Aizaaya 10 - EBƆRƐ BE KAWƆL

¹ Asheŋ maaŋ nyalɛ n sa menyi! Menyee wora mbra nɛ a kɔ ŋkpɛato nna nsaa bɔla amoso a nyaŋ ma basa a wɔtɔ a tɔrɔ bumo.

² Kananɛ menyee wora a maa ji kashenteŋ a sa betirpo nɛ basa nɛ asheŋ tir bumo ashi menyi be demujikpaana nseŋ naa suge bekulpoche nɛ amunibi be asɔ nna na.

³ To, nɛ Ebɔrɛ bee gberge menyi kusoe, manɛ nɛ menyeeŋ wora? Nɛ e kaŋ shin nɛ efuli pɔtɛ ko so ebi shi kufɔ m ba nɛ b ba kɔ menyi kena m mur menyi, manɛ nɛ menyeeŋ wora? Nnɛ nɛ menyeeŋ shile n ya fin kechɛto ŋko nnɛ nɛ menyeeŋ ta menyi be mpetɛsɔ n ya ŋana?

⁴ Baaŋ mɔ menyi kena to ŋko ŋ gberge menyi n yɔ kenyaya to. Ama amo nɛ amo kikɛ, Enyɛnpe Ebɔrɛ na be agbo maaŋ wushi. E kraa beeŋ baa sha kegberge menyi kusoe n ti so.

Enyɛnpe Ebɔrɛ na ka bɔla Asiriya be ewurgboŋ na so n wora asheŋ

⁵ Ndoŋ nna nɛ Enyɛnpe Ebɔrɛ na kaŋɛ: “N ta Asiriya fanɛ kaprɛ nna nɛ ŋ gberge basa nɛ n nya agbo n wɔtɔ na kusoe.

⁶ N shuŋi Asiriyaebi nna fanɛ b ya kɔ efuli nɛ b kini ma n shin nɛ n nya agbo na kena. Ma e shuŋi bumo fanɛ b ya suge, nseŋ fuu bumo be asɔ eleŋso nsaa chichi bumo be basa so fanɛ agbembi so be depɔ na.”

⁷ Ama Asiriya be ewurgboŋ na malɛ daa kɔ mo gbagba be nfɛragboŋ mbe kumu to nna. E daa sha kemur efuli damtaana nna.

⁸ E daa puchi nna a kaŋɛ le: “Ma benapo be bejuŋkparpoana na be ekama la ewura nna!

⁹ Ma e kɔ m pɔɔ ndegboŋ nɛ baa tre Kalno nɛ Kaakɛmish nɛ Hamaf nɛ Apad so. Ma koŋwule na e kɔ m pɔɔ Samɛria nɛ Damaskɔs so.

^10-11 Agbirana nɛ a wɔ Jerusalɛm nɛ Samɛria be ndegboŋ to na maŋ shi n fo amo nɛ a wɔ efuli lempoana na to so. Ma alɛ beeŋ mur Jerusalɛm nɛ agbirana kama nɛ a wɔ kumo to na fanɛ kananɛ n wora Samɛria na.”

¹² Kumo be kaman nɛ Enyɛnpe Ebɔrɛ na kaŋɛ: “Ŋ kaŋ loge kusɔ nɛ mee wora kebee nɛ baa tre Zayɔn na so nɛ Jerusalɛm to, meeŋ gberge Asiriya be efuli so be ewurgboŋ kusoe ŋkpal mbe mpuchi nɛ kamoowu kikɛ so.”

¹³ Asiriya be ewurgboŋ bee puchi nna a kaŋɛ le: “Ŋ gbagba be eleŋ so nɛ n wora ade kikɛ. Ma alɛ kɔ eleŋ nsaa nyi asheŋ nsaa kɔ kenyi ga. N du fanɛ gbolu kpenso nɛ e bee tɛ a yuu basa so nna a suge efuliana na be nsawule nɛ mpetɛsɔ na eleŋ so.

¹⁴ Ma e kɔ m pɔɔ durnya kikɛ so na! Keshoŋi kabuibi be kesha to n lara afule gba du kpakpa a chɔ kekɔ kena m pɔɔ so. Efuliana na be kekama daa maŋ tiŋ ŋ kuŋ ma ekpa!”

¹⁵ Ama le nɛ Enyɛnpe Ebɔrɛ na kaŋɛ Asiriya be ewura na: “Kekpanfu ŋko kasaŋɛgboŋ beeŋ tiŋ ŋ kaŋɛ fanɛ kumo e chɔ esa nɛ e bee keta kumo a shuŋ na a? Dimɛdi e naa keta kaprɛ ŋko kaprɛ e naa keta dimɛdi?”

¹⁶ Enyɛnpetale Ebɔrɛ na beeŋ shin nɛ kulɔ lubi e tɔr fo nɛ fo benapo so nseŋ shin nɛ fo eyur e bel edɛ fanɛ k ka bee suse ashi fo kuwurpiŋi to na.

¹⁷ Ebɔrɛ cheembi nɛ e la Israɛl be kefulto na beeŋ kilgi fanɛ edɛ n shin nɛ fo suse so kachɛ koŋwule fanɛ kupuŋ wɔlso na.

¹⁸ Kumo be kaman nɛ menyi be apo nɛ adɔsawule lelaana kikɛ e mur cheche fanɛ kananɛ kulɔ mɔso bee mur esa na.

¹⁹ Ndibi nɛ a beeŋ ka na maaŋ naa shi. Kebibi gba beeŋ tiŋ ŋ karga amo.

Basa nɛ baaŋ bɛta m ba na be asheŋ

²⁰ Jemanɛ ko bee ba nɛ Israɛl nɛ Juda be basa nɛ baaŋ ji efute na maaŋ naŋ ta bumo be amu n deŋi efuli nɛ k daŋ ka gbrɛ nɛ k mur na so. Baaŋ ta bumo be amu n deŋi Enyɛnpe, Israɛl be Ebɔrɛ cheembi na so nna.

^21-22 Israɛlebi na daa shi nna ga fanɛ teku ase be eshishɛr, ama bumo to be gbrɛbi e naaŋ ji efute nseŋ bɛta m ba Israɛl be Ebɔrɛ lempo na kutɔ. Ŋkpal manɛ so, e daŋ yili kumo nna fanɛ e beeŋ mur bumo be efuli na, kumo be loŋ malɛ daga bumo nna.

²³ Kashenteŋto, Enyɛnpetale Ebɔrɛ na bɔ ntaŋ fanɛ e beeŋ gberge esa kama nɛ e wɔ efuli na so kusoe.

Enyɛnpe Ebɔrɛ na ka beeŋ gberge Asiriya kusoe be asheŋ

²⁴ Ade kikɛ be kaman nɛ Enyɛnpetale Ebɔrɛ na kaŋɛ mbe basa nɛ b wɔ Jerusalɛm to na le: “Asiriya be basa na beeŋ kɔrfɛ menyi fanɛ kananɛ Ijiptebi daŋ wora na. Ama men sa maa ŋana bumo.

²⁵ K maaŋ chɛr nɛ ma agbo e wushi nɛ ŋ gberge Asiriyaebi kusoe m mur bumo cheche ŋkpal bumo be asheŋ lubi so.

²⁶ Ma, Enyɛnpetale Ebɔrɛ na gbagba e naaŋ ta ma kuchuchɔ ŋ kuya bumo so, fanɛ kananɛ n daŋ wora Midian be efuli so ebi ashi kefalta nɛ k wɔ kakpa nɛ baa tre Ɔrɛb na. Ma alɛ beeŋ ŋini ma eleŋgboŋ nɛ n daŋ ŋini nseŋ shin nɛ ekpa dese Teku Peper na to ashi Ijipt be efuli so na.

²⁷ Jemanɛ na kaŋ fo meeŋ shin nɛ men suge menyi be amu ashi Asiriya be eleŋgboŋ to nɛ b maaŋ naa ji menyi so kuwura a tɔrɔ menyi. Asheŋ beeŋ naŋ nyalɛ n sa menyi.”

²⁸ Bedoŋ be benapo na daŋ ba kɔ n suge kade nɛ baa tre Ai na. B daŋ bɔla Migrɔn nna, nseŋ daŋ yige bumo be asɔ nɛ ajibi ashi kakpa nɛ baa tre Mikmash na,

²⁹ pɔɛŋ nseŋ dii ketaŋɛ na n ya dese Gɛba ŋklade! Kufugboŋ ko daŋ tɔr basa nɛ b wɔ kade nɛ baa tre Rama na so nna, nɛ basa nɛ b wɔ Gibiya, nɛ k la Ewura Sɔɔl be kade to na, shile ŋ ka kade na.

³⁰ Esa beeŋ tiŋ n nu basa ka bee shu awɔrso ashi nde nɛ baa tre Gallim nɛ Laisha nɛ Anatɔf nɛ kagbenejija tɔr so na to.

³¹ Basa nɛ b wɔ nde nɛ baa tre Madmɛna nɛ Gɛbiim na bee shile a mɔlga bumo be amu.

³² Kabre bedoŋ na wɔ kade nɛ baa tre Nɔb na to nna m bɔɔ enɔ a fiɛ to a teŋi a ŋini Zayɔn be kebee nɛ k wɔ Jerusalɛm na.

³³ Ama Enyɛnpetale Ebɔrɛ na beeŋ shin nɛ b ber ase fanɛ b ka ku kedibi be keyabi nɛ k tɔr to na. Bumo to be bumo nɛ baa puchi ga nsaa maŋ bumo be amu so na nɛ e beeŋ da n lɛ nɛ b ji nyɔmɔ.

³⁴ Enyɛnpe Ebɔrɛ na e naaŋ ku bumo n lɛ fanɛ kananɛ baa ta kekpanfu a ku ndibi ashi Lebanɔn be kupo to a lɛ na!