2 Bewura 13 - EBƆRƐ BE KAWƆL

Israɛl be ewura Jehowahaz be asheŋ

¹ Ahaziya pibinyɛn Jɔash ka ji Juda be kuwura be nfɛ adunyɔ nɛ asa to, nɛ Jehu pibinyɛn Jehowahaz malɛ ki Israɛl be ewura nseŋ ji kuwura Samɛria be kade to nfɛ kudu ashunu.

² Mo alɛ gba daŋ wora alubi ŋ gbiti Enyɛnpe Ebɔrɛ nɛ Israɛl be efuli fanɛ kananɛ Nebat pibinyɛn ewura Jeroboam daŋ wora na nna.

³ Ŋkpal loŋ so, Enyɛnpe Ebɔrɛ na daŋ nya agbo nna n wɔtɔ Israɛl nseŋ shin nɛ Siriya be ewura Haziɛl nɛ mo pibinyɛn Bɛnhadad kɔ m pɔɔ Israɛl so n ji bumo so kuwura saŋɛ tenteŋ.

⁴ Jehowahaz ka wu kananɛ Siriya be ewura na bee tɔrɔ bumo nsaa mɛaŋ bumo na nseŋ kule Enyɛnpe Ebɔrɛ nɛ e nu mbe kekule,

⁵ nseŋ lara esa ko fanɛ e ba sɔ Israɛl n yige. Ndoŋ nna nɛ Israɛlebi nya kayurwushi fanɛ kananɛ b daa kɔ sososo na.

⁶ Ama b maŋ yige kebaawora alubi nɛ ewura Jeroboam daŋ shin nɛ Israɛl wora na. B daŋ, yige kegbirche Ashira be kegbirdibi tenteŋ nɛ b yuu n yili Samɛria na nna.

⁷ Ŋkpal Siriya be ewura Haziɛl ka kɔ m pɔɔ Israɛl so nseŋ nɔkɔr bumo ga so, ewura Jehowahaz daa maŋ naa kɔ benapo damta, she egbaŋɛdiipo adunu nɛ egbaŋɛturko kudu nɛ benapo nɛ baa nite ayaso ŋgboŋ kudu nawule.

⁸ B sibɛ kusɔ kama nɛ ewura Jehowahaz wora nɛ kenyɛn nɛ e ji n wɔtɔ Israɛl be bewura be adrasheŋ be nwɔl to.

⁹ Ewura Jehowahaz ka wu, Samɛria nɛ b puli mo nɛ mo pibinyɛn Jehɔash sɔ mo so n ji kuwura.

Israɛl be ewura Jehɔash be asheŋ

¹⁰ Juda be ewura Jɔash ka ji kuwura be nfɛ adesa nɛ ashunu to, nɛ Jehowahaz pibinyɛn Jehɔash ki Israɛl be ewura nseŋ ji kuwura Samɛria to nfɛ kuduashe.

¹¹ Mo alɛ gba daŋ wora alubi nna ŋ gbiti Enyɛnpe Ebɔrɛ nseŋ bɛ ewura Jeroboam be aya so n wora alubi nɛ e ta Israɛl wɔtɔ to na.

¹² B sibɛ kusɔ kama nɛ Jehɔash daŋ wora, mbe kenyɛn nɛ e ji nɛ kananɛ e kɔ Juda be ewura Amaziya kena na kikɛ be asheŋ n wɔtɔ Israɛl be bewura be adrasheŋ be nwɔl to.

¹³ Jehɔash ka wu, kakpa nɛ baa puli bewura ashi Samɛria na nɛ b puli mo nɛ mo pibinyɛn Jeroboam nyɔsopo sɔ mo so n ji kuwura.

Anebi Elaisha be luwu be asheŋ

¹⁴ Jemanɛ ko ka ba fo nɛ kulɔ lubi ko pɛ Elaisha nɛ e bee sha kewu, ndoŋ nna nɛ Israɛl be ewura Jehɔash yɔ nɛ e ya bɔ mo so. Jehɔash ka yili mo kutɔ, nɛ e shu ŋ kaŋɛ le: “N tuto! Fo e la Israɛl be ekumpo lempo! Manɛ nɛ anyeeŋ tiŋ n wora nɛ fo maŋ wɔtɔ?”

¹⁵ Ndoŋ nna nɛ Elaisha kaŋɛ mo le: “Ya fin keta nɛ kumo be atanyembi m ba!” Nɛ Jehɔash ya fin amo.

¹⁶ Nɛ Elaisha kaŋɛ mo fanɛ e pɛ amo to ŋ keta. Ewura na ka wora loŋ n loge nɛ Elaisha ta mbe enɔ n deŋi ewura na be enɔ so nseŋ kaŋɛ mo le:

¹⁷ “Bugi epeŋilarkpa be tokuro nɛ k shoŋi Siriya be efuli be kaba so na.” Nɛ ewura na bugi kumo. Ndoŋ nna nɛ Elaisha kaŋɛ: “To ketanyembi na.” Ewura na ka to keta na nɛ anebi na kaŋɛ le: “Fo e la Enyɛnpe Ebɔrɛ be ketanyembi nɛ e beeŋ ta ŋ kɔ m pɔɔ Siriya so na. Feeŋ kɔ Siriyaebi na ashi Afɛk m mur bumo kikɛ.”

¹⁸ Kumo be kaman nɛ Elaisha kaŋɛ ewura na fanɛ e ta atanyembi nɛ a ka na ŋ ŋmɛa kasawule. Nɛ ewura na ta amo ŋ ŋmɛa kasawule ale asa.

¹⁹ Ewura na ka wora loŋ nɛ anebi Elaisha nya agbo n wɔtɔ mo nseŋ kaŋɛ: “A daŋ daga fo ka ŋmɛa kasawule na ale anu ŋko ale ashe nna. Loŋ nɛ fo daa beeŋ kɔ m pɔɔ Siriyaebi na so cheche ama naniere feeŋ kɔ m pɔɔ bumo so ale asa nawule nna.”

²⁰ Asheŋ ere be kaman nɛ anebi Elaisha wu nɛ b puli mo. Kafɛ kikɛ malɛ be dɔchubɔrɛ so, Mowabebi be bejuŋkparpo bee shuŋi bumo be basa nɛ baa ta kena a purgi na nna nɛ b ba Israɛl be efuli so.

²¹ Kachako, Israɛl be esa ko ka wu nɛ b ya kaa puli mo, nseŋ wu Mowabebi be benapo nɛ baa ta kena a purgi na be katuŋ ko ka bee ba nɛ b ta ebuni na n lɛ anebi Elaisha be kejembu laŋ be nchaŋ to nseŋ shile. Ebuni na ka baŋ beta anebi Elaisha be awibi, nɛ e tiŋi epul na to.

Israɛl nɛ Siriya be kena be asheŋ

²² Saŋɛ so nɛ Jehowahaz daa la ewura na kikɛ, nɛ Siriya be ewura Haziɛl e daa ji Israɛl be efuli na so eleŋ.

²³ Enyɛnpe Ebɔrɛ na daa wu Israɛlebi kuwɔr nna nsaa maa sha b ka mur ŋkpal mo nɛ bumo nananyɛnana Eebraham nɛ Aizek nɛ Jeekɔb be kɔnɔkoŋwule be ŋkre na so.

²⁴ Ewura Haziɛl ka wu, mo pibinyɛn Bɛnhadad e ji Siriya be kuwura.

²⁵ Ndoŋ nna nɛ Jehowahaz pibinyɛn Jehɔash ya kɔ m pɔɔ Bɛnhadad so nseŋ sɔ nde nɛ ewura Haziɛl daŋ kɔ n sɔ mo tuto Jehowahaz kutɔ na. Ale asa kikɛ nɛ Jehɔash kɔ m pɔɔ mo so.