2 Kronikɛls 30 - EBƆRƐ BE KAWƆL

K bela ase n ji kebansonchoŋ be kejigboŋ na be asheŋ

^1-3 Basa na daa maŋ tiŋ n ji kebansonchoŋ be kejigboŋ na kufɔl juŋkparso na to, ŋkpal manɛ so bɔrɛmatapoana na be bedamta daa maŋ fɔrso n lar so daŋkare be ekpa so nɛ basa damta malɛ daa maŋ ba Jerusalɛm to. Ŋkpal loŋ so, ewura Hɛzekaya nɛ mbe benimuana nɛ Jerusalɛm be basa daŋ shuli nna fanɛ b ji kejigboŋ na kufɔl nyɔsopo na to. Kumo be kaman b sa Israɛl nɛ Judaebi nɛ Efrayim nɛ Manase be eyiri na ebɔl fanɛ b ba nɛ b ji kebansonchoŋ be kejigboŋ na ashi Jerusalɛm be bɔrɛlambu na to nɛ k baa la kemaŋkura n sa Enyɛnpe Israɛl be Ebɔrɛ na.

⁴ Ewura na nɛ basa na kikɛ be ŋgbene daŋ fuli bumo nna ŋkpal kusɔ nɛ b kre na so.

⁵ B daŋ yili Dan be kasawule so be kelargato be esoso be kaba so nna n tre Israɛlebi na kikɛ n ya fo Bɛshiba be kelargato be kaseto be kaba so fanɛ b chala abar a chɔ kananɛ b daa chala abar na m ba Jerusalɛm m ba ji kebansonchoŋ be kejigboŋ na kananɛ mbra na ŋini na.

⁶ Ewura na nɛ mbe benimuana na daŋ shin nna nɛ mbɔ ta le be kubɔya ere n yɔ Juda nɛ Israɛl be efuli so kikɛ: “Menyi Israɛl be basa nɛ men nya men be amu saŋɛ so nɛ Asiriyaebi daŋ kɔ n sɔ kasawule ere na, e bɛta m ba Enyɛnpe Ebɔrɛ nɛ e la an nananyɛnana Eebraham nɛ Aizek nɛ Jeekɔb be Ebɔrɛ na kutɔ nɛ mo alɛ gba e sɔ menyi.

⁷ Menyi ere e sa maŋ kaŋ ki fanɛ men nananyɛnana nɛ men braana Israɛlebi nɛ b daa maŋ ji kashenteŋ n sa Enyɛnpe bumo be Ebɔrɛ na. Men gbagba wu kananɛ e gberge bumo kusoe alegaiso.

⁸ Menyi ere e sa maŋ wora amu kpakpaso fanɛ kananɛ men nananyɛnana daŋ wora na, ama men baa nu a sa Enyɛnpe Ebɔrɛ na. Men ba men Nyɛnpe Ebɔrɛ be bɔrɛlambu cheembi nɛ k wɔ Jerusalɛm na to m ba bunyaŋ mo saŋɛ na so e maaŋ naŋ nya agbo n wɔtɔ menyi.

⁹ Men baŋ bɛta m ba Enyɛnpe Ebɔrɛ na kutɔ, kumo ere basa kama nɛ b kɔ n sɔ men kurgepoana na beeŋ wu bumo kuwɔr nseŋ shin nɛ b naŋ bɛta m ba epe. Men Nyɛnpe men be Ebɔrɛ na la esa ga nsaa wu kuwɔr, amoso nɛ men baaŋ bɛta m ba mo kutɔ, mo alɛ gba beeŋ sɔ menyi.”

¹⁰ Mbɔ na daŋ yɔ nde nɛ a wɔ Efrayim nɛ Manase be eyiriana na be efuli so kikɛ to nna hale n ta n ya fo Zɛbyulɔn be yiri na be kelargato be esoso be kaba so kikɛ, ama basa daŋ mushe bumo nna nseŋ wora bumo amɔmɔshiasheŋ.

¹¹ Ama amo nɛ amo kikɛ, eyiri nɛ b daa shi Ashɛr nɛ Manase nɛ Zɛbyulɔn be kaba so na be basa ko bre daa sha keba Jerusalɛm nna.

¹² Ebɔrɛ daŋ shuŋ mbe kushuŋ ashi Juda nna nseŋ leŋ basa na to nɛ b nya kɔnɔkoŋwule a wora ania a wora mo kasonu nsaa bɛ ewura na nɛ mbe benimuana na malɛ be mbra so.

B ka ji kebansonchoŋ be kejigboŋ na be asheŋ

¹³ Basa damta daŋ ba shɛr Jerusalɛm kufɔl nyɔsopo na to nna nɛ b ji bodobodo nɛ a maŋ kɔ yiisi na be kejigboŋ na.

¹⁴ B daŋ lara efuli pɔtɛana so be ebɔrɛsure nɛ b daa lara esarga nsaa chɔɔ eduwu amo so na nna n lɛ Kidrɔn be ketaŋɛ na to.

¹⁵ B daŋ mɔ ekpakpafɔlbi nɛ b kɔ a lara kebansonchoŋ be kejigboŋ be sarga kufɔl na be kachɛ kuduanasopo na to nna. Anishinyɔr daŋ pɛ Bɔrɛmatapoana nɛ Livaiebi nɛ b daa maŋ walɛ so daŋkare be ekpa so na nna nɛ b ta bumo be amu n bɔɔ Enyɛnpe Ebɔrɛ enɔ pɔɛŋ nseŋ tiŋ n lara sarga chɔɔso bɔrɛlambu na to.

¹⁶ Kede be kaman nɛ b fara a shuŋ bumo be ashuŋ bɔrɛlambu to fanɛ kananɛ Ebɔrɛ be kenya Mosis be mbra yili n sa bumo na. Livaiebi na e ta asɔbɔya nɛ b ta n lara esarga na be ŋklaŋ n sa bɔrɛmatapoana na nɛ bumo alɛ ta amo ŋ ŋmenyaŋ bɔrɛsure na so.

¹⁷ Ŋkpal basa na be bedamta ka daa maŋ walɛ so daŋkare be ekpa so na so, b daa maŋ tiŋ m mɔ kebansonchoŋ be ekpakpafɔlbi na. Amoso Livaiebi na e daŋ mɔ bumo be asɔbɔya nseŋ ta amo m bɔɔ Enyɛnpe Ebɔrɛ na enɔ n sa bumo.

¹⁸ Amo nɛ amo kikɛ basa na be bedamta nɛ b shi Efrayim nɛ Manase nɛ Isaaka nɛ Zɛbyulɔn be eyiri to na daa maŋ fɔr bumo be amu so daŋkare be ekpa so nseŋ ji kebansonchoŋ be kejigboŋ na ekpa nɛ k maŋ daga so. Ndoŋ nna nɛ ewura Hɛzekaya kule le be kabɔrɛkule ere n sa bumo.

¹⁹ E yɛ: “O! Enyɛnpe an nananyɛnana be Ebɔrɛ nɛ fo walɛ, ta bekama nɛ baa shuŋ fo nɛ kagbene koŋwule na be alubi m paŋ bumo, hale b ka maŋ walɛ so daŋkare be ekpa so kikɛ ere gba.”

²⁰ Enyɛnpe Ebɔrɛ na daŋ nu ewura Hɛzekaya be kabɔrɛkule nna nseŋ ta basa na be alubi m paŋ bumo nsaa maŋ tɔrɔ bumo.

²¹ Basa nɛ b daŋ ba shɛr Jerusalɛm na daŋ ta nchɛ ashunu nna n ji bodobodo nɛ a maŋ kɔ yiisi be kejigboŋ na kagbenefuliso nɛ Livaiebi na nɛ bɔrɛmatapoana na bee boŋ nshɛ nsaa laŋ alaŋsɔ a di Enyɛnpe Ebɔrɛ epaŋ karechɛ kikɛ.

²² Ewura Hɛzekaya daŋ chɔrɔ Livaiebi na nna ŋkpal kenyi nɛ b daa kɔ a juŋkpar basa nɛ baa bunyaŋ Enyɛnpe Ebɔrɛ na so. Nchɛ ashunu nɛ b ta n lara sarga n di Enyɛnpe bumo nananyɛnana be Ebɔrɛ na epaŋ na be kaman,

Kejigboŋ nyɔsopo na be asheŋ

²³ nɛ bumo kikɛ naŋ yili kumo fanɛ b naŋ ji kejigboŋ na nchɛ ashunu n ti so. Ndoŋ nna nɛ b ji kumo kagbenefuliso nchɛ ashunu n ti so.

²⁴ Ewura Hɛzekaya daŋ sa basa na egbolu kagboŋ nɛ ekpakpa ŋgboŋ ashunu nna fanɛ b mɔ n we. Nɛ benimuana na malɛ sa bumo egbolu kagboŋ nɛ ekpakpa ŋgboŋ kudu, nɛ bɔrɛmatapoana damta fɔr bumo be amu so daŋkare be ekpa so.

²⁵ Amoso Judaebi na nɛ bɔrɛmatapoana na, nɛ Livaiebi na, nɛ Israɛlebi na, nɛ befɔ nɛ b wɔ Israɛl nɛ Juda be efuli so kikɛ be ŋgbene daŋ fuli bumo nna.

²⁶ Kagbenefuli daŋ baa wɔ Jerusalɛm kikɛ to nna, ŋkpal manɛ so yili ewura Deevid pibinyɛn, ewura Sɔlɔmɔn be jemanɛ so kikɛ, loŋ be asheŋ maŋ naŋ wora kikɛ.

²⁷ Bɔrɛmatapoana na nɛ Livaiebi na daŋ kule Enyɛnpe Ebɔrɛ be nɛfa nna n sa basa na, nɛ Enyɛnpe Ebɔrɛ na shi esoso n nu bumo be kekule.