2 Kronikɛls 8 - EBƆRƐ BE KAWƆL

Kusɔ nɛ ewura Sɔlɔmɔn tiŋ n wora be asheŋ

¹ Nfɛ adunyɔ nɛ Sɔlɔmɔn daŋ ta m pɔr bɔrɛlambu na nɛ ewura be laŋ n loge.

² Kumo be kaman nɛ e naŋ lɔŋɛ m pɔr nde nɛ ewura Hiram nɛ e la Tayɛ be ewura daŋ ta n sa mo na gba nseŋ shin nɛ Israɛlebi na ya chena amo to.

³ Ewura Sɔlɔmɔn daŋ ya kɔ Hamaf Zoba kena nna n sɔ ndoŋ be kaba na so kikɛ.

⁴ E daŋ shin nna nɛ mbe beshumpo lɔŋɛ m pɔr kade nɛ baa tre Tadmɔ nɛ k wɔ keshishɛrsawule so na nɛ nde nɛ a wɔ Hamaf nɛ e bee yili mbe ajibi ndoŋ na.

⁵ E daŋ naŋ lɔŋɛ m pɔr Bɛf Hɔrɔn nɛ k wɔ esoso be kaba so na nɛ Bɛf Hɔrɔn nɛ kumo alɛ wɔ kaseto be kaba so na nseŋ shin nɛ b pɔr egbal ŋ kulti amo nseŋ wɔtɔ amo be mbunagboŋana kikɛ abersobi.

⁶ Loŋ koŋwule na nɛ e wora n sa Baalaf nɛ nde nɛ e bee ta ajibi nɛ egbaŋɛturko nɛ egbaŋɛ a yili na. Ewura Sɔlɔmɔn daŋ shin nna nɛ mbe beshumpo pɔr asɔ nɛ e bee sha n yili Jerusalɛm nɛ Lebanɔn nɛ mbe efuli so be kaplɛkama.

^7-8 Ewura Sɔlɔmɔn daŋ shin nna nɛ Keenan be efuli so b basa nɛ Israɛlebi daa maŋ mɔ saŋɛ nɛ b daŋ lar Ijipt m ba sɔ kasawule na bee shuŋ a sa mo. Bumo e daa la Hitebi nɛ Amɔriebi nɛ Pɛrizebi nɛ Hivebi nɛ Jebusiebi nɛ bumo be kaman to ebi la anya hale m ba fo loŋ be jemanɛ na so.

⁹ Ewura Sɔlɔmɔn daa maa tintiŋ Israɛlebi na bre nɛ baa shuŋ ashuŋ kpakpaso ama e daŋ ta bumo be beko nna ŋ ki benapo nseŋ ta beko malɛ ŋ ki benapo be benimu nseŋ ta beko ŋ ki egbaŋɛturko nɛ bumo nɛ bumo baa dii egbaŋɛ a kɔ kena nɛ benapo nɛ baa nite ayaso a kɔ kena be benimu nna.

¹⁰ Ewura Sɔlɔmɔn daŋ lara ekrachi alfa anyɔ nɛ adunu nna nɛ baa keni beshumpo nɛ baa pɔr mbe asɔ na kikɛ so.

¹¹ Ewura Sɔlɔmɔn be eche nɛ e la Ijipt be ewura pibiche na, daŋ koso Jerusalɛm be kaba ko nɛ baa tre Deevid be kade to na nna n yɔ ewura be laŋ popɔr nɛ Sɔlɔmɔn pɔr na to. B ka daŋ ta Enyɛnpe Ebɔrɛ be ŋkre be deka na n ya yili Deevid be kade to na, kumo be loŋ e daŋ shin nɛ ewura be laŋ na ki cheembi nɛ ewura Sɔlɔmɔn be eche na maŋ naŋ tiŋ n chena kumo to.

¹² Ewura Sɔlɔmɔn daŋ lara esarga bɔrɛsure nɛ b pɔr bɔrɛlambu na be anishito nna n sa Enyɛnpe Ebɔrɛ.

¹³ E daŋ bɛ kananɛ Mosis ŋini fanɛ b baa lara esarga kewushiachɛ na, nɛ kufɔl popɔr kikɛ be kachɛ sososo nɛ bodobodo nɛ a maŋ kɔ yiisi be kachɛgboŋ nɛ kasɔteŋi be kachɛgboŋ nɛ abuu to be kebaawɔ be kachɛgboŋ so nna.

¹⁴ Kananɛ mo tuto ewura Deevid nɛ e la Ebɔrɛ be esa na daŋ kaŋɛ mo na, nɛ mo alɛ gba bɛ so nseŋ nyiŋi m barga kushuŋ na to n sa bɔrɛmatapoana nɛ Livaiebi nɛ baa chɛ bɔrɛmatapoana to a boŋ nshɛ nseŋ naa chɛ bumo to a shuŋ karechɛ kikɛ na. E daŋ barga bɔrɛlambu na be mbuna be bekenipo na to ntuŋ ntuŋ so nna n yili nɛ baa shuŋ mbunagboŋ na be kekama ekpa karechɛ kikɛ.

¹⁵ B daŋ bɛ asheŋ nɛ ewura Deevid daŋ kaŋɛ bɔrɛmatapoana nɛ Livaiebi na a laŋɛ ajibi be ebuana nɛ asheŋ ko ana gba be kaplɛa so nna dede.

¹⁶ Ewura Sɔlɔmɔn daŋ wora kusɔ kama nɛ e kre fanɛ e beeŋ wora na kikɛ nna n loge, baŋ yili saŋɛ so nɛ b fara Enyɛnpe Ebɔrɛ be bɔrɛlambu na be gbaltɔlase hale nɛ k ya loge.

¹⁷ Kumo be kaman nɛ ewura Sɔlɔmɔn yɔ Eziɔngɛba nɛ Elaf nɛ a la Edɔm be kasawule so be ndegboŋ anyɔ nɛ a wɔ teku peper na be kɔnɔ ase na.

¹⁸ Ewura Hiram daŋ shin nna nɛ mbe basa nɛ b nyi nchu to be asheŋ nɛnɛ na ta ekuloŋgboŋana ko m ba sa ewura Sɔlɔmɔn. Bumo nɛ Sɔlɔmɔn be basa e daŋ bɔla nchu so n yɔ efuli nɛ baa tre Ɔfir na. B ka bɛta a ba, nɛ b bar ewura Sɔlɔmɔn shuwa nɛ amo be egbɛ sa fanɛ kilo ŋgboŋ kuduanu.