2 Bewura 22 - EBƆRƐ BE KAWƆL

Juda be ewura Josaya be asheŋ

¹ Josaya daŋ ji nfɛ aburwa nna pɔɛŋ nseŋ ki Juda be ewura, mo alɛ daŋ ji kuwura Jerusalɛm to nfɛ adesa nɛ kako nna. Mo nio e daa la Jedida nɛ e la Adaya nɛ e shi Bozkaf na pibiche.

² E daa wora asheŋ nɛ a niŋi ashi Enyɛnpe Ebɔrɛ be anishito nna nsaa bɛ mo nananyɛn ewura Deevid be aya so nɛ Ebɔrɛ be mbra na kikɛ so dede.

³ Josaya ka ji kuwura be kafɛ kuduaburwasopo to nɛ e shuŋi mbe nwɔlsibɛpo Shafan nɛ e la Azaliya pibinyɛn nɛ mo nananyɛn malɛ la Mɛshulam na ŋ kaŋɛ le:

⁴ “Yɔ bɔrɛmatapo nimuso Hilkiya kutɔ ashi Enyɛnpe Ebɔrɛ be bɔrɛlambu na to n ya kaŋɛ mo fanɛ e wora amansherbi nɛ bɔrɛmatapoana nɛ baa keni bɔrɛlambu na be mbunaana so na sɔ basa na kutɔ na be shiriya.

⁵ Nseŋ kaŋɛ mo fanɛ e ta amansherbi na n sa benyɛn nɛ baa keni bɔrɛlambu na be kelɔnɛ be kushuŋ so na, nɛ bumo alɛ e ta amo n sa

⁶ ekapɛnta nɛ bepɔrpo na nɛ b tɔ ajembu nɛ ndibi n lɔŋɛ ebu na.

⁷ Basa nɛ baa keni kushuŋ na so na kikɛ bee ji kashenteŋ nna, amoso anyi maaŋ keni bumo be asheŋ to a laŋɛ amansherbi na be keji be kaplɛa so.”

⁸ Shafan ka lara kubɔya na n loge nɛ Hilkiya ta mbra be kawɔl na n sa mo nseŋ kaŋɛ le: “N wu mbra be kawɔl ere bɔrɛlambu to nna.” Ndoŋ nna nɛ Shafan kraŋ kawɔl na,

⁹ nseŋ yɔ ewura na kutɔ n ya kaŋɛ mo le: “Yiramu, an wora kusɔ kama nɛ fo kaŋɛ anyi na kikɛ. An ta amansherbi nɛ a wɔ bɔrɛlambu na to na n sa beshumpo na nɛ basa nɛ baa keni bumo so na.”

¹⁰ Kumo be kaman nɛ e naŋ kaŋɛ ewura na le: “Bɔrɛmatapo nimuso Hilkiya e ta kawɔl ere n sa ma.” Kumo be kaman nɛ e kraŋ kumo awɔrso ŋ ŋini ewura na.

¹¹ Ewura na ka nu kusɔ nɛ k wɔ mbra be kawɔl na to nɛ e kpɛa mbe asɔbuuso to kagbenejijaso,

¹² nseŋ tre Hilkiya nɛ Shafan nɛ Ahikam nɛ e la Shafan pibinyɛn na nɛ Akbɔ nɛ e la Mikaya pibinyɛn na n ta Asaya nɛ e la mo gbagba be kenya na m ba shɛr abar so epul to ŋ kaŋɛ bumo le:

¹³ “Enyɛnpe Ebɔrɛ na be agbo beeŋ baa wɔ ma nɛ ma basa kama nɛ b kraa wɔ Juda be efuli ere so so ga ŋkpal an nananyɛnana ka maŋ nu n sa mo nseŋ kini kewora kusɔ nɛ kawɔl ere bee ŋini fanɛ b wora na so. Amoso men ya bishi n fin kusɔ nɛ Enyɛnpe Ebɔrɛ na bee sha fanɛ an wora.”

¹⁴ Hilkiya nɛ Ahikam nɛ Akbɔ nɛ Shafan nɛ Asaya e daŋ yɔ anebiche nɛ baa tre Hulda nɛ e wɔ Jerusalɛm be kelargato be esoso be kaba so na kutɔ. Hulda mo kul Shallum nɛ e la Tikva pibinyɛn nsaa la Hahas mo nanabi na e daa keni epiŋi so ashi bɔrɛlambu na to. B daŋ kaŋɛ anebi na kusɔ nɛ k wora kikɛ nna,

¹⁵ nɛ e kaŋɛ bumo fanɛ b bɛta n yɔ ewura na kutɔ n ya kaŋɛ mo fanɛ,

¹⁶ kubɔya nɛ k shi Enyɛnpe Ebɔrɛ kutɔ nde. Ebɔrɛ yɛ: “Meeŋ gberge Jerusalɛm be basa kikɛ kusoe fanɛ kananɛ b kraŋ mbra be kawɔl na to ashi Juda be ewura be anishito na.

¹⁷ Ŋkpal manɛ so b ka kini ma nseŋ lara esarga n sa efuli pɔtɛana so be agbirana nɛ ma agbo kaa bumo so ga. Kusɔ nɛ b wora na so ma agbo maaŋ wushi kikɛ.

¹⁸ Ama kusɔ nɛ ma Enyɛnpe Israɛl be Ebɔrɛ na kɔ nɛ ŋ kaŋɛ ewura na bre nde. Mo ere nu kusɔ nɛ b sibɛ n wɔtɔ mbra be kawɔl na to,

¹⁹ nseŋ chɛrga mbe nfɛra m bar mbe kumu kaseto ŋ kpɛa mbe asɔbuuso to kagbenejijaso a shu ŋkpal ŋ ka kaŋɛ fanɛ meeŋ gberge Jerusalɛm be basa kusoe n shin nɛ k ki kakpa nɛ basa beeŋ baa lɔ kufu keyɔ nɛ kumo be ketre malɛ e ki kɔnɔsho n sa basa so. N nu mo ere be kabɔrɛkule,

²⁰ amoso kasogberge nɛ ŋ kɔ a ba Jerusalɛm be basa so na maaŋ ba, ama e wu kagbenewushiso nna pɔɛŋ.” Ndoŋ nna nɛ basa na ta kubɔya na n ya sa ewura Josaya.