2 Kronikɛls 26 - EBƆRƐ BE KAWƆL

Juda be ewura Uziya be asheŋ

^1-3 Ewura Amaziya ka wu na nɛ Juda be efuli so ebi kikɛ lara Amaziya pibinyɛn Uziya nɛ e daa la nfɛ kuduashe na ŋ ki ewura. Uziya daŋ ji kuwura Jerusalɛm to nfɛ adunu nɛ anyɔ nna. Mo nio e daa la Jekolia nɛ e shi Jerusalɛm na. Mbe saŋɛ so nɛ e naaŋ kɔ n sɔ Elɛf nseŋ lɔŋɛ kumo m pɔr.

⁴ E daŋ bɛ mo tuto be aya so nna n wora kusɔ nɛ k bee par Enyɛnpe Ebɔrɛ na.

⁵ Ewura Uziya be asoetojipo e daa la Zakareya. Saŋɛ so nɛ Zakareya daa wɔ ŋkpa to na ewura Uziya daa ji kashenteŋ nna a sa Ebɔrɛ, nɛ Ebɔrɛ malɛ daa nɛfa mo.

⁶ Ewura Uziya daŋ ya kɔ Filistiebi na kena nna nseŋ da Gaaf nɛ Jamnia nɛ Ashdɔd be nde na kikɛ be egbalana n lɛ. Kumo be kaman nɛ e wora nde popɔr m mata Ashdɔd nseŋ pɔr egbalana ŋ kulti amo nɛ Filisti be efuli so be nde ko.

⁷ Ebɔrɛ e daŋ chɛ mo to nɛ e kɔ m pɔɔ Filistiebi nɛ Nlɔrbu nɛ b daa wɔ Gurbaal na nɛ Meuniebi nɛ b shi Edɔm be efuli so na kikɛ so.

⁸ Ammɔnebi na daa ka lampo nna a sa ewura Uziya ŋkpal loŋ so e daŋ ji eleŋ ga nna nɛ mbe ketre daŋ dii hale nɛ Ijipt be kasawule so ebi nu mbe asheŋ.

⁹ Ewura Uziya daŋ naŋ shin nna nɛ b pɔr atempreŋ jeŋgreŋ n yili Jerusalɛm be egbal na be kukɔlɔ to be kabuna na so nɛ Ketaŋɛ be kabuna na so nɛ egbal na be kebonfu ko so, n shin nɛ a naŋ wora eleŋ n ti so.

¹⁰ Mo alɛ daŋ m pɔr atempreŋ jeŋgreŋ nna ashi efuli na be kiyi to nseŋ kur edampu damta ŋkpal e ka kɔ asɔbɔya damta nɛ b wɔ epeŋitɔrkpa be kaba so be abee be efuli nɛ keplasawule so na so. Ŋkpal e ka bee sha kudɔ ga so, e daŋ leŋ basa na to nna fanɛ b baa dɔ ndibi nɛ baa tre greep na be adɔ ashi abee be efuli na so nsaa dɔ adɔjibi ndoŋ be kasawule lela na so.

¹¹ E daa kɔ benapo damta nɛ b wora shiriya nɛ b ya kɔ kena saŋkama nna. Hananiya nɛ e daa la ewura be benimuana to be eko na e daa keni Jeɛl nɛ Maaseia nɛ b daa sibɛ benapo na nɛ kena to be asheŋ a wɔtɔ nwɔl to na so.

^12-13 Benapo be benimu ŋgboŋ anyɔ nɛ alfa ashe e daa keni benapo ŋgboŋ alfa asa nɛ ashunu nɛ alfa anu nɛ b nyi kena be kekɔ nɛnɛ nsaa kɔ ewura na mo doŋana na so.

¹⁴ Ewura Uziya e daa sa benapo na abɛlso be asɔkuŋso nɛ ekpa nɛ abɛlso be akpaŋwuro nɛ kena to be epiŋi nɛ ata nɛ atanyembi nɛ atababu be ajembu.

¹⁵ Mbe beshumpo nɛ b nyi kushuŋ nɛnɛ na be beko daŋ lɔŋɛ akɔsɔ ko nɛ baa ta a to atanyembi nɛ ajembu gboŋgboŋi nna. Ewura Uziya daŋ ta loŋ be akɔsɔ na nna n yili atempreŋ jeŋgreŋ nɛ a wɔ Jerusalɛm be egbal na be abonfu na so nna. Ebɔrɛ daŋ chɛ ewura Uziya to nna nɛ e ji eleŋ ga nɛ mbe ketre malɛ dii ashi durnya ere be efuli kikɛ so.

¹⁶ Ewura Uziya ka nya eleŋ nɛ mbe ketre dii ga na, nɛ kamoowu luri mo to nɛ kumo be loŋ shin nɛ e tɔr. E daŋ wora kusoe kpakpaso nna n sa Enyɛnpe mbe Ebɔrɛ na nseŋ ya luri bɔrɛlambu na to nɛ e chɔɔ duwu bɔrɛsure nɛ baa chɔɔ duwu kumo so na so.

¹⁷ Ndoŋ nna bɔrɛmatapo Azariya nɛ bɔrɛmatapoana aduburwa nɛ b kɔ kenyɛn ga daŋ bɛ ewura na so

¹⁸ nɛ b ya kuŋ mo akpa. B yɛ: “Uziya, fo maŋ kɔ ekpa nɛ fo chɔɔ duwu n sa Enyɛnpe Ebɔrɛ. Bɔrɛmatapoana nɛ b shi Ɛɛrɔn be kanaŋ to na nawule e kɔ ekpa nɛ b tiŋ n wora loŋ. Lar kakpa cheembi ere ŋkpal manɛ so fo wora kulubi ŋ gbiti Ebɔrɛ nɛ mbe nɛfa maŋ naa wɔ fo so.”

¹⁹ Ewura Uziya daa yil bɔrɛlambu na to nna m mata bɔrɛsure nɛ baa chɔɔ duwu kumo so na a kɔ kusɔ chɔɔ duwu to. E ka nu bɔrɛmatapoana na be kefiɛso nɛ e nya agbo nɛ keboti pɛ mbe kasɔto epul na to.

²⁰ Bɔrɛmatapo Azariya nɛ bɔrɛmatapoana na ka wu kulɔ lubi na mbe kasɔto nɛ b kaŋɛ fanɛ e lar bɔrɛlambu na to epul na to. Mo gbagba ka pin fanɛ Enyɛnpe Ebɔrɛ e naa gberge mo kusoe so, nɛ e wora manaŋ n lar ndoŋ.

²¹ Ewura Uziya daŋ ki botipo nna hale n ya wu. Amoso b daa maŋ naŋ sa mo ekpa nɛ e luri bɔrɛlambu na to kikɛ. E daa wɔ laŋ pɔtɛ to nna nɛ mo pibinyɛn Jotam sɔ mo so a wɔ ewura be laŋ to a ji efuli na so be kuwura.

²² Anebi Aizaaya nɛ e la Amɔz pibinyɛn na e daŋ sibɛ kusɔ kama nɛ ewura Uziya daŋ wora saŋɛ so nɛ e daa ji kuwura na.

²³ Ewura Uziya ka wu, b daa maŋ puli mo kakpa nɛ baa puli bewura gbagba na. B daŋ ya puli mo kakpa pɔtɛ nɛ kumo alɛ gba la bewura be kakpa nna ŋkpal e ka kɔ keboti so. Mo pibinyɛn Jotam malɛ e daŋ sɔ mo so n ji kuwura.