2 Kronikɛls 17 - EBƆRƐ BE KAWƆL

Jehoshafat ka ki Ewura be asheŋ

¹ Ewura Asa pibinyɛn Jehoshafat e daŋ sɔ mo tuto so n ji kuwura nseŋ bela mbe kumu ase nɛnɛ nɛ e kɔ Israɛl kena.

² E daŋ ta benapo nna n yili Juda be nde nɛ b pɔr egbal ŋ kulti na nɛ ndekarso ko ashi Juda be kasawule so nɛ nde nɛ mo tuto Asa kɔ n sɔ ashi Efrayim be kasawule so na.

³ Enyɛnpe Ebɔrɛ daŋ nɛfa ewura Jehoshafat nna ŋkpal e ka daŋ bɛ kebaawɔtɔ lela nɛ mo tuto daa kɔ nseŋ kini kebunyaŋ Baal be kegbir na so.

⁴ E daŋ shuŋ mo tuto be Ebɔrɛ nseŋ bɛ Ebɔrɛ be mbra so, a maŋ wora kananɛ Israɛl be bewuraana daŋ wora na.

⁵ Enyɛnpe Ebɔrɛ daŋ sa ewura Jehoshafat eleŋ nna nɛ Juda be efuli so be kusɔ kikɛ daa wɔ mbe kuwura be kaseto. Basa na kikɛ daŋ bar mo ŋkɛ nna nɛ e ki damawura nseŋ nya bunyaŋ n ya baŋ so.

⁶ E daŋ shuŋ Enyɛnpe Ebɔrɛ na kashenteŋto ga nseŋ jija nnyamase na be ademaŋana nɛ kakpa nɛ baa shuŋ kegbirche nɛ baa tre Ashira ashi Juda be efuli so na kikɛ.

⁷ Jehoshafat ka ji kuwura be kafɛ sasopo nɛ e lara benimu ere fanɛ b ya ka ŋini Enyɛnpe Ebɔrɛ be mbra na ashi nde nɛ a wɔ Juda be efuli so na kikɛ to. Bumo e la Bɛnheel nɛ Obadaya nɛ Zakareya nɛ Natanɛl nɛ Mikaya.

⁸ Livai be basa akpanu nɛ bɔrɛmatapoana anyɔ e daŋ shuŋi bumo n yɔ. Livai be basa na e daa la Shemaya nɛ Netanaya nɛ Zebadiya nɛ Asahɛl nɛ Shamiramɔf nɛ Jehonatan nɛ Adonija nɛ Tobija nɛ Tobadonija. Bɔrɛmatapoana na malɛ e daa la Elishaama nɛ Jehoram.

⁹ B daŋ ta Enyɛnpe Ebɔrɛ be mbra be kawɔl na nna n yɔ Juda be ndeana kikɛ to n ya ka ŋini basa na.

Jehoshafat ka la esagboŋ be asheŋ

¹⁰ Enyɛnpe daŋ shin nɛ kufu pɛ efuli nɛ a kulti Juda na nna nɛ b maŋ tiŋ ŋ kɔ Ewura Jehoshafat kena.

¹¹ Filistiebi na be beko daŋ ta gbiti damta nɛ ŋkɛ ko nna m ba sa ewura Jehoshafat a ŋini fanɛ b sɔ mo ŋ ki bumo be ewura. Nlɔrbu ko gba daŋ ta mbolpɔ ŋgboŋ ashunu nɛ alfa ashunu nɛ mboe ŋgboŋ ashunu nɛ alfa ashunu nna m ba sa mo.

¹² Ewura Jehoshafat be kuwurji be eleŋ daŋ baa ti so nna saŋkikɛ. E daŋ pɔr egbalana nna ŋ kulti Juda be nde nseŋ pɔr nde nɛ baaŋ baa yili

¹³ bumo be asɔ amo to, nseŋ shin nɛ benapo be benimu ko nɛ b nyi kena be kekɔ nɛnɛ chena Jerusalɛm.

¹⁴ Adna e daa la Juda be kabuna be benapo be enimu, nseŋ daa kɔ benapo ŋgboŋ alfa asa a keni so.

¹⁵ Jehohanan e daa la enimu nyɔsopo m bɛ mo so nsaa keni benapo ŋgboŋ alfa anyɔ nɛ aduburwa so.

¹⁶ Enimu sasopo e daa la Zikri pibinyɛn Amaziya nɛ mo alɛ daa keni benapo ŋgboŋ alfa anyɔ so. Amaziya daŋ lara mbe kumu nna n yili fanɛ e beeŋ shuŋ Enyɛnpe Ebɔrɛ.

¹⁷ Benapo be enimu nɛ e daa keni Bɛnjamin be kabuna be benapo so e daa la Eliada nɛ e daa la enapo lempo nsaa keni benapo ŋgboŋ alfa anyɔ nɛ b kɔ abɛlso be asɔkuŋso nɛ ata a kɔ kena na so.

¹⁸ Emo nɛ e bɛ mo so nsaa juŋkpar benapo ŋgboŋ kalfa nɛ aduburwa nɛ b kɔ kena to be adoŋsɔ nɛnɛ na, e daa la Jehozabad.

¹⁹ Le be basa ere kikɛ daa shuŋ ewura na ashi Jerusalɛm nna, ama e daŋ naŋ ta benapo ko gba n chena nde nɛ b pɔr egbal ŋ kulti ashi Juda be efuli so na kikɛ nna.