2 Bewura 25 - EBƆRƐ BE KAWƆL

Jerusalɛm ka tɔr be asheŋ

¹ Zɛdikaya ka ji Juda be efuli so be kuwura be kafɛ kpanusopo to be kufɔl kudusopo be kachɛ kudusopo to nɛ Babilɔn be ewura, Nebukadneeza nɛ mbe benapo kikɛ ba nɛ b ba kɔ Jerusalɛm kena. B daŋ ba wora bumo be keeyi to nna m mata kade na nseŋ pugi ŋ kulti Jerusalɛm be kadegboŋ na kikɛ n wɔtɔ nsaa gbare shishɛr a deŋi abar so a mata kumo be egbal na nɛ b dii so n luri to.

² Benapo na daŋ kulti kadegboŋ na nna n wɔtɔ fanɛ kafɛ nɛ bargato.

³ Ewura Zɛdikaya be kuwurji be kafɛ kudukakosopo to be kufɔl nasopo na be kachɛ kpanusopo na nɛ Jerusalɛm to be akoŋ na wora kishi alegaiso nɛ basa na maŋ naa kɔ ajibi nɛ b ji.

⁴ Loŋ be kafɛ na to nɛ Babilɔn be benapo na daŋ bure kade na be egbal n luri kade na to, nɛ ewura Zɛdikaya nɛ mbe benapo shile m bɔla kabunabi nɛ k wɔ kade na be egbal anyɔ be kefɛato a mata bewura be kambɔl na n sɔ Jɔɔdan be lɔr na be ketaŋɛ to be kaba so.

⁵ Ndoŋ nna nɛ Babilɔn be benapo ju bumo n ya pɛ ewura Zɛdikaya a mata keplasawule nɛ k mata kade nɛ baa tre Jɛriko na, nɛ mbe benapo kikɛ pesaŋ to nseŋ shile ŋ ka mo.

⁶ Kumo be kaman nɛ b keta ewura Zɛdikaya n yɔ ewura Nebukadneeza kutɔ ashi kadegboŋ nɛ baa tre Ribla na nɛ ewura Nebukadneeza ji mo demu ŋ kaŋɛ fanɛ e wora n jija.

⁷ Ndoŋ nna nɛ Nebukadneeza shin nɛ b mɔ ewura Zɛdikaya be mbinyɛnsobi nɛ e yil a keni. Kumo be kaman nɛ ewura Nebukadneeza shin nɛ b chule ewura Zɛdikaya be anishi nseŋ chɛ mo ŋgbɛlɛbi n ta mo n yɔ Babilɔn be efuli so n ya ti ebu.

B ka bure bɔrɛlambu na be asheŋ

⁸ Ewura Nebukadneeza ka ji Babilɔn be efuli so be kuwura be kafɛ kudu akpanusopo to be kufɔl nusopo to be kachɛ shunusopo na nɛ Nebuzaradan nɛ e la ewura be asoetojipo nɛ benapo nɛ baa kuŋ ewura na be enimu na ba Jerusalɛm to,

⁹ m ba chɔɔ bɔrɛlambu na nɛ ewurkpa nɛ Jerusalɛm to be basa nɛ bumo be atre dii na be nwu kikɛ.

¹⁰ Kumo be kaman nɛ Nebuzaradan be benapo na da egbalana nɛ a kulti kadegboŋ na n lɛ,

¹¹ nseŋ keta betirpo nɛ basa nɛ b nyi enɔ to be ashuŋ na nɛ bumo nɛ b daŋ shuli n sa mo nseŋ kraa wɔ Jerusalɛm to na kikɛ n yɔ Babilɔn be efuli so.

¹² Ama e daŋ yige betirpo gbagba nɛ b maŋ kɔ kapetɛ kikɛ na bre nna ashi Juda be efuli so nɛ b baa shuŋ ndibi sɔrso nɛ adɔjibi be adɔana to.

¹³ Babilɔn be benapo na daŋ bɛa danyaŋ be eshabɔrɛ nɛ eturko nɛ danyaŋ be katishaŋgboŋ nɛ baa tre Teku nɛ k daa wɔ bɔrɛlambu na to na to nna nseŋ lara amo be danyaŋ na kikɛ n yɔ Babilɔn.

¹⁴ Benapo na daŋ ta danyaŋ be shabɔl nɛ asɔ nɛ b kɔ a muu nsunɔ nɛ asɔ nɛ b kɔ a lɔŋɛ bɔrɛsure na so na nɛ asɔ nɛ b kɔ a duŋ efitila na nɛ ntishaŋ nɛ baa ta a suse asɔbɔya nɛ baa mɔ a lara sarga na be ŋklaŋ nɛ eduwu be echeenshi nɛ danyaŋ be asɔ wurbi nɛ baa ta a shuŋ bɔrɛlambu na to na kikɛ.

¹⁵ B daŋ ta asɔ kama nɛ b daŋ ta shuwa nɛ gbiti n lɔŋɛ na kikɛ nna n yɔ.

¹⁶ Danyaŋ be asɔ nɛ ewura Sɔlɔmɔn daŋ ta n lɔŋɛ bɔrɛlambu na be eshabɔrɛ na nɛ atɔl na nɛ katishaŋgboŋ na daa wɔ egbɛ nna ga nɛ b maŋ tiŋ ŋ karga amo be egbɛ.

¹⁷ Eshabɔrɛ anyɔ na be kekama be jeŋgreŋ daa sa fanɛ ayadra adunyɔ nɛ ashunu nna nɛ b ta danyaŋ n lɔŋɛ nwuro nɛ amo be jeŋgreŋ sa fanɛ ayadra ashunu nɛ bargato m buu amo be kekama so. Kumo be kaman nɛ b wora danyaŋ be asɔ ko nɛ a du fanɛ ŋgbɛlɛbi m mɛa abar n deŋi nwuro na be esoso, nseŋ wora asɔ kulkulsobi ko nɛ a du fanɛ asɔrso nɛ baa tre pomegranates na n deŋi eshabɔrɛ na be kekama be esoso n ji amo kebita.

B ka yɛr Juda be basa Babilɔn be asheŋ

¹⁸ Ade be kaman nɛ benapo be enimu Nebuzaradan naŋ pɛ bɔrɛmatapo nimuso Seraiya nɛ Zefanaiya nɛ e bɛ mo so na, nɛ bɔrɛlambu na to be benimu asa ko gba n ti so.

¹⁹ Kumo be kaman nɛ e pɛ benapo be enimu ko nɛ ewura na be asoetojipoana na be benu nɛ enimu nɛ e bee nite efuli na so a koli basa a yɔ kena to na nɛ benapo adeshe nɛ b kraa wɔ kadegboŋ na to na.

²⁰ Kumo be kaman nɛ Nebuzaradan keta bumo n yɔ Babilɔn be ewura kutɔ ashi Ribla,

²¹ nɛ k mata Hamaf na, nɛ ewura Nebukadneeza shin nɛ b bri bumo nseŋ mɔ bumo ndoŋ. Juda be basa daŋ maŋ naa wɔ bumo gbagba be efuli so ŋkpal b ka pɛ bumo n yɔ kenyaya to ashi efuli wɔfɔ so.

Juda be ewura Gedaliya be asheŋ

²² Babilɔn be ewura Nebukadneeza daŋ shin nna nɛ Ahikam pibinyɛn Gedaliya nɛ mo nananyɛn daa la Shafan na ki Juda be efuli so be gomena nseŋ shin nɛ e bee keni basa gbrɛbi nɛ b ka ndoŋ na so.

²³ Nataniya Pibinyɛn Ishmaɛl nɛ Kariya pibinyɛn Johanan nɛ Tanhumɛf pibinyɛn Sɛriya nɛ b la Juda be efuli so be benapo be benimu n shin shile ŋ ŋana a maŋ bɛ Babilɔnebi na so n yɔ na ka nu loŋ na nɛ n shi Netofa be kade to n yɔ Gedaliya kutɔ ashi Mizpa.

²⁴ Ndoŋ nna nɛ Gedaliya leŋ bumo to ŋ kaŋɛ le: “Ma e kaŋɛ menyi na fanɛ men sa maa ŋana Babilɔn be efuli so be benapo na. Menyeeŋ tiŋ n chena nfe nsaa shuŋ Babilɔn be efuli so be ewura na nɛ asheŋ e baa nite nɛnɛ a sa menyi.”

²⁵ Kumo be kufɔl shunusopo to nɛ Ishmaɛl nɛ e la Netaniya pibinyɛn nɛ Ɛlshama mo nanabi nseŋ shi kuwurji be kanaŋ to na nɛ basa kudu ko yɔ Mizpa n ya mɔ Gɛdaliya nɛ mbe benimu nɛ b shi Juda nɛ Babilɔn na kikɛ. Ishmaɛl daŋ mɔ Israɛlebi nɛ Babilɔnebi be benapo nɛ b daa wɔ Gedaliya kutɔ ashi Mizpa ndoŋ na nna n ti so.

²⁶ Ndoŋ nna nɛ Israɛlebi na be bumo nɛ b la damawuraana nɛ betirpo kikɛ nɛ benapo be benimu na kikɛ shile n yɔ Ijipt be efuli so ŋkpal b ka daa ŋana Babilɔnebi na so.

B ka lara ewura Jehowachin kabuti to be asheŋ

²⁷ Kufɔl kuduanyɔsopo be nchɛ adunyɔ nɛ ashunu to be kafɛ nɛ Evilmɛrodak ji Babilɔn be kuwura na b daŋ wu Juda be ewura Jehowachin nɛ b daŋ ti ebu nfɛ adesa nɛ ashunu kikɛ na kuwɔr nna nseŋ shin nɛ b lara mo kabuti to.

²⁸ Ewura Evilmɛrodak daŋ shu Juda be ewura Jehowachin so n wora mo kelela nseŋ sa mo bunyaŋ a chɔ bewura kama nɛ b pɛ m ba Babilɔn be efuli so na kikɛ.

²⁹ E daŋ sa ewura Jehowachin ekpa nna nɛ e maŋ naa buu kabuti to be asɔbuuso nsaa buu amo nɛ e bee sha. Mo alɛ nɛ Babilɔn be ewura daa chena mbe ejikpa nna a ji karechɛ kikɛ.

³⁰ Ewura Jehowachin ka chena Babilɔn be efuli so ndoŋ hale n ya fo kachɛ nɛ e wu, Babilɔn be ewura daa sa mo amansherbi jiso nna karechɛ kikɛ.