2 Bewura 17 - EBƆRƐ BE KAWƆL

Israɛl be ewura Hoshiya be asheŋ

¹ Ewura Ahaz ka ji kuwura Juda be efuli so be kafɛ kuduanyɔsopo to nɛ Ela pibinyɛn Hoshiya malɛ ki Israɛl be efuli so be ewura nseŋ ji kuwura Samɛria to nfɛ akpanu.

² Mo alɛ gba daŋ wora alubi ŋ gbiti Enyɛnpe Ebɔrɛ nna, ama mbe alubi daa maŋ fo bumo nɛ b juŋkpar mo n ji kuwura na so.

³ Saŋɛ so nɛ Hoshiya bee ji kuwura na, Asiriya be ewurgboŋ Shalmaneesa daŋ kre kena nna n ya kɔ m pɔɔ Israɛl so nɛ ewura Hoshiya bee ka lampo a sa mo kafɛ kikɛ.

⁴ Kafɛ ko nɛ ewura Hoshiya shuŋi mbɔ Ijipt be efuli so be ewura nɛ baa tre Soo na kutɔ a fin fanɛ e chɛ mo to nɛ e sa maŋ naa ka kafɛ kafɛ kikɛ be lampo na a sa Asiriya be ewura na. Ewurgboŋ Shalmaneesa ka nu loŋ na, nɛ e shin nɛ b pɛ Hoshiya n ti ebu.

B ka kɔ m pɔɔ Samɛria so be asheŋ

⁵ Ndoŋ nna nɛ Shalmaneesa naŋ yɛr benapo n ya kɔ Israɛl kena nseŋ kulti Samɛria be kade n wɔtɔ nfɛ asa kikɛ.

⁶ Hoshiya be kuwurji be kafɛ kpanusopo to nɛ Asiriya be ewura kɔ m pɔɔ Samɛria be kade so nseŋ pɛ Israɛlebi na n yɔ Asiriya n ya ti ebu. E daŋ yɛr bumo be beko Halaf be kade to nna nseŋ yɛr beko malɛ Gozan be efuli so a mata Lɔr nɛ baa tre Habɔɔ na, nseŋ yɛr beko malɛ Midia be nde to nɛ b ya chena ndoŋ.

⁷ B daŋ kɔ m pɔɔ Samɛria so nna ŋkpal Israɛlebi na ka daŋ wora alubi ŋ gbiti Enyɛnpe bumo be Ebɔrɛ nɛ e mɔlga bumo ashi Ijiptebi be enɔ to nseŋ lara bumo Ijipt be kasawule so dra dra na nna. B daa shuŋ agbirana nna,

⁸ nsaa bɛ basa nɛ Enyɛnpe Ebɔrɛ ju kasawule na so na be edaŋkaresheŋ nɛ asheŋ lubi nɛ Israɛl be bewura bar Israɛl be efuli so na kikɛ so nna.

⁹ Ade kikɛ be buushi Israɛlebi na kraa wora asheŋ nɛ a maa par Ebɔrɛ nna. B daŋ pɔr agbir nna n yili Israɛl be ndewurbi nɛ ndegboŋ nɛ b pɔr egbal ŋ kulti amo na nɛ abee be esoso ashi kupuŋ to kikɛ.

¹⁰ B daŋ ta ajembu nna m pɔr agbir nɛ kegbirche Ashira be kapɔrduli n yili abee so nɛ ndibi be afito a shuŋ amo.

¹¹ B daa chɔɔ duwu mboŋ ere kikɛ nna a bunyaŋ agbir fanɛ kananɛ efuli pɔtɛana so be basa daa wora pɔɛŋ nɛ Enyɛnpe Ebɔrɛ ju bumo ashi kasawule na so na. Bumo be asheŋ lubi nɛ b daa wora na daŋ pɛ Enyɛnpe Ebɔrɛ agbo ga.

¹² B daŋ kini kenu n sa Enyɛnpe Ebɔrɛ nna nsaa shuŋ agbir.

¹³ Amoso Enyɛnpe Ebɔrɛ daŋ shuŋi mbɔ nɛ anebiana nna fanɛ b ya kpele Israɛl nɛ Juda be efuli so ebi na kusoe. E yɛ: “Men yige men be asheŋ lubi na be kebaawora, nseŋ bɛ ma mbra nɛ ma keŋini so. N ta amo nna n sa men nananyɛnana nseŋ kaŋɛ ma anebiana nɛ ma nyɛrbiana fanɛ b ta amo n sa menyi alɛ gba.”

¹⁴ Amo nɛ amo kikɛ Israɛlebi na daa maŋ wora kasonu n sa Enyɛnpe Ebɔrɛ na. Bumo alɛ gba daa kɔ asoe kpakpaso nna fanɛ bumo nananyɛnana nɛ b daŋ kini keshuŋ Enyɛnpe bumo be Ebɔrɛ na.

¹⁵ B daa maa bɛ Enyɛnpe Ebɔrɛ na be keŋini so, nseŋ kini kebɛ kɔnɔkoŋwule be ŋkre nɛ mo nɛ bumo nananyɛnana daŋ kre na gba so. B daa maŋ ta mbe kasokpele na gba n tre shɛŋ. B daa wɔtɔ nna a shuŋ agbir fuloŋ nseŋ ki basa fuloŋ. Efuli pɔtɛana nɛ a kulti bumo na be edaŋkaresheŋ nɛ Ebɔrɛ maa sha na nɛ b daa bɛ so.

¹⁶ Israɛlebi na daŋ kini kebɛ Enyɛnpe bumo be Ebɔrɛ na be mbra so nna nseŋ ta shuwa n lɔŋɛ egbolu fɔlbi anyɔ a shuŋ amo. B daŋ naŋ lɔŋɛ kegbirche Ashira gba be kapɔrduli nna nsaa shuŋ kumo nɛ achɛkpabi nɛ kegbir nɛ baa tre Baal na.

¹⁷ B daa ta bumo be mbia nna a chɔɔ a lara esarga nnyamase be agbir so nseŋ ki belejipo a kpal. Kusɔ nɛ Enyɛnpe Ebɔrɛ kishi na nɛ baa wora nɛ mbe agbo nyaŋɛ to.

¹⁸ Amoso Enyɛnpe Ebɔrɛ daŋ nya agbo nna ga n wɔtɔ Israɛlebi na nseŋ shin nɛ b pɛ bumo n yɔ kenyaya to efuli wɔfɔ so ŋ ka Judaebi na nawule.

¹⁹ Judaebi na gba daa maŋ naa bɛ Enyɛnpe bumo be Ebɔrɛ na be mbra so nɛnɛ. Kusɔ nɛ Israɛlebi na daŋ wora na gbagba nɛ bumo alɛ gba daa wora.

²⁰ Amoso Enyɛnpe Ebɔrɛ daŋ kplaŋ Israɛlebi nɛ Judaebi na so nna nseŋ gberge bumo kusoe n ju bumo mbe anishito, n yige bumo n sa bumo doŋana nɛ b tɔrɔ bumo ga.

²¹ Enyɛnpe Ebɔrɛ ka barga Israɛl be efuli ashi Juda be efuli to na be kaman pɔɛŋ nɛ Israɛlebi na shin nɛ Nebat pibinyɛn Jeroboam ki bumo be ewura. Jeroboam daŋ shin nna nɛ b kini Ebɔrɛ nseŋ wora alubi nɛ a maŋ walɛ kekeni kikɛ.

²² Alubi nɛ Jeroboam daa wora na nɛ Israɛlebi na gba daŋ baa wora

²³ hale nɛ Enyɛnpe Ebɔrɛ na ba ju bumo n lɛ fanɛ kananɛ e bɔla mbe nyɛrbi anebiana so ŋ kaŋɛ na. Kumo so nɛ b daŋ tintiŋ Israɛlebi na n lara bumo ashi bumo gbagba be kasawule so n yɔ Asiriya be efuli so kenyaya to, nɛ b wɔ ndoŋ hale kabre na.

Asiriyaebi na ka ba chena Israɛl be efuli so be asheŋ

²⁴ Asiriya be ewurgboŋ na daŋ lara basa ashi Babilɔn nɛ Kuuta nɛ Awa nɛ Hamaf nɛ Sefavaim be nde to nna nseŋ tintiŋ bumo n yɔ Israɛl be efuli so nɛ b ya chena ndoŋ. B daŋ ya sɔ nde nɛ Israɛlebi na be nde nna n chena n ta bumo be kadegboŋ Samɛria n ti so.

²⁵ B ka yɔ ndoŋ sososo na, b daa maa shuŋ Enyɛnpe Ebɔrɛ, ŋkpal loŋ so, e daŋ shin nna nɛ ebuluŋ mɔ basa na be beko.

²⁶ Ndoŋ nna nɛ b shuŋi ŋ kaŋɛ Asiriya be ewura na fanɛ basa nɛ e shin nɛ b ba chena Samɛria na maŋ nyi kasawule na so be edaŋkaresheŋ, amoso nɛ ndoŋ be agbir shuŋi ebuluŋ nɛ b baa kaa mɔ bumo na.

²⁷ Asiriya be ewura ka nu kubɔya na nɛ e kaŋɛ fanɛ b sa bɔrɛmatapoana nɛ b pɛ m ba ti ebu na be ekoŋwule ekpa nɛ e bɛta n ya ka wɔ Israɛl a ŋini basa na kasawule na so be edaŋkaresheŋ.

²⁸ Amoso b daŋ lara Israɛl be bɔrɛmatapo ko ashi kabuti to nna nɛ e yɔ Bɛtɛl n ya kaa ŋini basa na kananɛ baa shuŋ Enyɛnpe Ebɔrɛ.

²⁹ Ama basa nɛ b yɛr n ya chena Israɛl na bre daŋ pɔr bumo gbagba be efuli so be agbirana nna nseŋ ta amo n yili n yili Israɛlebi na be mboŋ nɛ b daa shuŋ bumo be agbirana na.

³⁰ Basa nɛ b shi Babilɔn na daŋ pɔr Sukɔf Bɛnɔf be kegbir na be kapɔrduli nna nɛ bumo nɛ bumo alɛ shi Kuuta na pɔr Nɛgal be kegbir na be kapɔrduli nɛ bumo nɛ b shi Hamaf malɛ pɔr Ashima be kegbir na be kapɔrduli,

³¹ nɛ Iwa malɛ be basa pɔr Nibhaaz nɛ Taatak be kegbir na be mpɔrduli; ama Sefavaim bre be basa ta bumo be mbia nna m mɔ n lara sarga chɔɔso n sa bumo be agbir Adramalɛk nɛ Anamalɛk.

³² Le be basa koŋwule ere kraŋ naa shuŋ Enyɛnpe Ebɔrɛ nna ama b daŋ lara bumo gbagba to b basa ko nna fanɛ b baa yili bumo be katelamu to a lara esarga a sa nnyamase be agbirana.

³³ B daa shuŋ Enyɛnpe Ebɔrɛ nna nseŋ naa shuŋ bumo be efuliana so be agbirana n ti so.

³⁴ B kraa kɔ loŋ be edaŋkaresheŋ na to hale kabre. B maa shuŋ Enyɛnpe Ebɔrɛ na; bumo alɛ maŋ naa bɛ mbe mbra nɛ e ta n sa Jeekɔb nɛ e chɛrga mbe ketre ŋ ki Israɛl na nɛ mbe kaman to ebi na so.

³⁵ Israɛlebi na nɛ Enyɛnpe Ebɔrɛ na ka daŋ wora kɔnɔkoŋwule be ŋkre na, le nɛ e daŋ kaŋɛ bumo: “Men sa maŋ kaa shuŋ agbir; ŋko a jɔŋɛ amo ase ŋko a lara esarga a sa mo.

³⁶ Men baa bunyaŋ ma Enyɛnpe Ebɔrɛ nɛ m bɔla ma eleŋgboŋ so n lara menyi ashi Ijipt be efuli so na nsaa jɔŋɛ ma ase a lara esarga a sa n nawule.

³⁷ Men baa bɛ mbra nɛ keŋini nɛ n ta n sa menyi na so kpakpa. Men sa maŋ kaŋ shuŋ kegbir kikɛ.

³⁸ Menyi alɛ e sa maŋ kaŋ teŋ kɔnɔkoŋwule be ŋkre nɛ ma nɛ menyi kre na so. Ma e kaŋɛ menyi na fanɛ men sa maŋ kaŋ shuŋ kegbir kikɛ

³⁹ n ti ma Enyɛnpe men be Ebɔrɛ na so. Saŋɛ na so meeŋ baa mɔlga menyi ashi men doŋana be enɔ to.”

⁴⁰ Ama Israɛlebi na kini kenu kusɔ nɛ Enyɛnpe Ebɔrɛ kaŋɛ na nna nsaa bɛ bumo be agbir nɛ edaŋkaresheŋ so.

⁴¹ B kraŋ kini nna a shuŋ Ebɔrɛ nsaa shuŋ bumo be agbir a ti so. Hale m ba fo kabre, loŋ nɛ bumo be kaman to ebi gba kraa wora.