2 Kronikɛls 20 - EBƆRƐ BE KAWƆL

B ka kɔ m pɔɔ Mowab nɛ Ammɔn so be asheŋ

¹ Jemanɛ ko ka ba fo nɛ Mowab nɛ Ammɔn be benapo ya ti Meuniebi nɛ b wɔ Edɔm be efuli so na so nɛ b kɔ Judaebi kena.

² Nɛ mbɔ ko ba kaŋɛ ewura Jehoshafat le: “Benapo damta ko nɛ b shi Edɔm be efuli so na lar Teku wuso na be kaba ndoŋ m ba nɛ b ba kɔ fo kena. B tiŋ n ya kɔ m pɔɔ Engedi bre so.”

³ Ndoŋ nna nɛ kufu pɛ Jehoshafat ga nɛ e kule Enyɛnpe Ebɔrɛ fanɛ e ŋini mo kusɔ nɛ e beeŋ wora. Kumo be kaman nɛ e shin nɛ efuli na be basa kikɛ kishi ŋ kule Ebɔrɛ n sa mo.

⁴ Amoso Juda be efuli so be basa daŋ ba shɛr Jerusalɛm nna nɛ b fin kechɛto ashi Enyɛnpe Ebɔrɛ kutɔ.

⁵ Bumo kikɛ ka ba shɛr bɔrɛlambu na be kelɔnɛ popɔr na so nɛ ewura Jehoshafat ya yili bumo be anishito

⁶ nseŋ kule Ebɔrɛ le: “O Enyɛnpe nɛ fo la an nananyɛnana be Ebɔrɛ. Fo e naa ji ebɔrɛso nɛ durnya ere be efuli kikɛ so kuwura. Fo alɛ kɔ eleŋ ga nɛ esa kikɛ maŋ wɔtɔ nɛ e beeŋ tiŋ m pɔɔ fo so.

⁷ Fo e la anyi be Ebɔrɛ. Fo basa Israɛlebi na ka koso m ba kasawule ere so na, fo e ju basa nɛ b daa wɔ nfe na nseŋ ta kasawule na n sa fo teri Eebraham be kaman to ebi nɛ k baa la bumo peya mbaanaayɔ.

⁸ B chena kasawule ere so nna m ba pɔr bɔrɛlambu ere nɛ k baa la kemaŋkura n sa fo,

⁹ saŋɛ na so nɛ kena ŋko alɔ ŋko akoŋ be jɛrbi kaŋ ba bumo so, baaŋ tiŋ m ba kakpa nɛ baa bunyaŋ fo na ashi bɔrɛlambu ere be anishito m ba kule fo ashi bumo be etɔrɔ be jemanɛ nɛ fo nu nseŋ mɔlga bumo.

¹⁰ Naniere Ammɔn nɛ Mowab nɛ Edɔm be basa ba nɛ b ba kɔ anyi kena. An nananyɛnana ka lar Ijipt be efuli so a ba na, fo daa maŋ shuli nɛ b kɔ n sɔ loŋ be nsawule na, ŋkpal loŋ so an nananyɛnana daŋ maŋ mur bumo.

¹¹ Kukɔ nɛ baa ka anyi a tal to nna na. B ba nɛ b ba ju anyi ashi kasawule nɛ fo ta n sa anyi na so nna.

¹² Fo e la anyi be Ebɔrɛ! Gberge bumo kusoe ŋkpal manɛ so anyi ere maŋ kɔ eleŋ nɛ an kɔ benapo damta nɛ baa ba nɛ b ba kɔ anyi kena ere. Anyi maŋ nyi kananɛ anyeeŋ wora ama anyee kule fo nna nɛ fo chɛ anyi to.”

¹³ Le be saŋɛ so nɛ Juda be benyɛn nɛ bumo be beche nɛ mbia yil bɔrɛlambu na ase.

¹⁴ Enyɛnpe Ebɔrɛ be kiyoyu na daŋ gbelge Livai be kanyɛn ko so nna saŋɛ so nɛ e daa wɔ jimaŋ na to na. Mbe ketre e daa la Jahaziil nɛ mo tuto la Zakareya nɛ mo alɛ mo tuto la Bɛnaya nɛ mo alɛ mo tuto la Jaɛl nɛ mo alɛ mo tuto la Mataniya ashi Asaf be kabuna.

¹⁵ Ndoŋ nna nɛ Jahaziil kaŋɛ le: “Enyɛnpe Ebɔrɛ yɛ, fo nɛ Juda nɛ Jerusalɛm be basa kikɛ e sa maa lɔ kufu ŋko a pɔ aba ŋkpal benapo damta ere so. Mannɛ men gbagba e naŋ kɔ kena ere. Ebɔrɛ e naŋ kɔ n sa menyi.

¹⁶ Kusɔ nɛ menyeeŋ wora e la fanɛ, echefo nɛ men doŋana be benapo na kaŋ bɔla keshishɛrsawule nɛ k dese ŋ kulti Jeruwɛl be kade na a ba, menyi alɛ gba e ya tu bumo ashi Ziz be kade to saŋɛ so nɛ b bɔla ketaŋɛ na ase a ba na.

¹⁷ Mannɛ menyi e naŋ kɔ kena ere. Menyi ere e bela ase a yil. Menyeeŋ wu kananɛ Enyɛnpe Ebɔrɛ na beeŋ kɔ m pɔɔ so n sa menyi. Juda nɛ Jerusalɛmebi, men sa maa lɔ kufu. Men lar n yɔ kena na to, Enyɛnpe Ebɔrɛ beeŋ ba wɔ menyi kutɔ!”

¹⁸ Ndoŋ nna nɛ ewura Jehoshafat nɛ basa na kikɛ kurgi amu n yuu to, m bunyaŋ Enyɛnpe Ebɔrɛ.

¹⁹ Livaiebi nɛ b shi Kohaf nɛ Koora be kabuna na be beko daŋ koso n yili nna a cha awɔr a maŋkura Enyɛnpe nɛ e la Israɛl be Ebɔrɛ na.

²⁰ Ŋklade kachipurdidi saŋɛ so nɛ ekama lar a yɔ keshishɛrsawule nɛ k mata Tekua na, nɛ ewura Jehoshafat niŋi to ŋ kaŋɛ jimaŋ na le: “Menyi Juda nɛ Jerusalɛm ebi! Men ta men be yirda n deŋi Enyɛnpe nɛ e la menyi be Ebɔrɛ na so nsaa yili to kpakpa. Men yirda kusɔ nɛ mbe anebiana na kaŋɛ menyi na saŋɛ na so asheŋ beeŋ nyalɛ n sa menyi.”

²¹ Ewura na ka malga basa na kutɔ n loge, nɛ e shin nɛ beshɛbompo ko ta epiŋi nɛ baa buu nchɛgboŋ achɛ na m buu n juŋkpar benapo na nsaa a boŋ nshɛ a kaŋɛ le, “Kemaŋkura e baa la Enyɛnpe Ebɔrɛ na peya! Mbe kasha wɔtɔ nna hale mbaanaayɔ!”

²² B ka baŋ fara a boŋ nshɛ na, nɛ Enyɛnpe Ebɔrɛ shin nɛ keyeŋiyeŋi tɔr bedoŋ be benapo na so nɛ b wulto epul to.

²³ Ammɔnebi nɛ Mowabebi daŋ kilgi nna ŋ kɔ Edɔmebi na be benapo kena nna m mur bumo cheche. Kumo be kaman nɛ b kilgi a mɔ abar.

²⁴ Judaebi be benapo na ka fo ketempreŋ jeŋgreŋ nɛ k wɔ keshishɛrsawule na ase na, nɛ b wu kananɛ bumo doŋana kikɛ wu a dese kasawule. Bumo be ekoŋwule gba daa maŋ naŋ ka.

²⁵ Ndoŋ nna nɛ ewura Jehoshafat nɛ mbe benapo ya muu bumo be asɔ damta nseŋ ta ana damta nɛ ajibi nɛ epiŋi nɛ asɔ damta n ti so. Nchɛ asa nɛ b daŋ ta a muu asɔ na ama amo nɛ amo kikɛ b daa maŋ tiŋ m muu amo n loge.

²⁶ Kumo be kachɛ nasopo na, nɛ b shɛr Bɛraka be ketaŋɛ na to nseŋ di Enyɛnpe Ebɔrɛ epaŋ ŋkpal kusɔ nɛ e wora so. Amoso nɛ baa tre ketaŋɛ na Bɛraka na. Kumo be kifito ashi Hibruwebi be ŋgbar to e la, kapandi.

²⁷ Kumo be kaman nɛ Ewura Jehoshafat juŋkpar mbe benapo n yɔ Jerusalɛm kagbenefuliso ŋkpal Enyɛnpe Ebɔrɛ ka pɔɔ bumo doŋana so n sa bumo so.

²⁸ B ka fo kade to nɛ b ta ejaŋjilaŋ nɛ nlopi nɛ mbel m boŋ nshɛ n yɔ bɔrɛlambu na to.

²⁹ Ndoŋ nna nɛ kufu pɛ efuli kama nɛ k nu kananɛ Enyɛnpe Ebɔrɛ kɔ m pɔɔ Israɛlebi bumo doŋana so na ga.

³⁰ Amoso Jehoshafat daŋ ji mbe kuwura kagbenewushiso nna nɛ Ebɔrɛ daŋ kuŋ mo ekpa kama so.

Ewura Jehoshafat ka ji mbe kuwura n ya fo ekar be asheŋ

³¹ Ewura Jehoshafat daŋ fo nfɛ adesa nɛ anu nna pɔɛŋ nseŋ ki Juda be ewura, ama nfɛ adunyɔ nɛ anu nɛ e daŋ chena Jerusalɛm n ji kuwura. Mo nio e daa la Shilhi pibiche Azuba.

³² Kananɛ ewura Jehoshafat mo tuto Asa daa kɔ kasonu n sa Enyɛnpe Ebɔrɛ na, loŋ nɛ mo alɛ gba daa du,

³³ ama e daa maŋ mur ndoŋ be mboŋ nɛ baa shuŋ agbir na kikɛ. Ŋkpal loŋ so basa na daa maŋ ta bumo be ŋgbene kikɛ m bɛ bumo nananyɛnana be Ebɔrɛ na so.

³⁴ B daŋ sibɛ kusɔ kama nɛ Jehoshafat daŋ wora saŋɛ so nɛ e daa la ewura na nna n wɔtɔ Hanani pibinyɛn Jehu be adrasheŋ be nwɔl nɛ amo alɛ gba ti Israɛl be bewura be adrasheŋ be nwɔl so na to.

³⁵ Jemanɛ ko, Juda be ewura Jehoshafat nɛ Israɛl be ewura Ahaziya nɛ e daŋ wora asheŋ lubi damta ga na, daŋ wora kɔnɔkoŋwule be ŋkre nna.

³⁶ B daŋ lɔŋɛ teku so be ekuloŋgboŋana nna ashi kade nɛ baa tre Eziɔngɛba nɛ k wɔ teku peper na be kɔnɔ ase na.

³⁷ Ama Eliaza nɛ e la Dodavahu pibinyɛn nsaa la anebi a shi Mɛrasha be kade to na daŋ kpele ewura Jehoshafat kusoe nna ŋ kaŋɛ le: “Ŋkpal fo nɛ ewura Ahaziya ka wora kɔnɔkoŋwule be ŋkre so, Enyɛnpe Ebɔrɛ beeŋ mur ekuloŋgboŋ nɛ fo lɔŋɛ ere.” Ndoŋ nna nɛ bumo be nchu so be ekuloŋgboŋana jija nɛ b lɔŋɛ amo ŋ gben.