2 Samuɛl 10 - EBƆRƐ BE KAWƆL

Deevid ka kɔ m pɔɔ Ammɔnebi nɛ Siriyaebi so be asheŋ

¹ K maŋ chɛr ko nɛ Ammɔn be ewura Nahaash wu, nɛ mo pibinyɛn Hanuun ki ewura.

² Ndoŋ nna nɛ Ewura Deevid fɛ le: “A daga ŋ ka bugi kagbene n wora Hanuun kelela, fanɛ kananɛ mo tuto Nahaash gba daŋ bugi mbe kagbene n wora ma kelela na.” Amoso Deevid daŋ shuŋi mbɔ nna fanɛ b ya wora Hanuun edaŋkena. B ka ya fo Ammɔn be kasawule so,

³ nɛ Ammɔn be bewurbi na kaŋɛ ewura na le: “Fee fɛ fanɛ fo tuto be bunyaŋ so nɛ Deevid shuŋi basa ere fanɛ b ba wora fo edaŋkena ere a? Mannɛ loŋ so nna! E shuŋi bumo nna nɛ b ba dara anyi be kade ere ŋ keni, saŋɛ na so, e beeŋ ba kɔ m pɔɔ anyi so!”

⁴ Ndoŋ nna nɛ Hanuun pɛ Deevid be mbɔ na n she bumo be ntɔl be mba nseŋ naŋ ku bumo be epiŋi malɛ be aya ase n ya fo bumo be nshɛr to a ŋini fanɛ b sipa bumo alegaiso nseŋ yige bumo nɛ b choŋ.

⁵ B daŋ fin kananɛ baŋ naŋ bɛta n yɔ epe ŋ gben ŋkpal anishinyɔr so. Deevid ka nu kusɔ nɛ k wora na nɛ e shuŋi mbɔ b ya kaŋɛ bumo fanɛ b ba ka wɔ Jɛriko n ya fo jemanɛ nɛ bumo be ntɔl na beeŋ daŋ pɔɛŋ nɛ b ba epe.

⁶ Ammɔnebi na ka pin fanɛ b wora n da ewura Deevid so ga so, nɛ b ya fin Siriya be benapo nɛ bumo be ŋgboŋ adunyɔ shi Bɛtrihɔb nɛ Zoba, nɛ ŋgboŋ kuduanyɔ malɛ shi Tɔb, nɛ kagboŋ malɛ shi Maaka be ewura kutɔ.

⁷ Deevid ka nu loŋ na nɛ e lara Jɔab fanɛ e juŋkpar mbe benapo na kikɛ n ya kɔ bumo.

⁸ Ammɔnebi na bre daŋ kre kena nna n yili kadegboŋ nɛ baa tre Rabba na be kabunagboŋ nɛ baa bɔla to a luri kumo to na, ama bumo nɛ b ka na, fɔŋfɔŋ Siriyaebi nɛ basa nɛ b shi Tɔb nɛ Maaka na bre daŋ chala nna n ya yili kade na be kowuanɔ.

⁹ Jɔab ka wu fanɛ bumo doŋana be benapo na be beko ka wɔ bumo be anishito nɛ beko malɛ wɔ bumo be kaman, nɛ e lara Israɛl be benapo lempo ko nɛ b juŋkpar a kɔ Siriyaebi na.

¹⁰ Mo sipo Abishai e daŋ juŋkpar benapo nɛ b ka na n ya kaa kɔ Ammɔnebi,

¹¹ nɛ Jɔab kaŋɛ mo le: “Fo baŋ wu fanɛ Siriyaebi na bee pɔɔ ma so, fo wora ania m ba chɛ ma to, nɛ Ammɔnebi na malɛ kaa pɔɔ fo so, ma alɛ beeŋ ba chɛ fo to.

¹² Baa kɔ eleŋ nseŋ naa leŋ fo kumu to kpakpa! Men shin nɛ an pere kenishi ŋ kɔ n sa anyi be basa nɛ Ebɔrɛ be nde, nseŋ shin nɛ Enyɛnpe Ebɔrɛ malɛ be aparsheŋ a wora!”

¹³ Ndoŋ nna nɛ Jɔab nɛ mbe basa yɔ nɛ b ya kɔ Siriyaebi na, nɛ Siriyaebi na shile.

¹⁴ Ammɔnebi na ka wu fanɛ Siriyaebi na bee shile na nɛ bumo alɛ gba lara keya fuful Abishai be anishito n shile n luri kade to. Ndoŋ nna nɛ Jɔab yige kekɔ Ammɔnebi na nseŋ bɛta n yɔ Jerusalɛm.

¹⁵ Siriyaebi na ka wu fanɛ Israɛlebi na pɔɔ bumo so na, nɛ b naŋ tre bumo be benapo m ba abar so.

¹⁶ Ewura Hadadeza daŋ shuŋi mbɔ nna n tre Siriyaebi nɛ b wɔ Yufreetes be Lɔr na be epeŋilarkpa be kaba so na nɛ Shobak nɛ e bee juŋkpar ewura Hadadeza be benapo na juŋkpar bumo n yɔ Helaam be kade to.

¹⁷ Ewura Deevid ka nu loŋ nɛ e shin nɛ Israɛl be benapo na kikɛ chala abar so nseŋ dii Jɔɔdan be Lɔr na n yɔ Helaam, kakpa nɛ Siriyaebi na daa ba nɛ b ba tu mo ŋ kɔ na. Kena na ka fara na,

¹⁸ nɛ Israɛlebi na ju m buu Siriyaebi be benapo na so. Ndoŋ nna nɛ Deevid nɛ mbe basa mɔ Siriyaebi na be egbaŋɛturko be bediipo be basa alfa ashunu nɛ egbaŋɛ diipo malɛ be basa ŋgboŋ adena. B daŋ doro Shobak nɛ e la bumo doŋana be benapo be enimu na nna, hale nɛ e wu kena na to.

¹⁹ Bewura mo nɛ b daa shuŋ Hadadeza na ka pin fanɛ naniere bre Israɛlebi na pɔɔ bumo so nɛ b fara a fin kagbenewushi ashi Israɛlebi na kutɔ, hale ŋ ki basa nɛ baa shuŋ bumo. Ndoŋ nna nɛ kufu pɛ Siriyaebi na nɛ b fin kananɛ baa naŋ chɛ Ammɔnebi na to ŋ gben.