2 Bewura 14 - EBƆRƐ BE KAWƆL

Juda be ewura Amaziya be asheŋ

¹ Jehowahaz pibinyɛn Jehɔash ka ji Israɛl be kuwura be kafɛ nyɔsopo to, nɛ Jɔash pibinyɛn Amaziya malɛ ki Juda be ewura.

² Amaziya ka ki ewura, nɛ e la nfɛ adunyɔ nɛ anu nna nseŋ ji kuwura Jerusalɛm to nfɛ adunyɔ nɛ akpanu. Mo nio be ketre e daa la Jehɔadin nɛ e shi Jerusalɛm.

³ Amaziya daŋ wora kusɔ nɛ k par Ebɔrɛ, ama mo alɛ daa maŋ wora kumo nɛ kagbene koŋwule fanɛ kananɛ mo nananyɛn ewura Deevid bre daa wora na. Kusɔ nɛ mo tuto Jɔash daŋ wora na gbagba nɛ mo alɛ gba daŋ wora.

⁴ Amaziya daa maŋ bure bumo be kakpa nɛ baa shuŋ agbir na amoso ndoŋ nɛ b daa lara bumo be esarga nsaa chɔɔ eduwu.

⁵ Mbe kuwurji ka baŋ yilito nɛnɛ, epul to nɛ e mɔ benimu nɛ b mɔ mo tuto ewura Jɔash na.

⁶ E daa maŋ mɔ bumo be mbia bre, ŋkpal manɛ so e daŋ bɛ kusɔ nɛ Enyɛnpe Ebɔrɛ kaŋɛ ashi Mosis be mbra to na so nna. E yɛ: “B sa maŋ kaŋ mɔ mbia bumo kurgepoana ŋkpal kulubi nɛ bumo be mbia wora so, loŋ koŋwule nɛ a maŋ daga b ka mɔ mbia ŋkpal kulubi nɛ bumo kurgepoana wora so. Ekama nɛ e wora kulubi, mo e daga kumo be kasogberge.”

⁷ Amaziya e daŋ mɔ Edɔmebi be benapo ŋgboŋ kudu ashi ketaŋɛ nɛ baa tre Nfɔl be ketaŋɛ na ase saŋɛ nɛ e daa la ewura na. E daŋ kɔ n sɔ kade nɛ baa tre Sɛla na gba nna nseŋ nase kumo be ketre Joktihiil. Loŋ be ketre nɛ kade na kra ji hale kabre.

⁸ Kachako nɛ Juda be ewura Amaziya shuŋi mbɔ Israɛl be ewura Jehɔash kutɔ n to mo emaŋ fanɛ b kɔ kena.

⁹ Ndoŋ nna nɛ Jehɔash malɛ ta le be kubɔya ere n sa Amaziya. E yɛ: “Kachako nɛ Lebanɔn be abee so be ewidibi fimbi ko ta kubɔya n sa kedibi tenteŋ gboŋgboŋi ko nɛ baa tre Sida na fanɛ k ta kumo pibiche n sa mo pibinyɛn nɛ e kil. Ndoŋ nna nɛ kupuŋ to be kusɔbɔya ko ba fefɛa ewidibi na to n lɛ.

¹⁰ Amaziya fee wu fo kumu naniere nna, ŋkpal fo ka pɔɔ Edɔmebi so so, ama mee kaŋɛ fo nna fanɛ fo shir a wɔ laŋ to. Sa maŋ kil asheŋ nɛ a beeŋ mur fo kuwurji nɛ fo basa.”

¹¹ Ama Amaziya daŋ kini kenu nna, nɛ ewura Jehɔash kpal loŋ so ŋ keta mbe benapo nɛ e ya kɔ mo kena ashi Bɛf Shɛmɛsh nɛ k wɔ Juda be efuli so na.

¹² Jehɔash be benapo daŋ kɔ m pɔɔ Amaziya be benapo kikɛ so nna nɛ b shile n yɔ bumo peana.

¹³ Ndoŋ nna nɛ Jɔash pɛ Amaziya nseŋ keta mo n yɔ Jerusalɛm n ya yili Efrayim be kabuna na ase m bure Jerusalɛm be egbal na fanɛ ayadra alfa ashe pɔɛŋ nseŋ fo kukɔlɔbi to be kabuna ase.

¹⁴ E daŋ muu bɔrɛlambu na to be shuwa nɛ gbiti nɛ kumo to be asɔwurbi kikɛ nna n ta ewura be laŋ to be ekpanjawu kikɛ, nseŋ pɛ basa n ti so m bɛta n yɔ Samɛria.

¹⁵ B daŋ sibɛ ewura Jehɔash be kuwurji be asheŋ nɛ mbe kenyɛn nɛ e ji nɛ kananɛ mo nɛ Juda be ewura Amaziya kɔ kena na be asheŋ kikɛ n wɔtɔ Israɛl be bewura be adrasheŋ be nwɔl to.

¹⁶ Jehɔash ka wu, kakpa nɛ baa puli Samɛria be bewura na nɛ b puli mo nɛ mo pibinyɛn Jeroboam nyɔsopo sɔ mo so n ji kuwura.

Juda be Ewura Amaziya be luwu be asheŋ

¹⁷ Israɛl be ewura Jehɔash ka wu be kaman nɛ Juda be ewura Amaziya naŋ ji nfɛ kuduanu n ti so.

¹⁸ Asɔ kama nɛ Amaziya wora saŋɛ so nɛ e daa la ewura na hale m ba wu na kikɛ be asheŋ wɔ Juda nɛ Israɛl be bewura be nwɔl to.

¹⁹ Baŋ yili saŋɛ so nɛ Amaziya kini kebaanu a sa Enyɛnpe Ebɔrɛ na, nɛ b fara a fin mo nɛ kulubi ashi Jerusalɛm to. Kumo so nɛ e shile n yɔ Lakish be kade to nɛ mo doŋana malɛ bɛ mo so n yɔ ndoŋ n ya mɔ mo.

²⁰ B daŋ ta mbe kebuni nna n deŋi gbaŋɛ so m ba puli kakpa nɛ baa puli bewura na ashi Jerusalɛm ewura Deevid be kade to.

²¹ Kumo be kaman nɛ Juda be basa buu mo pibinyɛn Uziya nɛ e ji nfɛ kuduashe na kuwura.

²² Uziya mo tuto ka wu na be kaman, nɛ e kɔ kena n sɔ Elaf nseŋ lɔŋɛ m pɔr kumo.

Israɛl be ewura Jeroboam nyɔsopo na be asheŋ

²³ Jɔash pibinyɛn Amaziya ka ji Juda be kuwura be nfɛ kuduanu to, nɛ Jehɔash malɛ pibinyɛn Jeroboam nyɔsopo ki Israɛl be ewura nseŋ chena Samɛria n ji kuwura nfɛ adena nɛ kako.

²⁴ Mo alɛ gba daŋ bɛ asheŋ nɛ Nebat pibinyɛn ewura Jeroboam nyɔsopo daŋ wora na so nna n shin Israɛlebi wora alubi ŋ gbiti Enyɛnpe Ebɔrɛ na.

²⁵ Mo e daŋ naŋ laŋɛ ŋ kɔ n sɔ Israɛl be efuli nɛ k yili Hamaf Paas be kelargato be esoso be kaba so n ya fo Teku wuso na be kelargato be kaseto be kaba so na kikɛ fanɛ kananɛ Enyɛnpe Israɛl be Ebɔrɛ na bɔla mbe kayɛrbi anebi Jona nɛ e la Amitai pibinyɛn nɛ e shi Gaaf Hifa na so n nase kumo be kɔnɔ na.

²⁶ Enyɛnpe Ebɔrɛ na daŋ chɛ ewura Jeroboam to nna nɛ e kɔ m pɔɔ so ŋkpal e ka wu kananɛ ekama, anya nɛ bumo nɛ b maŋ la anya kikɛ, wɔ kagbenejija nɛ tɔrɔ to, nɛ kananɛ esa kikɛ malɛ maŋ wɔtɔ nɛ e chɛ bumo to so.

²⁷ Ama ŋkpal k kaa daa maŋ la Enyɛnpe Ebɔrɛ na be kepar fanɛ e mur Israɛl be basa cheche so, e daŋ bɔla ewura Jeroboam so nna m mɔlga bumo.

²⁸ B sibɛ kusɔ kama nɛ ewura Jeroboam nyɔsopo daŋ wora nɛ ana nɛ e kɔ nɛ kananɛ e naŋ laŋɛ n sɔ Damaskɔs nɛ Hamaf n ti Israɛl be efuli so na kikɛ n wɔtɔ Israɛl be bewura be adrasheŋ be nwɔl to.

²⁹ Ewura Jeroboam nyɔsopo ka wu, kakpa nɛ baa puli bewura na nɛ b puli mo nɛ mo pibinyɛn Zakareya sɔ mo so n ji kuwura.