1 Kronikɛls 22 - EBƆRƐ BE KAWƆL

¹ Amoso le nɛ ewura Deevid daŋ kaŋɛ: “Kugooro ere so nfe ashi Jerusalɛm nɛ baaŋ pɔr Enyɛnpe Ebɔrɛ be bɔrɛlambu na, nɛ bɔrɛsure nɛ Israɛlebi beeŋ baa lara esarga kumo so na gba e baa wɔ nfe.”

B ka wora bɔrɛlambu na be kepɔr be shiriya be asheŋ

² Ŋkpal loŋ so ewura Deevid daŋ shin nɛ befɔ nɛ b wɔ Israɛl na kikɛ daŋ ba shɛr Jerusalɛm nna, nɛ e shin nɛ bumo be beko bee kuya ajembu be ebirkesi nɛ a shishi nɛ b pɔr bɔrɛlambu na.

³ E daŋ fin abɛlso damta nɛ baaŋ ta n lɔŋɛ anyembi nɛ asɔ nɛ baaŋ ta ŋ gbir akuloŋ m mata nna, nseŋ bar danyaŋ damta nɛ b maŋ tiŋ ŋ karga amo be egbɛ.

⁴ E daŋ ŋ kla nna n shoŋi Tayɛ nɛ Sidɔn be basa nɛ b bar mo sida be ndibi damta.

⁵ Le nɛ ewura Deevid daŋ kaŋɛ: “Bɔrɛlambu nɛ m pibinyɛn Sɔlɔmɔn beeŋ pɔr na beeŋ baa walɛ m baŋ so nɛ durnya kikɛ e nu kumo be asheŋ. Ama ŋkpal e ka kraa la kebia a maŋ naŋ pin asɔ damta to na so, a daga fanɛ n wora kumo be shiriya n yili mo.” Amoso ewura Deevid daŋ fin bɔrɛlambu na be kapɔr be asɔ damta nna n yili pɔɛŋ nseŋ wu.

⁶ Ndoŋ nna nɛ ewura Deevid shuŋi n tre mo pibinyɛn Sɔlɔmɔn ŋ kaŋɛ mo fanɛ e pɔr bɔrɛlambu n sa Enyɛnpe, Israɛl be Ebɔrɛ na.

⁷ Le nɛ Deevid kaŋɛ mo: “M pibinyɛn, n daa sha fanɛ m pɔr bɔrɛlambu nna m maŋkura Enyɛnpe Ebɔrɛ na.

⁸ Ama Ebɔrɛ daŋ kaŋɛ ma nna fanɛ ŋkpal ŋ ka kɔ ana damta nseŋ mɔ basa ga na so, e maaŋ shin nɛ m pɔr bɔrɛlambu n sa mo.

⁹ Enyɛnpe na malɛ teŋ juŋkpar n nase le be kɔnɔ n sa ma: Fo pibi kaŋ ba ki ewura meeŋ shin nɛ kagbenewushi e baa wɔ mbe kasawule so. Kebia na be ketre e naŋ ba la Sɔlɔmɔn ŋkpal manɛ so mbe kuwurji be saŋɛ nɛ meeŋ kuŋ Israɛl nɛnɛ nɛ kagbenewushi e baa wɔ kumo to.

¹⁰ Mo e naŋ pɔr bɔrɛlambu n sa ma. Meeŋ tre mo m pibi nɛ mo alɛ gba e tre ma mo tuto. Mbe mbia e naa baa ji Israɛl be kuwura a ka a sa abar mbaanaayɔ.”

¹¹ Kumo be kaman nɛ Deevid yɛ: “M pibinyɛn Sɔlɔmɔn, Enyɛnpe fo Ebɔrɛ na e baa wɔ fo kutɔ n shin nɛ kɔnɔ nɛ e nase fanɛ e beeŋ chɛ fo to nɛ fo pɔr bɔrɛlambu n sa mo na e bɔlɔ so.

¹² Enyɛnpe nɛ e la fo Ebɔrɛ na e sa fo kanyiasheŋ nɛ nfɛra nɛ fo baa wora asheŋ amo be ekpa so, nseŋ juŋkpar Israɛl ashi mbe mbra be ekpa so nɛnɛ.

¹³ Fo baa bɛ mbra nɛ keŋini nɛ Enyɛnpe Ebɔrɛ ta n sa an nananyɛn Mosis dra dra na fanɛ e ta n sa Israɛlebi na so bre, asheŋ beeŋ nyalɛ n sa fo. Ama baa yil to kpakpa a leŋ fo kumu to nsaa maa lɔ kufu.

¹⁴ N wora ania n gama asɔ damta nɛ a daga fanɛ b ta m pɔr bɔrɛlambu na abar so. Ŋ kɔ shuwa nɛ amo be egbɛ sa fanɛ kilo ŋgboŋto ŋgboŋto be ŋgboŋ asa nɛ ŋgboŋ alfa ana, nɛ gbiti nɛ amo alɛ be egbɛ sa fanɛ kilo ŋgboŋto ŋgboŋto be ŋgboŋ adesa nɛ ana, nɛ fo ta n lɔŋɛ bɔrɛlambu na. Ŋ kɔ ndibi nɛ ajembu lela nɛ danyaŋ nɛ abɛlso damta nɛ maaŋ tiŋ ŋ karga amo be egbɛ gba. Ama fo alɛ gba kraŋ beeŋ tiŋ m bishi kusɔ kama nɛ fee sha n ti so.

¹⁵ Men kɔ beshumpo damta. Basa nɛ baa bure ajembu to nɛ bepɔrpo nɛ ekapɛnta nɛ basa damta nɛ b nyi enɔ to be ashuŋ damta

¹⁶ nsaa tiŋ a ta shuwa nɛ gbiti nɛ danyaŋ nɛ kebɛlso a lɔŋɛ asɔ. K daga fanɛ men fara kushuŋ na naniere nɛ Enyɛnpe Ebɔrɛ na e chɛ menyi to.”

¹⁷ Kede be kaman nɛ ewura Deevid kaŋɛ Israɛl be bejuŋkparpoana nna fanɛ b chɛ Sɔlɔmɔn to.

¹⁸ E yɛ: “Enyɛnpe men be Ebɔrɛ na e chɛ menyi to nseŋ sa menyi kagbenewushi ekpa kama so. E chɛ ma to nɛ ŋ kɔ m pɔɔ basa nɛ b daa wɔ kasawule na so nseŋ shin nɛ baa shuŋ ma nɛ Enyɛnpe Ebɔrɛ na.

¹⁹ Men ta men be ŋgbene nɛ men be ayoyu kikɛ a shuŋ Ebɔrɛ. Men fara a pɔr bɔrɛlambu na saŋɛ na so menyeeŋ ta Enyɛnpe Ebɔrɛ be ŋkre be deka na nɛ asɔ cheembi nɛ b kɔ a bunyaŋ Enyɛnpe Ebɔrɛ na n ya yili kumo to.”