2 Bewura 19 - EBƆRƐ BE KAWƆL

Ewura na ka bee fin kasotoji Aizaaya kutɔ be asheŋ

¹ Ewura Hɛzekaya ka nu kubɔya nɛ Asiriya be benapo be enimu kaŋɛ na, nɛ mbe kagbene jija mo ga nɛ e kpɛa mbe asɔbuuso to nseŋ ta kagbenejijaso be asɔbuuso m buu n yɔ Enyɛnpe Ebɔrɛ na be bɔrɛlambu to.

² Kumo be kaman nɛ e shuŋi Eliakim nɛ e bee keni ewurkpa so na nɛ Shɛbna nɛ e la ewura be esibɛpo nɛ bɔrɛmatapo nimusoana anebi Aizaaya nɛ e la Amɔz pibinyɛn na kutɔ. Bumo alɛ gba daŋ buu kagbenejijaso be asɔbuuso nna m ba.

³ Kubɔya nɛ ewura Hɛzekaya ta n shuŋi bumo fanɛ b ya sa anebi Aizaaya nde: “Kabre la awurfoŋ be kachɛ nna n sa anyi, an wɔ kasogberge nɛ ŋaba to nna. An du fanɛ eche nɛ e bee kurge nsaa maŋ naa kɔ eleŋ nɛ e kento ŋ kurge nna.

⁴ Asiriya be ewurgboŋ e shuŋi mbe benapo be enimu nɛ e ba tege Ebɔrɛ nɛ e wɔ ŋkpa to na. Enyɛnpe fo Ebɔrɛ na e naŋ nu katege ere kikɛ nseŋ gberge basa nɛ baa tege mo na kusoe. Amoso kule Ebɔrɛ n sa anyi be basa nɛ b kraa wɔ ŋkpa to.”

⁵ Ewura Hɛzekaya be benimu nɛ e shuŋi na ka ba anebi Aizaaya kutɔ

⁶ nɛ e kaŋɛ bumo le: “Enyɛnpe Ebɔrɛ na bee kaŋɛ fanɛ men sa maŋ shin nɛ kusɔ nɛ Asiriyaebi na bee kaŋɛ fanɛ e maaŋ tiŋ m mɔlga menyi na e baa da menyi kufu.

⁷ Meeŋ shin nɛ Asiriya be ewurgboŋ na e nu kubɔya ko nɛ k shin nɛ e bɛta n yɔ mo gbagba be efuli so nɛ Enyɛnpe Ebɔrɛ e shin nɛ b ya mɔ mo ndoŋ.”

⁸ Asiriya be benapo be enimu na ka nu fanɛ bumo be ewurgboŋ lar Lakish be kadegboŋ to n ya kaa kɔ Libna be kade nɛ k mata ndoŋ na kena nɛ b yɔ ndoŋ nɛ b ya bishi mo kusɔ nɛ baaŋ wora.

⁹ Loŋ be jemanɛ na gbagba nɛ Asiriya be ewurgboŋ, Sennakerɛb nu fanɛ Itiopia be ewura, Tɛhaka wɔ ekpa to a ba nɛ e ba kɔ mo kena. Ndoŋ nna nɛ ewurgboŋ Sennakerɛb sibɛ kawɔlbi ko n shuŋi mbɔ fanɛ b ta n ya sa Juda be ewura, Hɛzekaya.

¹⁰ Kusɔ nɛ e kaŋɛ kawɔlbi na to nde: “Sa maŋ ta fo yirda n wɔtɔ fo Ebɔrɛ na to ŋko n shin nɛ mbe kekaŋɛ fanɛ Asiriya be ewura maaŋ tiŋ ŋ kɔ m pɔɔ Jerusalɛm so na e fule fo.

¹¹ Fo nu kananɛ anyi Asiriya be bewura mur efuli pɔtɛana ko cheche be asheŋ. Nɛ manɛ so nɛ fee fɛ fanɛ shɛŋ maaŋ tiŋ n wora fo?

¹² N nananyɛnana e daŋ mur nde nɛ baa tre Gozan nɛ Haran nɛ Rezef, nseŋ mɔ Bɛtaden be basa nɛ b daa wɔ Tɛlassa na gba. Bumo be agbirana daŋ maŋ tiŋ m mɔlga bumo.

¹³ Bewura nɛ b daa wɔ nde nɛ baa tre Hamaf nɛ Apad nɛ Sefavaim nɛ Hena nɛ Iwa na kikɛ maŋ naa wɔtɔ. Bumo kikɛ mur!”

¹⁴ Ewura Hɛzekaya ka sɔ kawɔl na mbɔ na kutɔ ŋ kraŋ nɛ e ta kumo n yɔ bɔrɛlambu na to n ya bugi kumo to n nase Enyɛnpetale Ebɔrɛ na be anishito,

¹⁵ nseŋ kule Ebɔrɛ ŋ kaŋɛ le: “Enyɛnpetale nɛ fo la Israɛl be Ebɔrɛ, fo e chena fo kuwurputi so awɔlto nɛ asɔkeniso nɛ a du fanɛ emalaika nɛ baa tre amo Chɛrubim na wɔ fo aya ase. Fo nawule e la Ebɔrɛ. Fo e to esoso nɛ kasawule nsaa ji kuwura durnya kikɛ so.

¹⁶ Baŋ keni kananɛ Asiriya be ewura, Sennakerɛb tege fo, Ebɔrɛ nɛ fee sa ŋkpa na.

¹⁷ Enyɛnpetale Ebɔrɛ, an kikɛ nyi k ka la kashenteŋ fanɛ Asiriya be bewuraana mur efuli damtaana n shin nɛ amo be nsawule dese fuloŋ,

¹⁸ nseŋ naŋ chɔɔ efuliana na be agbir fuloŋ nɛ b ta ndibi nɛ ajembu n lɔŋɛ a shuŋ na.

¹⁹ Ama fo Enyɛnpe e la anyi be Ebɔrɛ! Anyee kule fo nna nɛ fo mɔlga anyi ashi Asiriya be ewura be enɔ to, saŋɛ na so ekama nɛ e wɔ durnya to be efuli kama so beeŋ pin fanɛ fo nawule e la Ebɔrɛ.”

Aizaaya be kubɔya nɛ e ta n sa ewura na be asheŋ

²⁰ Ndoŋ nna nɛ Aizaaya ta kubɔya ere n shuŋi n ya sa ewura Hɛzekaya a kaŋɛ mo kusɔ

²¹ nɛ Enyɛnpe Ebɔrɛ na malga a laŋɛ mbe kabɔrɛkule na be kaplɛa so. E yɛ: “Sennakerɛb, Jerusalɛm be basa bee mushe fo nna nsaa keni fo jiga.

²² Wanɛ nɛ fo daa fɛ fanɛ fee tege nsaa wora eyurto na? Ma, Israɛl be Ebɔrɛ cheembi na nɛ fo daa maa sa bunyaŋ na.

²³ Fo daŋ shuŋi fo mbɔ nna nɛ b ba kaa puchi menyi ka daŋ ta menyi be egbaŋɛturko n dii n yɔ Lebanɔn be kebeegboŋ na be esoso n ya kɔ m pɔɔ so nna ashi ma Enyɛnpe Ebɔrɛ na be anishito. Menyee puchi fanɛ men daŋ tiŋ ŋ kuya sida be ndibi tenteŋ nɛ seprɛs be ndibi lelaana n lɛ nna ashi kebee na so hale n ya fo kupo na be nferinto.

²⁴ Fo daŋ puchi fanɛ men daŋ kur atirbu efuli pɔtɛana so nseŋ nuu amo to be nchu. Kumo be kaman ma e shin nɛ Lɔrgboŋ nɛ baa tre Nail wɔl n dese nɛ benapo nite n nite kumo to na.

²⁵ Menyi maŋ pin to fanɛ ma, Enyɛnpe Ebɔrɛ na e kre kumo loŋ dra na kikɛ nɛ naniere k wora m bɔlɔ so na. Ma e sa menyi eleŋ nɛ men tiŋ n shin nɛ ndegboŋ nɛ b pɔr egbalana ŋ kulti na ki nde bureso.

²⁶ Basa nɛ b daa wɔ ndegboŋ na to na daa maŋ naa kɔ eleŋ, ŋkpal kufu ka daŋ pɛ bumo nɛ eburma tɔr bumo so so. B daa du fanɛ kudɔ to be afitiri nna ŋko afitiri popɔrbi nɛ a kɔr ebu be esoso nɛ epeŋilarkpa be afu tushiso ba ber amo so nɛ a bɛlɛ nna.

²⁷ Ama ma ere nyi kusɔ kama a laŋɛ fo kaplɛa so. N nyi kusɔ nɛ fee wora nɛ kakpa nɛ fee yɔ kikɛ. Ma alɛ naa nyi kananɛ fee nya agbo ga a wora ma.

²⁸ N wu fo kamoowu nɛ agbogboŋ na kikɛ. Naniere meeŋ ta dariwa n wɔtɔ fo kamuna to nseŋ ta kebarga n wɔtɔ fo kɔnɔ to. Kumo be kaman nɛ n ta fo m bɔla ekpa nɛ fo bɔla so m ba na m bɛta n yɔ kakpa nɛ fo shi m ba na.”

²⁹ Ade kikɛ be kaman nɛ Aizaaya kaŋɛ Ewura Hɛzekaya le: “Kusɔ nɛ k beeŋ wora be tɔɔnɛ nna na. Kafɛ ere nɛ kafɛ a ba kikɛ menyi maaŋ dɔ n duu shɛŋ ama menyi alɛ beeŋ nya akɔrbua n teŋi n ji. Ama kafɛ nɛ k bɛ so kesasopo na bre menyeeŋ dɔ n duu ayu n teŋi nseŋ duu afeelebi nɛ a bee sɔr asɔrso nɛ baa tre amo greep na nseŋ nya amo be asɔrso n chuge n ji.

³⁰ Basa nɛ baaŋ ji efute ashi Juda be efuli so na beeŋ purge fanɛ aduuso nɛ amo be achin yɔ nchiŋ kasawule to nɛ wora ga na.

³¹ Basa ko beeŋ ji efute ashi Jerusalɛm to nɛ Zayɔn be kebee so, ŋkpal manɛ so, Enyɛnpetale Ebɔrɛ na gbagba e naŋ shin nɛ loŋ a wora.

³² Kusɔ nɛ Enyɛnpe Ebɔrɛ na kaŋɛ a laŋɛ Asiriya be ewurgboŋ na be kaplɛa so nde: ‘E maaŋ nya n luri kadegboŋ ere to ŋko n to kumo ketanyembi koŋwule gba. Benapo nɛ b keta abɛlso be asɔ kuŋamuso maaŋ taga to kadegboŋ na, bumo alɛ maaŋ nya n dɔ ashigboŋ nɛ baaŋ dii so n luri kumo to ŋko ŋ kulti kumo n wɔtɔ kikɛ.

³³ Ekpa nɛ e baŋ bɔla so m ba na nɛ e beeŋ naŋ bɔla so n yɔ nɛ e maŋ nya n luri kadegboŋ na to. Ma, Enyɛnpe Ebɔrɛ na e malga na.

³⁴ Meeŋ kuŋ kadegboŋ ere ŋkpal ŋ gbagba be kemaŋkura nɛ kɔnɔ naseso nɛ n nase n sa ma kayɛrbi Deevid na so.’ ”

³⁵ Ade be kaman nɛ Enyɛnpe Ebɔrɛ na shin nɛ mbe malaika yɔ Asiriya be basa be keeyi to kanyɛso n ya mɔ benapo ŋgboŋ kalfa nɛ aduburwa nɛ anu. Kare ka chɛ kachipurdidi nɛ bumo kikɛ wu a dese!

³⁶ Ndoŋ nna nɛ Asiriya be ewurgboŋ, Sennakerɛb bɛta n yɔ mbe laŋ to ashi Asiriya be efuli so be kadegboŋ nɛ baa tre Ninɛve na.

³⁷ Kachako e ka yɔ kegbirlambu to n ya kaa shuŋ mbe kegbir nɛ baa tre Nishrɔk na, nɛ mbe mbinyɛnso anyɔ nɛ baa tre bumo Adremalɛk nɛ Shareza na ta bumo be etokobi m mɔ mo ndoŋ nseŋ shile n yɔ Ararat be kasawule so nɛ mo pibinyɛn nɛ baa tre Essahaddɔn na sɔ mo so ŋ ki ewura.