2 Bewura 21 - EBƆRƐ BE KAWƆL

Juda be ewura Manase be asheŋ

¹ Manase daŋ ji nfɛ kuduanyɔ nna pɔɛŋ nseŋ ki Juda be ewura, nseŋ ji kuwura Jerusalɛm to nfɛ adunu nɛ anu. Mo nio e daa la Hefziba.

² Manase daŋ kini kenu n sa Enyɛnpe Ebɔrɛ nna nseŋ bɛ efuliana nɛ Enyɛnpe Ebɔrɛ ju kasawule na so, saŋɛ so nɛ e ta kasawule na n sa mbe basa Israɛlebi sososo na be asheŋ nɛ Ebɔrɛ kishi ga na so.

³ E daŋ lɔŋɛ m pɔr efuli pɔtɛana so be agbir nɛ mo tuto ewura Hɛzekaya daŋ mur na nna, nseŋ m pɔr ebɔrɛsure n sa Baal be kegbir na, nseŋ yuu kegbirche Ashira be mpɔrduli, nsaa shuŋ achɛkpabi gba.

⁴ E daŋ pɔr agbir be ebɔrɛsure ashi bɔrɛlambu nɛ Enyɛnpe Ebɔrɛ kaŋɛ fanɛ ndoŋ nɛ baaŋ baa shuŋ mo mbaanaayɔ na to nna.

⁵ E daŋ pɔr ebɔrɛsure ashi bɔrɛlambu na be alɔnɛ anyɔ na to nna nsaa shuŋ achɛkpabi.

⁶ E daŋ ta mo gbagba pibinyɛn nna n lara sarga chɔɔso ashi ketaŋɛ nɛ baa tre Hinnɔm na to. E daa wora kegbaya nɛ ŋkilgisheŋ nna nsaa yɔ belejipoana kutɔ n ya ka kpal nsaa shuŋ bubuni gba a ti so. E daŋ wora alubi damta nna ŋ gbiti Enyɛnpe Ebɔrɛ n shin nɛ mbe agbo kaa ga.

⁷ E daŋ ta kegbirche Ashira be kapɔrduli nna n yili bɔrɛlambu nɛ Ebɔrɛ malga kumo be asheŋ n sa ewura Deevid nɛ mo pibinyɛn ewura Sɔlɔmɔn na to. Ebɔrɛ yɛ: “Bɔrɛlambu ere ashi Jerusalɛm nɛ n lara ashi Israɛl be efuli so kikɛ fanɛ b baa bunyaŋ ma kumo to mbaanaayɔ.

⁸ Nɛ ma basa Israɛlebi beeŋ bɛ ma mbra nɛ ma keŋini nɛ ma kayɛrbi Mosis ta n sa bumo dra dra na so bre, kumo ere m maaŋ shin nɛ b ju bumo ashi kasawule nɛ n ta n sa bumo nananyɛnana na so.”

⁹ Ewura Manase daŋ shin nɛ Juda nɛ Jerusalɛm be basa wora alubi a chɔ amo nɛ efuliana nɛ Enyɛnpe Ebɔrɛ ju kasawule na so saŋɛ so nɛ mbe basa daa ba kumo so sososo na daa wora na nna.

¹⁰ Kachako nɛ Enyɛnpe Ebɔrɛ bɔla mbe nyɛrbi anebiana na so ŋ kaŋɛ le:

¹¹ “Ewura Manase be asheŋ nɛ e daŋ wora na daŋ lubi a chɔ kusɔ nɛ Keenanebi na daŋ wora gba. E daŋ shuŋ agbir nna nseŋ shin nɛ Juda be efuli so ebi gba luri kulubi to.

¹² Amoso ma Enyɛnpe Israɛl be Ebɔrɛ na beeŋ shin nɛ jɛrbi e ba Jerusalɛm to nɛ Juda be efuli so, nɛ k chinchiŋ esa kama nɛ e beeŋ nu kumo be asheŋ ga.

¹³ Kananɛ n daŋ gberge Samɛria be efuli so be basa nɛ Israɛl be ewura Ahab nɛ mbe kaman to ebi kusoe na, loŋ gbagba chap nɛ meeŋ gberge Jerusalɛm be basa gba kusoe. Meeŋ shin nɛ Jerusalɛm e naŋ ki kasawule fuloŋ a dese fanɛ kananɛ k daa du dra na.

¹⁴ Meeŋ kplaŋ basa nɛ b maŋ wu na so nseŋ shin nɛ bumo doŋana e kɔ m pɔɔ bumo so m muu bumo be kasawule na so be asɔ kikɛ.

¹⁵ Ŋkpal manɛ so ma basa Israɛlebi wora alubi ŋ gbiti ma nseŋ wɔtɔ ma agbo to yili saŋɛ nɛ bumo nananyɛnana lar Ijipt m ba fo kabre.”

¹⁶ Ewura Manase daŋ mɔ basa damta nɛ b maŋ wora shɛŋ nna nɛ bumo be ŋklaŋ teŋi n sɔ Jerusalɛm be kubɔrbi so kikɛ. Ade kikɛ be kaman nɛ e naŋ shin nɛ Juda be efuli so be basa gba luri kagbirshuŋ to nseŋ wora kulubi ŋ gbiti Enyɛnpe Ebɔrɛ na.

¹⁷ B sibɛ kusɔ kama nɛ ewura Manase wora, n ta mbe asheŋ lubi kikɛ n ti so nɛ e daŋ wora na kikɛ n wɔtɔ Juda be bewura be adrasheŋ be nwɔl na to.

¹⁸ Ewura Manase ka wu, ewurkpa be kakpa nɛ baa tre Uzza be kambɔl na to nɛ b puli mo nɛ mo pibinyɛn Ammɔn sɔ mo so n ji kuwura.

Juda be ewura Ammɔn be asheŋ

¹⁹ Ammɔn daa la nfɛ adunyɔ nɛ anyɔ nna pɔɛŋ nseŋ ki Juda be ewura, mo alɛ nseŋ ji kuwura Jerusalɛm to nfɛ anyɔ. Mo nio e daa la Mɛshullemif nɛ mo alɛ mo nio la Haruz nɛ e shi Jotba be kade to na.

²⁰ E daŋ wora alubi nna ŋ gbiti Enyɛnpe Ebɔrɛ fanɛ kananɛ mo tuto ewura Manase daŋ wora na gbagba.

²¹ Kusɔ nɛ mo tuto daŋ wora na gbagba chap nɛ mo alɛ gba daŋ wora. E daŋ shuŋ agbir nɛ mo tuto Manase gba daŋ shuŋ na nna.

²² E daŋ kini Enyɛnpe nɛ e la mo nananyɛnana be Ebɔrɛ na nna nsaa maŋ wora kasonu n sa mbe mbra.

²³ Ammɔn be benimuana daŋ we n wɔtɔ abar nna nseŋ ya mɔ mo ashi ewura be laŋ to.

²⁴ Ndoŋ nna nɛ Juda be basa malɛ ya mɔ basa nɛ b mɔ ewura Ammɔn na nseŋ ta mo pibinyɛn Josaya ŋ ki ewura.

²⁵ B sibɛ kusɔ kama nɛ Ammɔn daŋ wora kikɛ n wɔtɔ Juda be bewura be adrasheŋ be nwɔl to.

²⁶ Uzza be kambɔl na to nɛ b daŋ puli ewura Ammɔn nɛ mo pibinyɛn Josaya sɔ mo so n ji kuwura.