2 Bewura 20 - EBƆRƐ BE KAWƆL

Ewura Hɛzekaya ka nya alenfia be asheŋ

¹ Jemanɛ ko nɛ kulɔ pɛ ewura Hɛzekaya nɛ a ka gbrɛ nɛ e wu. Ndoŋ nna nɛ Amɔz pibinyɛn anebi Aizaaya yɔ nɛ e ya bɔ mo so nseŋ kaŋɛ mo le: “Enyɛnpe Ebɔrɛ yɛ fo bela ase n lɔŋɛ fo kusɔ kama n yili nɛnɛ, ŋkpal manɛ so, fo maaŋ naŋ nya alenfia. Bela ase a jo luwu.”

² Ewura Hɛzekaya ka nu loŋ, nɛ e kilgi mbe anishito n shoŋi egbal nseŋ kule Ebɔrɛ ŋ kaŋɛ:

³ “Enyɛnpe Ebɔrɛ, baa nyiŋi kananɛ n shuŋ fo kashenteŋto nɛ kagbene koŋwule so. Ma alɛ wora ania fanɛ meeŋ wora kusɔ kama nɛ fee sha fanɛ n wora.” Kumo be kaman nɛ e shu ga.

⁴ Anebi Aizaaya ka lar ewura na be laŋ to a yɔ, nɛ a ka gbrɛbi nɛ e choŋ ewurkpa be kelɔnɛ na so na, nɛ Enyɛnpe Ebɔrɛ kaŋɛ mo

⁵ fanɛ e naŋ bɛta n yɔ ewura Hɛzekaya kutɔ n ya kaŋɛ mo le: “Ma, Enyɛnpe, fo nananyɛn ewura Deevid be Ebɔrɛ na, nu fo kabɔrɛkule nseŋ wu fo anishichubi na. Nchɛ asa be kefɛato, meeŋ chɛ fo nseŋ shin nɛ fo naŋ bɛta n yɔ bɔrɛlambu na to.

⁶ Meeŋ naŋ shin nɛ fo ji nfɛ kuduanu n ti so. Ma alɛ beeŋ kuŋ fo nɛ Jerusalɛm be kadegboŋ ere ashi Asiriya be ewurgboŋ na be enɔ to, ŋkpal ŋ gbagba be kemaŋkura nɛ kɔnɔ nɛ n nase n sa ma kayɛrbi ewura Deevid so.”

⁷ Pɔɛŋ nɛ ewura Hɛzekaya nya alenfia nseŋ boŋ kashɛ na, anebi Aizaaya daŋ kaŋɛ mo nna fanɛ e shin nɛ b kɔr kedibi nɛ baa tre figi na be afantaŋ m mata mbe kechuu bɔbɔ na so nɛ e nya alenfia.

⁸ Kumo be kaman nɛ ewura Hɛzekaya bishi: “Manɛ e naŋ ŋini fanɛ Enyɛnpe Ebɔrɛ beeŋ chɛ ma nɛ n tiŋ n yɔ mbe bɔrɛlambu to n ya shuŋ mo nchɛ asa be kefɛato?”

⁹ Ndoŋ nna nɛ anebi Aizaaya kaŋɛ: “Enyɛnpe Ebɔrɛ beeŋ lara tɔɔnɛ be kesheŋ ko ŋ ŋini nɛ fo pin fanɛ e maa kplaŋ mbe kɔnɔ naseso so. Feeŋ baa sha epeŋi be kiyoyu nɛ k wɔ atemprembi so ere ka firgi m bɛta kaman ayadra kudu nna ŋko k ka firgi n yɔ anishito ayadra kudu?”

¹⁰ Ndoŋ nna nɛ Hɛzekaya malɛ kaŋɛ: “Keshin nɛ kiyoyu e baa yɔ anishito du pɔtɔ pɔtɔ a chɔ keshin nɛ k baa yɔ kamanto. Amoso shin nɛ k bɛta kaman.”

¹¹ Ndoŋ nna nɛ Aizaaya kule Enyɛnpe Ebɔrɛ nɛ e shin nɛ kiyoyul na bɛta n yɔ kaman ayadra kudu ashi ewura Ahaz be ebu be ketempreŋ so.

Babilɔn be efuli so be mbɔ be asheŋ

¹² Merodak Baladan nɛ e la Baladan pibinyɛn nseŋ daa la efuli nɛ baa tre Babilɔn na be ewura ka daŋ nu fanɛ ewura Hɛzekaya daŋ lɔ nseŋ nya alenfia nɛ e shuŋi mbɔ nɛ b ta kawɔl nɛ kakɛ n ya sa mo.

¹³ Nɛ ewura Hɛzekaya wora mbɔ na maraba nseŋ ŋini bumo mbe shuwa nɛ gbiti nɛ eposɔ nɛ e bee wora epo a bel na nɛ ɔlif be ŋku lela nɛ etulale nɛ mbe benapo be akɔsɔ kikɛ. Shɛŋ daŋ maŋ naŋ ka ashi mbe ewurkpa ŋko mbe efuli na kikɛ so nɛ e maŋ ta ŋ ŋini mbɔ na.

¹⁴ Ndoŋ nna nɛ anebi Aizaaya yɔ ewura Hɛzekaya kutɔ n ya bishi mo: “Nnɛ nɛ basa ere shi m ba nfe; nɛ manɛ nɛ b kaŋɛ fo?” Nɛ Hɛzekaya kaŋɛ: “B shi efuli wɔfɔ ko nɛ baa tre kumo Babilɔn na nna.”

¹⁵ Nɛ Aizaaya naŋ bishi mo le: “Nɛ manɛ nɛ b wu ewurkpa nfe?” Nɛ ewura na kaŋɛ: “B wu kusɔ kama nɛ k wɔ nfe. Shɛŋ maŋ naŋ ka a wɔ nfe nɛ m maŋ ta ŋ ŋini bumo.”

¹⁶ Ndoŋ nna nɛ Aizaaya kaŋɛ ewura na: “Enyɛnpetale Ebɔrɛ na gbagba e kaŋɛ fanɛ

¹⁷ jemanɛ ko bee ba nɛ asɔ kama nɛ a wɔ ewurkpa nɛ fo nananyɛnana fin n yili hale m ba fo kabre na kikɛ, baaŋ ba sulɔ amo kikɛ n yɔ Babilɔn be efuli so nɛ shɛŋ shɛŋ maaŋ naŋ ka a wɔ nfe!

¹⁸ Baaŋ pɛ fo gbagba be mbinyɛnsobi ko n ya fɛl bumo nɛ b baa shuŋ Babilɔn be ewura be lambu to.”

¹⁹ Ewura Hɛzekaya bre daŋ fɛ nna fanɛ mo ere be jemanɛ to kayurwushi beeŋ baa wɔ efuli na so, amoso le nɛ e kaŋɛ: “Kubɔya nɛ fo ta n shi Enyɛnpe Ebɔrɛ kutɔ m ba sa ma ere walɛ.”

Hɛzekaya be kuwurji be ekar be asheŋ

²⁰ B daŋ sibɛ Hɛzekaya be kenyɛn nɛ e daŋ ji nɛ kananɛ e shin nɛ b gberge nchu m ba kadegboŋ na to be asheŋ kikɛ nna n wɔtɔ Juda be bewura be adrasheŋ be nwɔl to.

²¹ Ewura Hɛzekaya ka wu, mo pibinyɛn Manase a sɔ mo so n ji kuwura.