2 Samuɛl 4 - EBƆRƐ BE KAWƆL

B ka mɔ Ishboshɛf be asheŋ

¹ Sɔɔl pibinyɛn Ishboshɛf ka nu fanɛ b mɔ Abna ashi Hibrɔn, nɛ mbe aba pɔ mo nɛ keyeŋiyeŋi tɔr Israɛlebi na malɛ gba so.

² Ishboshɛf daŋ ta Baana nɛ Reekab nɛ bumo tuto e la Rimmɔn na nna ŋ ki benapo nɛ baa ta kena a purgi basa a pɛ bumo na be bejuŋkparpo. B shi Bɛɛrɔf nɛ k la Bɛnjamin be yiri to ebi be kasawule na be kaba ko nna.

³ Bɛɛrɔf be ndetobia gbagba daŋ shile nna n ya chena Gittaim. B kraa tase ndoŋ fanɛ befɔ hale kabre.

⁴ Sɔɔl mo nanabiana na be eko e daa la Jonatan pibinyɛn Mifiboshɛf. Saŋɛ nɛ kubɔya shi Jezreel m ba fanɛ b mɔ Sɔɔl nɛ Jonatan na nɛ eche nɛ e bee keta Mifiboshɛf na ta mo a shile. Ŋkpal e ka daa kuse so, nɛ kebia na suge mbe enɔ to n tɔr ŋ ki bobi. Loŋ be saŋɛ nɛ Mifiboshɛf la nfɛ anu.

⁵ Kapiidi ko nɛ Ishboshɛf dese a wushi nɛ Reekab nɛ Baana yɔ mbe laŋ to.

⁶ B daŋ ya luri mbe laŋ to nna fanɛ b ka bee fin nyifu na.

⁷ B ka luri Ishboshɛf be ebu to, nɛ b pe kasaŋɛ n da mbe epun m mɔ nseŋ ku mbe kumu n ta kumo m bɔla Jɔɔdan be ketaŋɛ na to n nite kanyɛso le hale nɛ kare ya chɛ.

⁸ Ndoŋ nna nɛ b ta kumu na n ya sa ewura Deevid ashi Hibrɔn nseŋ kaŋɛ mo le: “Fo doŋ Sɔɔl nɛ e daa sha kemɔ fo na pibinyɛn Ishboshɛf be kumu nde. Enyɛnpe Ebɔrɛ na e shin nɛ fo kuwurji koso kabre a kɔ Sɔɔl nɛ mo nanabiana a tal to na.”

⁹ Nɛ Deevid shuli so ŋ kaŋɛ bumo le: “Enyɛnpe Ebɔrɛ nɛ e la ma shɛdajipo na nawule e mɔlga ma ashi tɔrɔ kikɛ to!

¹⁰ Kabɔ nɛ e ba Ziklag m ba kaŋɛ ma Sɔɔl be luwu be asheŋ na daŋ fɛ nna fanɛ baru lela nɛ e daa kɔ a bar ma. Ama n daŋ shin nna nɛ b mɔ mo. Mbe baru na be kebɔ be tɔnɔ nɛ e daŋ nya nna na.

¹¹ Shɛŋ shɛŋ maŋ naŋ lubi a chɔ fanɛ basa lubi ka beeŋ ya mɔ esa nɛ e maŋ wora kulubi kikɛ mbe laŋ to ashi mbe gedo so gba! Ma alɛ gba beeŋ wora menyi n tal to ŋkpal men ka mɔ kanyɛn ere so, menyi alɛ gba maaŋ naŋ ji efute durnya ere to.”

¹² Ndoŋ nna nɛ Deevid ponte ŋ kaŋɛ mbe benapo na fanɛ b mɔ bumo, nɛ b mɔ Reekab nɛ Baana nseŋ ku bumo be enɔana nɛ bumo be aya nseŋ ya chɛ bumo eyurana efɔl n shiga ndibi so ashi Hibrɔn be kepa ase. Kumo be kaman nɛ b ta Ishboshɛf be kumu na n ya puli Abna be kebeelaŋ be nchaŋ to ashi Hibrɔn.