2 Bewura 23 - EBƆRƐ BE KAWƆL

Josaya ka ju kagbirshuŋ ashi Israɛl be asheŋ

¹ Ewura Josaya daŋ tre Juda nɛ Jerusalɛm be bejuŋkparpo kikɛ m ba abar so

² nɛ mo nɛ bumo nɛ bɔrɛmatapoana na nɛ anebiana na nɛ damawuraana nɛ betirpo kikɛ yɔ bɔrɛlambu na to. Ndoŋ nna na nɛ ewura na kraŋ Ebɔrɛ be mbra be kawɔl nɛ b daŋ wu bɔrɛlambu na to na kikɛ bumo kikɛ be anishito.

³ Kumo be kaman nɛ e yili shabɔrɛ na be kakpa nɛ bewura bee chena na n nase kɔnɔ n sa Enyɛnpe Ebɔrɛ na fanɛ e beeŋ bugi mbe kagbene kikɛ n wora kasonu n sa mo nseŋ bɛ mbe mbra nɛ asheŋ nɛ e yili n sa bumo na, kɔnɔ naseso be ŋkre be asheŋ nɛ b sibɛ n wɔtɔ kawɔl na to na kikɛ so.

⁴ Ewura Josaya daŋ shin nna nɛ bɔrɛmatapo nimuso Hilkiya nɛ bɔrɛmatapoana nɛ b bɛ mbe kaman na nɛ bekumpo nɛ baa kuŋ bɔrɛlambu na be kabuna na lara asɔ nɛ b kɔ a shuŋ Baal be kegbir na nɛ kegbirche Ashira nɛ achɛkpabi na ashi bɔrɛlambu na to. E daŋ shin nna nɛ b ta asɔ na kikɛ n lar kade na be ekarso a mata Kidrɔn be ketaŋɛ na ase n ya chɔɔ amo nseŋ ta amo be nsunɔ n yɔ Bɛtɛl.

⁵ E daŋ ju agbirwuraana nɛ Juda be bewura daŋ lara fanɛ b baa lara esarga a deŋi nnyamase be ebɔrɛsureana so ashi Juda be efuli so be nde to nɛ nde nɛ a mata Jerusalɛm na nna. Loŋ be agbirwuraana na e daa lara esarga a sa Baal be kegbir na nɛ epeŋi nɛ kufɔl nɛ achɛkpabi be yiri to kikɛ.

⁶ E daŋ lara kegbirche Ashira be kapɔrduli na Enyɛnpe Ebɔrɛ be bɔrɛlambu na to nna n ta kumo n lar kade na to yɔ Kidrɔn be ketaŋɛ na to n ya chɔɔ kumo nseŋ bɛa kumo to nɛ k ki fanɛ nyifu nɛ e ta amo n lɛ basa be nchaŋana so.

⁷ E daŋ bure esakalenyɛn be ebuana nɛ a mata bɔrɛlambu na nna. Ndoŋ nɛ beche bee chena a lue ewajɛ nɛ baa ta a buu a shuŋ Ashira be kegbir na.

⁸ E daŋ shin nna nɛ bɔrɛmatapoana nɛ b wɔ Juda na kikɛ ba Jerusalɛm nɛ e bɔla daŋkare be ekpa so n jija bumo be ebɔrɛsure nɛ baa lara esarga amo so na. E daŋ bure ebɔrɛsure nɛ baa lara esarga amo so a sa kaboe be kiyoyu lubi nɛ k wɔ a mata kabuna nɛ kade na be gomena Joshuwa pɔr na nna.

⁹ B daa maŋ sa loŋ be bɔrɛmatapoana na ekpa fanɛ b baa shuŋ bɔrɛlambu na to, ama b daa kɔ ekpa bre nɛ bumo nɛ bumo braana bɔrɛmatapoana e ji bodobodo nɛ a maŋ kɔ yiisi na kɔnɔkoŋwuleso.

¹⁰ Ewura Josaya daŋ bɔla daŋkare be ekpa so nna n jija Tofɛf nɛ k wɔ Bɛnhinnɔm be ketaŋɛ to be bɔrɛsure na, saŋɛ na so b maaŋ naa ta bumo be bibinyɛn ŋko bibiche a lara sarga a sa Mɔlɛk be kegbir na.

¹¹ E daŋ lara egbaŋɛ nɛ Juda be bewura ta m bɔɔ epeŋi enɔ na nna ashi Enyɛnpe Ebɔrɛ be bɔrɛlambu na be kabuna to. B daa wɔ kelɔnɛ nɛ k mata enimu nɛ baa tre Neetan Mɛlɛk na be ebu na ase nna. Ewura Josaya daŋ chɔɔ egbaŋɛturko nɛ b ta m bɔɔ epeŋi enɔ na nna.

¹² Ewura Josaya daŋ bure ebɔrɛsure nɛ ewura Manase daŋ pɔr n yili bɔrɛlambu be alɔnɛ anyɔ na so nɛ ebɔrɛsure nɛ Juda be efuli so be bewura daŋ pɔr n yili ewura Ahaz be ewurkpa be ebu be esoso na kikɛ nna nseŋ bɛa amo to kpachɛrkpachɛrbi n ta amo n ya lɛ Kidrɔn be ketaŋɛ na to.

¹³ Ewura Josaya daŋ bɔla daŋkare be ekpa so nna n jija ebɔrɛsure nɛ ewura Sɔlɔmɔn daŋ pɔr Jerusalɛm be epeŋilarkpa be kaba so nɛ kebee nɛ baa tre Ɔlifs na be kelargato be kaseto be kaba so nɛ baa shuŋ kegbirche Ashira nɛ k wɔ Sidɔn be kade to na nɛ kegbir nɛ baa tre Chemɔsh nɛ k wɔ Mowab na nɛ kegbir nɛ baa tre Mɔlɛk nɛ k wɔ Ammɔn nɛ a la asɔ fuloŋ na.

¹⁴ Ewura Josaya daŋ bure agbir jembu na to nna kpachɛrkpachɛrbi nseŋ ku kegbirche Ashira be kapɔrduli na n lɛ nseŋ ta edimɛdi be awibi n fari kaboŋ nɛ a daa yili na be kaplɛkama.

¹⁵ Ewura Josaya daŋ bure Nebat pibinyɛn ewura Jeroboam be kagbirshuŋ be mboŋ nɛ e daŋ pɔr n yili Bɛtɛl nɛ a shin nɛ Israɛlebi luri kulubi to na nna. E daŋ da bɔrɛsure na nna n lɛ m bure kumo be ajembu to kpachɛrkpachɛrbi ŋ kɔr amo to nɛ a ki fanɛ shishɛr. Kumo be kaman nɛ e chɔ kegbirche Ashira be kapɔrduli na gba.

¹⁶ Ewura Josaya ka keni ŋ kulti nseŋ wu nchaŋana ka wɔ kebee so, nɛ e shin nɛ b lara awibi nɛ a wɔ amo to na n ya deŋi bɔrɛsure na so n chɔɔ. Saŋɛ na so bɔrɛsure na beeŋ wora eyurpi daŋkare be ekpa so nɛ kusɔ nɛ Ebɔrɛ be anebi kaŋɛ dra dra saŋɛ so nɛ ewura Jeroboam daa yil bɔrɛsure na ase na e bɔlɔ so. Josaya ka naŋ keni nɛ e wu anebi nɛ e daŋ wu loŋ be asheŋ ŋ kaŋɛ na be nchaŋ.

¹⁷ Ndoŋ nna nɛ e bishi: “Wanɛ be nchaŋ nde?” Nɛ Bɛtɛl be basa na kaŋɛ: “Anebi nɛ e daŋ shi Juda m ba nfe m ba wu ŋ kaŋɛ kusɔ nɛ k beeŋ wora bɔrɛsure na be nchaŋ nna.”

¹⁸ Nɛ ewura Josaya kaŋɛ bumo: “Men yige kumo boeŋ. Men sa maŋ kaŋ kur n lara mbe awibi.” Amoso b daa maŋ kur n lara mbe awibi. B daa maŋ kur anebi ko nɛ mo alɛ gba daŋ shi Israɛl m ba wu nɛ b puli mo ndoŋ na gba be awibi.

¹⁹ Ewura Josaya daŋ jija agbir be mboŋ nɛ Israɛl be bewura daŋ lɔŋɛ n yili Israɛl be efuli so be nde to nɛ a kaa Enyɛnpe Ebɔrɛ agbo na kikɛ nna fanɛ kananɛ e daŋ wora Bɛtɛl na gbagba.

²⁰ E daŋ mɔ agbirwuraana na nna n deŋi kakpa nɛ baa shuŋ agbir na be ebɔrɛsureana so, nseŋ chɔɔ edimɛdi be awibi n deŋi bɔrɛsure kikɛ so. Kumo be kaman nɛ e bɛta n yɔ Jerusalɛm.

Ewura Josaya ka ji kebansonchoŋ be kejigboŋ na be asheŋ

²¹ Ewura Josaya daŋ kaŋɛ Juda be efuli so ebi na nna fanɛ b baa ji kebansonchoŋ be kejigboŋ na nsaa maŋkura bumo Nyɛnpe bumo be Ebɔrɛ na fanɛ kananɛ mbra be kawɔl kaŋɛ na gbagba chap.

²² Baŋ yili saŋɛ so nɛ bewura daa maŋ wɔtɔ, nɛ demujipoana daa juŋkpar na m ba fo Israɛl nɛ Juda be bewura be jemanɛ so kikɛ, basa daŋ maŋ naŋ shɛr alegaiso n ji kebansonchoŋ be kejigboŋ loŋ kikɛ.

²³ Josaya ka ji kuwura be kafɛ kuduaburwasopo to nɛ b daŋ ji le be kebansonchoŋ be kejigboŋ ere ashi Jerusalɛm to.

²⁴ Ewura Josaya ka daa sha nɛ e bɛ mbra be kawɔl nɛ anebi Hilkiya wu Enyɛnpe Ebɔrɛ be bɔrɛlambu na to na be mmalga so so, e daŋ lara bekpalpo nɛ ŋkilgiwuraana nɛ basa be elaŋ to be agbirana nɛ agbir kikɛ ashi Juda nɛ Jerusalɛm to nna.

²⁵ Bewura nɛ b juŋkpar Josaya nɛ bekama nɛ b bɛ mo so na be ekama daa maŋ bɛ Mosis be mbra na so kenishipereso fanɛ mo.

²⁶ Ama Enyɛnpe Ebɔrɛ na kraŋ nya agbo ga n wɔtɔ Juda ŋkpal asɔ damta nɛ ewura Manase wora nɛ mbe agbo kaa ga na so.

²⁷ Amoso le nɛ Enyɛnpe Ebɔrɛ na daŋ kaŋɛ: “Meeŋ wora Juda gba kusɔ nɛ n wora Israɛl na. Meeŋ ju Juda be basa ashi ma anishito nseŋ kini Jerusalɛm nɛ k la ma kade na nɛ bɔrɛlambu nɛ baa bunyaŋ ma kumo to ere.”

Ewura Josaya be kuwurji be lalaloge be asheŋ

²⁸ B sibɛ kusɔ kama nɛ ewura Josaya wora kikɛ n wɔtɔ Juda be bewura be adrasheŋ be nwɔl to.

²⁹ Ewura Josaya be kuwurji be jemanɛ so nɛ Ijipt be efuli so be ewura Neeko keta mbe benapo m bɔla kelargato be esoso be kaba so n yɔ Yufreetes be Lɔrgboŋ na ase nɛ e ya chɛ Asiriya be efuli to ŋ kɔ. Ndoŋ nna nɛ ewura Josaya keta mbe benapo n lar nɛ b ya kɔ ewura Neeko kena. B ka bee kɔ kena na ashi Majido nɛ b mɔ ewura Josaya ndoŋ.

³⁰ Ndoŋ nna nɛ mbe benimuana na ta mbe kebuni n wɔtɔ gbaŋɛturko to n yɔ Jerusalɛm n ya puli mo gbagba be nchaŋ nɛ e kur to. Kumo be kaman nɛ Juda be basa duga ŋku n wurge mo pibinyɛn Jehowahaz be kumu so n lara mo nɛ e ki Juda be ewura.

³¹ Jehowahaz daa la nfɛ adunyɔ nɛ asa nna pɔɛŋ nseŋ ji Juda be kuwura nseŋ ji kuwura afɔl asa ashi Jerusalɛm to. Mo nio e daa la Hamutal nɛ e la Jɛremaya nɛ e shi Libna na pibiche.

³² Kananɛ Jehowahaz mo nananyɛnana daŋ wora alubi ŋ gbiti Enyɛnpe Ebɔrɛ na gbagba chap nɛ mo alɛ gba daŋ wora.

³³ Ijipt be efuli so be ewura Neeko daŋ pɛ Jehowahaz nna n ya ti ebu ashi Ribla nɛ k mata Hamaf na nseŋ tintiŋ Judaebi nɛ b ka gbiti kilo ŋgboŋ asa nɛ alfa ana nɛ shuwa kilo adesa nɛ ana n sa mo.

³⁴ Ewura Neeko daŋ shin nɛ Josaya pibinyɛn Eliakim ki Juda be ewura nna nɛ e chɛrga mbe ketre ŋ ki Jehowakim. Ewura Neeko daŋ keta Jehowahaz bre nna n yɔ Ijipt be efuli so nɛ e ya wu ndoŋ.

Juda be ewura Jehowakim be asheŋ

³⁵ Ewura Jehowakim daŋ tintiŋ Judaebi na nna nɛ b ka lampo kananɛ ekama be eleŋ sa, saŋɛ na so e beeŋ tiŋ ŋ ka Ijipt be ewura Neeko be shuwa nɛ gbiti be kukɔ n sa mo.

³⁶ Jehowakim daa la nfɛ adunyɔ nɛ anu nna pɔɛŋ nseŋ ki Juda be ewura nseŋ ji kuwura Jerusalɛm to nfɛ kudukako. Mo nio e daa la Zɛdida nɛ e la Pɛdaya nɛ e shi Ruma be kade to na pibiche.

³⁷ Mo alɛ gba daŋ bɛ mo nananyɛnana be aya so nna n wora alubi ŋ gbiti Enyɛnpe Ebɔrɛ na.