata Nail be lɔrgboŋ na be asɔduuso kikɛ e wu nɛ afu e ber amo n ya lɛ nɛ kusɔduuso kikɛ maaŋ naa wɔ adɔsawule na so.

⁸ Bekama nɛ baa pɛ ekɔrɔtɔ Nail be lɔrgboŋ na to a nya kusɔ jiso na beeŋ shu kagbenejijaso, ŋkpal manɛ so, bumo be edariwa nɛ ashewu maaŋ naa kɔ tɔnɔ n sa bumo.

⁹ Bekama malɛ nɛ baa lue ewajɛ lela na beeŋ ki chaam a wɔtɔ, a maaŋ naa nyi kusɔ nɛ baaŋ wora,

¹⁰ nɛ kagbenejija e tɔr basa nɛ baa lue kɔrɛ nɛ basa nɛ baa shuŋ a sɔ kakɔka so.

¹¹ Ijipt be ewura be benimuana nɛ b wɔ kadegboŋ nɛ baa tre Zowan na la bewulpo nna nsaa sa mo kawuliso be kasotoji. Amoso nuso nɛ baaŋ naŋ tiŋ n wora ŋ kaŋɛ ewura na le: “An nyi asheŋ ga. An shi dra dra na be bewura to be kanaŋ to nna!”

¹² Ijipt be ewura, nnɛ nɛ fo asoetojipo nyiashempoana na wɔ? Ashere baaŋ tiŋ ŋ kaŋɛ fo nfɛra nɛ Enyɛnpetale Ebɔrɛ na kɔ a laŋɛ Ijipt be kaplɛa so.

¹³ Benimuana nɛ b wɔ Zowan nɛ Mɛmfis na la bewulpo nna. Bumo e daŋ daga fanɛ b juŋkpar efuli na, ama b sa basa kasotoji lubi nɛ k shin nɛ efuli na be basa foe ekpa.

¹⁴ Enyɛnpe Ebɔrɛ na e shin nɛ b sa kasotoji nɛ k wul Ijiptebi na to nɛ baa wora kusɔ kama a foe ekpa nsaa nite a jante fanɛ esa kaa nuu nsa m boo na.

¹⁵ Esa kikɛ ashi Ijipt be efuli so maaŋ tiŋ n wora shɛŋ n chɛ to, k maŋ tir ŋko esa na la damawura nna ŋko etirpo.

Ijiptebi ka beeŋ shuŋ Enyɛnpe Ebɔrɛ na be asheŋ

¹⁶ Jemanɛ ko bee ba nɛ Ijipt be basa e paŋ kenyɛn fanɛ beche na. B baŋ wu fanɛ Enyɛnpe Ebɔrɛ na bee sha kegberge bumo kusoe nɛ kufugboŋ e tɔr bumo so nɛ b baa chicha.

¹⁷ Baaŋ fara a ŋana Judaebi ga. Hale nɛ b baŋ nu ketre Juda na gba, kufu bee pɛ bumo nna nɛ b baa chicha ŋkpal kusɔ nɛ Enyɛnpe Ebɔrɛ na bee kre a laŋɛ Ijipt be kaplɛa so so.

¹⁸ Loŋ be jemanɛ na kaŋ fo basa beeŋ baa gbar Hibruw be ŋgbar ashi Ijipt be efuli so be ndegboŋ anu to. Basa na beeŋ baa bɔ ntaŋ ashi Enyɛnpetale Ebɔrɛ na be ketre to. Ndegboŋ na be kuko be ketre e naŋ baa la Epeŋi be Kadegboŋ.

¹⁹ Kumo be kaman nɛ basa na e pɔr bɔrɛsure n sa Enyɛnpe Ebɔrɛ na ashi Ijipt be kasawule so nseŋ naŋ yuu kanyiŋi be ajembu ashi Ijipt nɛ efuli pɔtɛana be egbaŋ to n sa mo.

²⁰ Ade kikɛ beeŋ baa nyiŋi Ijiptebi na fanɛ Enyɛnpetale Ebɔrɛ na wɔ bumo kutɔ. Nɛ b kaŋ luri asheŋ to nseŋ kule Enyɛnpe Ebɔrɛ na a fin kechɛto, e beeŋ shin nɛ esa ko e ba kɔ m mɔlga bumo ashi bumo doŋana be enɔ to.

²¹ Kede be kaman nɛ Enyɛnpe Ebɔrɛ na e lara mbe kumu ŋ ŋini Ijiptebi na, nɛ bumo alɛ e pin mo nsaa shuŋ mo. Baaŋ baa lara bumo be esarga nɛ ŋkɛ be yiri kikɛ a sa mo nsaa wora a bɔlɔ nnɔ nɛ b nase n sa mo so.

²² Enyɛnpe Ebɔrɛ na kaŋ gberge Ijiptebi na kusoe n loge, baaŋ bɛta m ba mo kutɔ. Kumo be kaman nɛ e nu bumo be kabɔrɛkule nseŋ shin nɛ Ijiptebi na e nya kechɛ.

²³ Nɛ loŋ be jemanɛ na kaŋ fo, kegbembi lela gboŋgboŋi beeŋ dese n shi Ijipt n ya fo Asiriya. Saŋɛ na so efuli anyɔ ere be basa beeŋ baa yɔ abar be efuliana na so a ba nsaa tu abar a shuŋ Ebɔrɛ.

²⁴ Israɛl beeŋ ti efuli anyɔ ere so, nɛ bumo nɛ Ijipt nɛ Asiriya e baa la nɛfa n sa durnya kikɛ.

²⁵ Ade kikɛ be kaman nɛ Enyɛnpetale Ebɔrɛ na e nɛfa bumo nseŋ kaŋɛ le: “Ijiptebi la ma basa nna. Ma e to Asiriyaebi nseŋ lara Israɛlebi fanɛ ŋ gbagba be basa.”