2 Bewura 15 - EBƆRƐ BE KAWƆL

Juda be Ewura Uziya be asheŋ

¹ Israɛl be ewura Jeroboam be kuwurji be kafɛ adunyɔ nɛ ashunusopo to nɛ Amaziya pibinyɛn Uziya malɛ ki Juda be ewura.

² Uziya daa la nfɛ kuduashe nna pɔɛŋ ŋ ki ewura nseŋ ji kuwura Jerusalɛm to nfɛ adunu nɛ anyɔ. Mo nio e daa la Jekolia nɛ e shi Jerusalɛm na.

³ E daŋ bɛ mo tuto be aya so nna nseŋ wora kusɔ nɛ k bee par Enyɛnpe Ebɔrɛ na.

⁴ Ama e daa maŋ shin nɛ b bure nnyamase na be agbirlambuana na, amoso basa na daa lara esarga nna nsaa chɔɔ eduwu ndoŋ.

⁵ Enyɛnpe Ebɔrɛ na daŋ shin nna nɛ keboti pɛ Uziya nɛ e keta kumo hale n ya wu. B daa maŋ naŋ sa mo ekpa nɛ e shuŋ kushuŋ kikɛ. E daa wɔ laŋ pɔtɛ to nna nɛ mo pibinyɛn Jotam sɔ mo so a wɔ ewura be laŋ to a ji efuli na so kuwura.

⁶ B daŋ sibɛ kusɔ kama nɛ ewura Uziya daŋ wora saŋɛ so nɛ e daa ji kuwura na nna n wɔtɔ Juda be bewura be adrasheŋ be nwɔl to.

⁷ Ewura Uziya ka wu, Jerusalɛm nɛ k la ewura Deevid be kade to nɛ b ya puli mo nɛ mo pibinyɛn Jotam sɔ mo so n ji kuwura.

⁸ Juda be ewura Uziya be kuwura be kafɛ adesa nɛ aburwasopo to nɛ ewura Jeroboam nyɔsopo pibinyɛn Zakareya ki Israɛl be ewura nseŋ ji kuwura ashi Samɛria to afɔl ashe nawule.

⁹ Kulubi nɛ bewura nɛ b juŋkpar mo na daŋ wora ŋ gbiti Enyɛnpe Ebɔrɛ na gbagba nɛ mo alɛ gba daŋ wora. E daŋ bɛ Nebat pibinyɛn ewura Jeroboam nɛ e shin nɛ Israɛl luri kulubi to na so nna.

¹⁰ Jabesh pibinyɛn Shalɔm daŋ kre ewura Zakareya asheŋ lubi nna nseŋ mɔ mo jimaŋ to n sɔ kuwura n ji.

¹¹ B sibɛ kusɔ kama nɛ ewura Zakareya wora kikɛ n wɔtɔ Israɛl bewura be adrasheŋ be nwɔl to.

¹² Kusɔ nɛ Enyɛnpe nase kɔnɔ n sa Jehu na bɔlɔ so. E yɛ: “Yili fo kenana m ya fo fo kenana gbiramuli be jemanɛ so fo basa e naaŋ baa ji Israɛl be efuli so be kuwura.”

Israɛl be ewura Shalɔm be asheŋ

¹³ Ewura Uziya ka ji Juda be kuwura be kafɛ adesa nɛ akpanusopo to nɛ Jabesh malɛ pibinyɛn Shalɔm ki Israɛl be ewura nseŋ ji kuwura Samɛria be kade to kufɔl koŋwule.

¹⁴ Gaadi pibinyɛn Menahɛm, e daŋ shi Tiiza n yɔ Samɛria n ya mɔ Shalɔm n suge kuwura na n ji.

¹⁵ B daŋ sibɛ kusɔ kama nɛ Shalɔm daŋ wora nɛ mbe ashuŋ lubi kikɛ nɛ e daŋ wora n wɔtɔ Israɛl be bewura be adrasheŋ be nwɔl to.

¹⁶ Menahɛm ka shi Tiiza a ba na, nɛ e kɔ Tapua be kade kena n mur kumo nɛ kumo be basa kikɛ nɛ nde nɛ a kulti kumo na kikɛ, ŋkpal kade na to ebi ka maŋ shuli so n sa mo so. E daŋ baŋɛ bedampoche be epunana gba to nna.

Israɛl be ewura Menahɛm be asheŋ

¹⁷ Ewura Uziya ka ki Juda be ewura be kafɛ adesa nɛ akpanusopo to nɛ Gaadi pibinyɛn Menahɛm malɛ ji Israɛl be kuwura nseŋ chena Samɛria to n ji kuwura nfɛ kudu.

¹⁸ E daa maa nu a sa Enyɛnpe Ebɔrɛ na, nsaa wora alubi nɛ Nebat pibinyɛn Jeroboam daŋ wora nseŋ shin nɛ Israɛl luri kulubi to na.

¹⁹ Asiriya be ewurgboŋ Tiglaf Pilesa daŋ ba kɔ Israɛl kena nna nɛ Menahɛm sa mo shuwa kilo ŋgboŋ adesa saŋɛ na so mo nɛ mo beeŋ ba wɔ ebel nɛ e chɛ mo to n shin nɛ mbe efuli so ebi e baa nu a sa mo.

²⁰ Menahɛm daŋ tintiŋ Israɛl be efuli so be damawuraana nna nɛ bumo be ekama ka gbiti be ndarbi adununu nɛ e ta amo n sa Tiglaf Pilesa. Kumo be kaman nɛ Tiglaf Pilesa bɛta n yɔ mbe efuli so.

²¹ B sibɛ kusɔ kama nɛ Menahɛm wora n wɔtɔ Israɛl be bewura be adrasheŋ be nwɔl to.

²² Menahɛm ka wu, mo pibinyɛn Pɛkaliya e sɔ mo so n ji kuwura.

Israɛl be ewura Pekahiya be asheŋ

²³ Ewura Uziya ka ji Juda be kuwura be kafɛ adunusopo to nɛ Menahɛm pibinyɛn Pekahiya malɛ ki Israɛl be ewura nseŋ ji kuwura Samɛria to nfɛ anyɔ.

²⁴ E daŋ kini kenu n sa Enyɛnpe Ebɔrɛ nna nseŋ shin nɛ Israɛlebi na luri kulubi to fanɛ kananɛ Nebat pibinyɛn ewura Jeroboam gba daŋ wora na.

²⁵ Remaliya pibinyɛn Peka e daa la Pekahiya be ekrachiana na to be enimu, ama mo alɛ daŋ kre kemɔ ewura na nna. Kachako nɛ e keta benapo lempo adunu nɛ b shi Giliad na n ya luri ewura be laŋ na to be kakpa nɛ baa kuŋ nɛnɛ ga ashi Samɛria na m mɔ Pekahiya nɛ Agob nɛ Arie nseŋ ki ewura.

²⁶ B sibɛ kusɔ kama nɛ Pehahiya wora kikɛ n wɔtɔ Israɛl be bewura be adrasheŋ be nwɔl to.

Israɛl be ewura Peka be asheŋ

²⁷ Ewura Uziya ka ji Juda be kuwura be kafɛ adunu nɛ anyɔsopo to, nɛ Remaliya pibinyɛn Peka malɛ ki Israɛl be ewura nseŋ ji kuwura Samɛria to nfɛ adunyɔ.

²⁸ E daŋ bɛ Nebat pibinyɛn ewura Jeroboam be asheŋ woraso so nna n wora alubi ŋ gbiti Enyɛnpe Ebɔrɛ nseŋ shin nɛ Israɛl wora kulubi.

²⁹ Saŋɛ so nɛ Pɛka daa ji Israɛl be kuwura na, nɛ Asiriya be ewurgboŋ nɛ baa tre Tiglaf Pilesa na kɔ n sɔ Ijɔn nɛ Abel Bɛf Maaka nɛ Janua nɛ Kadɛsh nɛ Hazɔɔ nɛ Giliad nɛ Galili nɛ Naftali be nsawuleana nseŋ pɛ Israɛlebi nɛ b wɔ ndoŋ na n yɔ Asiriya n ya ti ebu.

³⁰ Uziya pibinyɛn Jotam ka ji Juda be kuwura be kafɛ adunyɔsopo to, nɛ Ela pibinyɛn Hoshiya malɛ kre kena n ya kɔ ewura Pɛka nseŋ mɔ mo n sɔ mbe kuwura.

³¹ B sibɛ kusɔ kama nɛ Pɛka wora n wɔtɔ Israɛl be bewura be adrasheŋ be nwɔl to.

³² Remaliya pibinyɛn Pɛka nɛ e la Israɛl be ewura na be kuwurji be kafɛ nyɔsopo to nɛ Uziya pibinyɛn Jotam malɛ ki Juda be ewura.

³³ Nfɛ adunyɔ nɛ anu nɛ Jotam daŋ ji pɔɛŋ ŋ ki ewura nseŋ ji kuwura ashi Jerusalɛm to nfɛ kuduashe. Mo nio e daa la Zadɔk pibiche Jerusha.

³⁴ Kananɛ mo tuto Uziya daŋ wora Enyɛnpe Ebɔrɛ be aparsheŋ na, gbagba na chap nɛ mo alɛ gba Jotam daŋ wora.

³⁵ B daa maŋ mur agbirlambu be mboŋana nɛ b daa shuŋ bumo be agbir ndoŋ na bre amoso basa na daa lara esarga nna nsaa chɔɔ eduwu ndoŋ. Jotam e daŋ pɔr bɔrɛlambu na be kelargato to be esoso be kaba so be kabunagboŋ na.

³⁶ Kusɔ kama nɛ Jotam wora saŋɛ so nɛ e daa la ewura na be asheŋ kikɛ wɔ Juda be bewura be adrasheŋ be nwɔl to nna.

³⁷ Saŋɛ so nɛ e daa la ewura na, nɛ Enyɛnpe Ebɔrɛ shuŋi Siriya be ewura Rezin nɛ Israɛl be ewura Pɛka fanɛ b ya kɔ Juda kena.

³⁸ Jotam ka wu, Jerusalɛm nɛ k la ewura Deevid be kade to na nɛ b daŋ puli mo nɛ mo pibinyɛn Ahaz sɔ mo so n ji kuwura.