2 Bewura 24 - EBƆRƐ BE KAWƆL

¹ Jemanɛ nɛ Jehowakim bee ji Juda be kuwura na nɛ Babilɔn be ewura Nebukadneeza ba kɔ n sɔ Juda nseŋ tintiŋ Jehowakim nɛ e shuŋ mo nfɛ asa. Kumo be kaman nɛ Jehowakim kini fanɛ e maaŋ naŋ nu n sa Nebukadneeza.

² Ndoŋ nna nɛ Enyɛnpe Ebɔrɛ shin nɛ Babilɔn nɛ Siriya nɛ Mowab nɛ Ammɔn be benapo be ntuŋ nɛ baa ta kena a purgi na ya kɔ Jehowakim kena nseŋ jija Juda be efuli kikɛ fanɛ kananɛ e daŋ bɔla mbe nyɛrbi anebiana so ŋ kaŋɛ fanɛ e beeŋ mur Juda na.

³ Asheŋ ere daŋ wora nna ŋkpal ewura Manase be alubi damta nɛ e daŋ wora ŋ gbiti Enyɛnpe Ebɔrɛ na nseŋ shin nɛ basa damta wu nɛ

⁴ Enyɛnpe Ebɔrɛ daa maŋ ta m paŋ mo na so.

⁵ B daŋ sibɛ asɔ kama nɛ ewura Jehowakim daŋ wora kikɛ n wɔtɔ Juda be bewura be adrasheŋ be nwɔl to nna.

⁶ Ewura Jehowakim ka wu, mo pibinyɛn Jehowachin e daŋ sɔ mo so n ji kuwura.

⁷ Babilɔn be ewura daŋ kɔ m pɔɔ Ijipt be ewura Neeko so nna nseŋ sɔ kasawule nɛ k yili Yufreetes be lɔrgboŋ na n ya fo Ijipt be kelargato to be esoso be kaba so na nna, amoso Ijipt be ewura nɛ mbe benapo daa maŋ naŋ lar Ijipt n ya kɔ Juda kena kikɛ.

Juda be ewura Jehowachin be asheŋ

⁸ Jehowachin daa la nfɛ kuduaburwa nna pɔɛŋ nseŋ ki Juda be ewura, mo alɛ daŋ ji kuwura Jerusalɛm to afɔl asa nna. Mo nio e daa la Nehushtan nɛ e la Elnatan nɛ e shi Jerusalɛm na pibiche.

⁹ Jehowachin gba daŋ bɛ mo tuto be aya so nna nseŋ wora kulubi ŋ gbiti Enyɛnpe Ebɔrɛ na.

¹⁰ Jehowachin be kuwurji be jemanɛ so nɛ ewura Nebukadneeza nɛ mbe benapo ya kɔ Jerusalɛm kena.

¹¹ Saŋɛ nɛ ewura Nebukadneeza be benapo kulti Jerusalɛm n wɔtɔ na nɛ mo gbagba ba kade na to,

¹² nɛ ewura Jehowachin nɛ mo nio nɛ mbe mbinyɛnsobiana nɛ mbe ekrachiana nɛ ewurkpa be benimuana na kikɛ tuba n ta bumo be amu n sa Babilɔnebi na. Nebukadneeza be kuwurji be kafɛ burwasopo to nɛ e pɛ ewura Jehowachin n ya ti ebu,

¹³ nseŋ muu bɔrɛlambu na to nɛ ewurape be yawukpakpaso be asɔ nɛ a wɔ amo to nɛ shuwa be ntishaŋ nɛ ewura Sɔlɔmɔn daŋ shin nɛ b lɔŋɛ na kikɛ nna n yɔ Babilɔn fanɛ kananɛ Enyɛnpe Ebɔrɛ daŋ kaŋɛ na gbagba.

¹⁴ E daŋ shin nna nɛ b pɛ Jerusalɛm be basa nɛ b shi ewurkpa nɛ bewurbi nɛ benapo be benimu nɛ basa nɛ b kɔ enɔ to be ashuŋ be kenyi nɛ ebɔyɛpo, nɛ bumo kikɛ yili basa ŋgboŋ kudu, n yɔ Babilɔn be efuli wɔfɔ na. Betirpo nawule nɛ b daŋ yige Juda be efuli so.

¹⁵ Nebukadneeza daŋ shin nna nɛ b pɛ ewura Jehowachin nɛ mo nio nɛ mbe beche nɛ mbe benimuana nɛ Juda be efuli so be bejuŋkparpoana kikɛ n yɔ Babilɔn n ya ti ebu.

¹⁶ Ewura Nebukadneeza daŋ pɛ benapo ŋgboŋ ashunu nɛ basa nɛ b kɔ enɔ to be kushuŋ be kenyi kagboŋ nɛ bekama nɛ b fo kena to be keyɔ n yɛr bumo kikɛ Babilɔn.

¹⁷ Ewura Nebukadneeza daŋ shin nna nɛ Jehowachin mo wɔpa Mataniya ki Juda be ewura nɛ e chɛrga mbe ketre ŋ ki Zɛdikaya.

¹⁸ Zɛdikaya daa la nfɛ adunyɔ nɛ kako nna nseŋ ki Juda be efuli so be ewura. Nfɛ kudukako nɛ e daŋ ji kuwura na ashi Jerusalɛm to. Mo nio e daa la Hamutal nɛ e la Jɛremaya nɛ e shi Libna be kade to na pibiche.

¹⁹ Ewura Zɛdikaya gba daŋ wora kulubi n da Enyɛnpe Ebɔrɛ so nna fanɛ kananɛ ewura Jehowakim daŋ wora na.

²⁰ Ewura Zɛdikaya daŋ wora kusoe kpakpaso nna nseŋ kini kenu n sa Babilɔn be ewura Nebukadneeza. Enyɛnpe Ebɔrɛ na malɛ daŋ nya agbo ga nna n wɔtɔ Juda nɛ Jerusalɛm be basa nseŋ pal kaman n sa bumo. Amoso nɛ asheŋ lubi bee tu bumo na.