2 Bewura 18 - EBƆRƐ BE KAWƆL

Juda be ewura Hɛzekaya be asheŋ

¹ Jemanɛ nɛ Ela pibinyɛn Hoshiya daa ji Israɛl be kuwura na be kafɛ sasopo to, nɛ Ahaz malɛ pibinyɛn Hɛzekaya ki Juda be ewura.

² Nfɛ adunyɔ nɛ anu nɛ Hɛzekaya daŋ fo pɔɛŋ nseŋ ki Juda be ewura. Mo alɛ daŋ ji kuwura Jerusalɛm to nfɛ adunyɔ nɛ akpanu nna. Mo nio e daa la Zakareya pibiche Abija.

³ E daŋ bɛ mo nananyɛn ewura Deevid be aya so nna nseŋ wora kusɔ nɛ keniŋi Enyɛnpe Ebɔrɛ na be anishito.

⁴ E daŋ mur nnyamase be mboŋ nɛ baa bunyaŋ Ebɔrɛ na nna nseŋ bure ndoŋ be ajembu be eshabɔrɛ na nɛ kegbirche Ashira be mpɔrduli be ndibi n lɛ. E daŋ bɛa danyaŋ be kuwɔ nɛ baa tre Nehushtan nɛ bumo nananyɛn Mosis daŋ lɔŋɛ nɛ Israɛlebi na bee bunyaŋ kumo m ba fo loŋ be jemanɛ na to nna.

⁵ Hɛzekaya daŋ yirda Enyɛnpe Israɛl be Ebɔrɛ na nna. Juda be bewura nɛ b ji pɔɛŋ nɛ Hɛzekaya ji na nɛ bekama nɛ Hɛzekaya malɛ ji pɔɛŋ nɛ b ji na be ekama be kuwurji maŋ fo ewura Hɛzekaya peya so.

⁶ E ji kashenteŋ nsaa wora kasonu a sa Enyɛnpe Ebɔrɛ na nseŋ naa bɛ mbra nɛ Enyɛnpe Ebɔrɛ ta n sa Mosis dra dra na fanɛ e ta n sa mbe basa na so nɛnɛ.

⁷ Amoso Enyɛnpe Ebɔrɛ na daa wɔ mo kutɔ nna saŋkikɛ. Amoso kusɔ kama nɛ e daa wora daa nyalɛ a sa mo nna. E daŋ kini kenu n sa Asiriya be ewura nɛ kebaala mbe kayɛrbi nna.

⁸ E daŋ kɔ m pɔɔ Filistiebi na so nna nseŋ sɔ bumo be ndewurbiana nɛ ndegboŋana kikɛ hale n ya fo Gaaza be kasawule so kikɛ.

⁹ Hɛzekaya ka ji kuwura be kafɛ nasopo to, nɛ Ela pibinyɛn Hoshiya malɛ ka ki Israɛl be ewura be kafɛ shunusopo nɛ Shalmaneesa nɛ e la Asiriya be ewurgboŋ na yɛr benapo n ya kɔ Israɛl nseŋ kulti Samɛria be kade n wɔtɔ.

¹⁰ Nfɛ asa nɛ b daŋ ta ŋ kɔ n sɔ Samɛria. Ewura Hɛzekaya be kuwurji be kafɛ shesopo nɛ ewura Hoshiya malɛ be kuwurji be kafɛ kpanusopo to nɛ Israɛl be efuli so be kadegboŋ Samɛria kɔ n tɔr.

¹¹ Asiriya be ewurgboŋ na ka kɔ m pɔɔ Samɛria be kade na so nɛ e pɛ Israɛlebi na n yɔ Asiriya n ya ti ebu. E daŋ yɛr bumo be beko Halaf be kade to nseŋ yɛr beko malɛ Gozan be efuli so a mata Lɔr nɛ baa tre Habɔɔ na nseŋ yɛr beko malɛ Midia be efuli so be nde to.

¹² B daŋ kɔ m pɔɔ Samɛria so nna ŋkpal Israɛlebi na ka daŋ wora alubi ŋ gbiti Enyɛnpe bumo be Ebɔrɛ na so. B daŋ kplaŋ kɔnɔkoŋwule be ŋkre nɛ bumo nɛ Enyɛnpe Ebɔrɛ na daŋ wora na so nna nseŋ kini kebɛ mbra nɛ e bɔla mbe kayɛrbi Mosis so n sa bumo na kikɛ so. B daa maa sha kenu b ka malga mbra na be asheŋ gba a bishi nɛ b bɛ amo so.

Asiriya ka bee sha k kɔ n sɔ Jerusalɛm be asheŋ

¹³ Ewura Hɛzekaya ka bee ji Juda be efuli so be kuwura be kafɛ kuduanasopo to nɛ Sennakerɛb nɛ e la Asiriya be efuli so be ewurgboŋ na ba kɔ Juda be ndegboŋ nɛ b pɔr egbal ŋ kulti na n sɔ amo.

¹⁴ Ndoŋ nna nɛ ewura Hɛzekaya ta le be kubɔya ere nɛ e ya sa Sennakerɛb ashi Lakish be kade to. E yɛ: “N wora alubi amoso jande yige kebaakɔ ma kena, saŋɛ na so meeŋ sa fo kusɔ kama nɛ fee sha.” Nɛ ewurgboŋ Sennakerɛb malɛ kela n shoŋi Hɛzekaya fanɛ e sa mo gbiti kilo ŋgboŋ kudu nɛ shuwa malɛ kilo kagboŋ koŋwule.

¹⁵ Ndoŋ nna nɛ Ewura Hɛzekaya shin nɛ b ta gbiti nɛ a wɔ Enyɛnpe Ebɔrɛ be bɔrɛlambu to nɛ mbe laŋ to be kpanjawu to na n ya sa mo.

¹⁶ E daŋ shin nna nɛ b marga bɔrɛlambu na to be akuloŋana so nɛ kumo be mbuna to be ndibi yuuso so na kikɛ be shuwa n ya sa ewurgboŋ Sennakerɛb.

¹⁷ Ndoŋ nna nɛ Asiriya be ewura na kaŋɛ mbe benapo be ejuŋkparpo fanɛ e lar kade nɛ baa tre Lackish na nseŋ keta benapo damta n yɔ Jerusalɛm n ya kɔ ewura Hɛzekaya kena. Benapo be bejuŋkparpogboŋ asa na e daŋ yɔ n ya yili ekpa nɛ k mata ewajɛluepoana be eshuŋkpa nɛ k dese ŋ kra kuchubɔr nɛ b kur nɛ nchu bee shi esoso be Kepa na to a bɔla a yɔ kade na to na.

¹⁸ Ndoŋ nɛ b yili n shuŋi ŋ kaŋɛ ewura Hɛzekaya fanɛ baa sha kemalga mo nɛ mbe benimu asa ko kutɔ. Bumo e daa la Eliakim nɛ e la Hilkiya pibinyɛn nseŋ daa la esa nɛ e bɛ ewura so na, nɛ Shɛbna nɛ e la ewura be esibɛpo na, nɛ Jowa nɛ e la Asaf pibinyɛn nseŋ daa la esa nɛ e bee keni ewurkpa be asheŋ nɛ b sibɛ n nase so na.

¹⁹ Kumo be kaman nɛ Asiriya be benapo be bejuŋkparpo na be eko kaŋɛ bumo fanɛ Asiriya be ewurgboŋ bee sha nɛ e pin kusɔ nɛ k shin nɛ ewura Hɛzekaya kɔ kenyɛn nseŋ yirda mbe kumu loŋ na.

²⁰ Nseŋ naŋ kaŋɛ le: “Ŋko e bee fɛ fanɛ e beeŋ tiŋ n yili kɔnɔ to be mmalga nawule so nna ŋ kre kena ŋ kɔ m pɔɔ so a? Naniere ere e ka lar Asiriya be ewura kaman ere, wanɛ e naaŋ chɛ mo to?

²¹ E ta mbe kumu n to Ijipt be efuli nɛ kumo be ewura na so nna, ŋko? Nɛ k la loŋ bre, kumo ere kebaadu fanɛ e ka bee yirgi kedibi wuso nɛ k beeŋ tiŋ m bu n da mbe enɔ m bɔl so nna. Kananɛ Ijipt be ewura Fɛɛro du n sa ekama nɛ e ta mbe kumu n lɛ mo so nna na.”

²² Kede be kaman nɛ Asiriya be benapo be enimu na naŋ kaŋɛ: “Ŋko menyee sha kekaŋɛ ma fanɛ Enyɛnpe menyi be Ebɔrɛ na nɛ men ta menyi be amu a to so! Mannɛ Enyɛnpe Ebɔrɛ na be ebɔrɛsure nɛ mboŋ nɛ baa shuŋ mo na nɛ Hɛzekaya kaŋɛ fanɛ b mur amo kikɛ nseŋ ka kakpa koŋwule n sa basa nɛ b wɔ Juda be efuli so nɛ Jerusalɛm to nɛ b baa shuŋ Ebɔrɛ ndoŋ nawule a?

²³ Naniere n yili Asiriya be ewura be aya to nna nɛ ma nɛ menyi a ji n yili fanɛ, nɛ menyeeŋ tiŋ n nya egbaŋɛ be bediipo, ma alɛ beeŋ sa menyi egbaŋɛ ŋgboŋ anyɔ.

²⁴ Ama men ba nyi fanɛ menyi maaŋ tiŋ n tu Asiriya be efuli so be enapo nɛ e maŋ kɔ eyilikpagboŋ gba ŋ kɔ. Menyee tama fanɛ Ijiptebi beeŋ chise menyi egbaŋɛturko nɛ egbaŋɛ diipoana nɛ b ba chɛ menyi to ŋ kɔ kena a?

²⁵ Men baa nyi fanɛ Enyɛnpe Ebɔrɛ na e kaŋɛ ma fanɛ m ba kɔ m mur menyi be efuli ere. Mo alɛ e naŋ chɛ ma to.”

²⁶ Ndoŋ nna nɛ Eliakim nɛ Shɛbna nɛ Jowa kaŋɛ benapo be ejuŋkparpo na le: “Jande, ta Aramaik be ŋgbar to a malga anyi kutɔ. Amo nɛ anyee nu. Sa maa malga Hibruw be ŋgbar to, ŋkpal manɛ so, basa nɛ b wɔ egbalana ere so ere kikɛ beeŋ nu kusɔ nɛ anyee malga ere.”

²⁷ Nɛ Asiriya be benapo be enimu na malɛ kaŋɛ: “Menyee tama fanɛ menyi nɛ ewura na nawule nɛ anyi be ewurgboŋ shuŋi ma fanɛ m ba malga n sa a? Manɛ aloŋ nna, basa nɛ b chena egbalana na so na gba nɛ mee malga a sa. K maaŋ chɛr bumo alɛ gba beeŋ ji bumo gbagba be ejɔŋɛ nseŋ nuu bumo be ebɔnfɔl, fanɛ kananɛ menyi benimuana ere gba beeŋ wora na.”

²⁸ Kumo be kaman nɛ benapo be enimu na ponte awɔrso Hibruw be ŋgbar to saŋɛ na so ekama nɛ e wɔ ndoŋ beeŋ nu. E yɛ: “Men nu kusɔ nɛ Asiriya be ewurgboŋ bee kaŋɛ menyi.

²⁹ Men sa maŋ shin nɛ ewura Hɛzekaya e fule menyi. E maaŋ tiŋ m mɔlga menyi.

³⁰ E kaŋ kaŋɛ menyi fanɛ Enyɛnpe Ebɔrɛ na beeŋ kɔ m mɔlga menyi ashi Asiriya be ewurgboŋ be enɔ to, men sa maŋ yirda kusɔ nɛ e kaŋɛ na.

³¹ Men sa maŋ nu n sa Hɛzekaya! Men nu n sa ma efuli so be ewura. Nɛ men ta menyi be amu n sa mo, e beeŋ shin nɛ men ba kraa kɔ menyi be waindibi be adɔana nɛ efigi be ndibi be asɔrso nsaa nuu menyi be atirbu to be nchu

³² n ya fo saŋɛ nɛ ewurgboŋ na beeŋ lɔŋɛ menyi n chena efuli nɛ k du fanɛ men gbagba be efuli, a kɔ ewaindibi be asɔrso nɛ menyeeŋ baa ta a wora eyabra, nɛ ayu nɛ men baa ta a wora ebodobodo, na so. K la kasawule nɛ k kɔ ɔlif be ŋku nɛ mushoŋ ga nna. Men baa kɔ kasonu n sa mo akoŋ maaŋ mɔ menyi ndoŋ kikɛ, menyeeŋ ba ji a moɛ. Men sa maŋ shin nɛ ewura Hɛzekaya e fule menyi nɛ men baa fɛ fanɛ Enyɛnpe Ebɔrɛ na beeŋ mɔlga menyi.

³³ Efuli mo so be agbirana nɛ men daŋ nu fanɛ a tiŋ m mɔlga bumo be efuli ashi Asiriya be ewura be enɔ to.

³⁴ Nnɛ nɛ basa nɛ b daa wɔ ndegboŋ nɛ baa tre Hamaf nɛ Appad nɛ Sefavaim nɛ Heena nɛ Iwa na be agbirana wɔ naniere? Samɛria be efuli so be agbirana daa maŋ tiŋ ŋ kuŋ kasawule na ashi Asiriya be benapo kutɔ.

³⁵ Saŋɛ mo nɛ efuliana be agbirana daŋ mɔlga bumo be efuliana ashi anyi be ewura be enɔ to? Amoso manɛ bre so nɛ menyee fɛ fanɛ menyi be Ebɔrɛ na beeŋ tiŋ m mɔlga Jerusalɛm?”

³⁶ Ŋkpal ewura Hɛzekaya ka daŋ kaŋɛ bumo fanɛ b sa maŋ kaŋ kaŋɛ shɛŋ so, basa na daa maŋ malga.

³⁷ Kumo be kaman nɛ Eliakim nɛ Shɛbna nɛ Jowa kpɛa bumo be asɔbuuso to kagbenejijaso nseŋ ya kaŋɛ ewura Hɛzekaya kusɔ nɛ Asiriya be benapo be enimu na kaŋɛ na.