1 Kronikɛls 14 - EBƆRƐ BE KAWƆL

Kaboŋ nɛ ewura Deevid daa wɔ ashi Jerusalɛm be asheŋ

¹ Tai be ewura Hiram daŋ shuŋi mbɔ ewura Deevid kutɔ nna. E daŋ shuŋi ekapɛnta nɛ basa nɛ baa ta ajembu a pɔr nna nseŋ ta ndibi nɛ baa tre sida na n ti so fanɛ b ya pɔr ewura be laŋ n sa Deevid.

² Nɛ Deevid pin fanɛ Enyɛnpe Ebɔrɛ na e yili kumo kashenteŋto fanɛ e ki Israɛl be ewura nseŋ kpal mbe basa Israɛlebi so a nɛfa mbe kuwurji.

³ Deevid ka lar Hibrɔn m ba Jerusalɛm na, e daŋ ta beche damta nna ŋ kurge mbinyɛnsobi nɛ mbichesobi damta.

⁴ Mbia nɛ e daŋ kurge Jerusalɛm to e la Shamua nɛ Shobab nɛ Neetan nɛ Sɔlɔmɔn nɛ

⁵ Ibhar nɛ Elishuwa nɛ Elpelɛt nɛ

⁶ Noga nɛ Nefɛg nɛ Jafaya nɛ

⁷ Elishama nɛ Beeliada nɛ Elefilɛt.

Ewura Deevid ka kɔ m pɔɔ Filistiebi na so be asheŋ

⁸ Filistiebi na ka nu fanɛ Deevid e ki Israɛl be efuli so kikɛ be ewura, nɛ bumo be benapo kikɛ ya ka fin mo nɛ b pɛ. Ndoŋ nna nɛ ewura Deevid bela ase nɛ e ya n ya tu bumo.

⁹ Loŋ be jemanɛ na nɛ Filistiebi be benapo na ta kena n ya purgi Refaebi be ketaŋɛ to be ndeana nsaa muu bumo be asɔ.

¹⁰ Kumo be kaman nɛ Deevid bishi Enyɛnpe Ebɔrɛ le: “K daga ŋ ka ya kɔ Filistiebi ere kena a? Feeŋ chɛ ma to nɛ ŋ kɔ m pɔɔ bumo so a?” Nɛ Enyɛnpe Ebɔrɛ shuli so ŋ kaŋɛ: “Mm, ya kɔ bumo! Ŋkpal manɛ so, meeŋ shin nɛ fo kɔ m pɔɔ so kashenteŋto!”

¹¹ Ndoŋ nna nɛ Deevid nɛ mbe benapo yɔ Baal Pɛrazim n ya kɔ m pɔɔ Filistiebi na so, nseŋ kaŋɛ le: “Enyɛnpe Ebɔrɛ bure n luri ma doŋana na to fanɛ kananɛ nchu bee bɔlɔ a luri kakpa na. Ndoŋ nna nɛ e nase kaboŋ na Baal Perazim. Kumo be kifito e la Enyɛnpe Ebɔrɛ nɛ e bee bure e luri to na.”

¹² Filistiebi be benapo na ka shile n yige bumo be agbir na nɛ Deevid kaŋɛ mbe benapo na fanɛ b ya chɔɔ amo.

¹³ K maŋ chɛr ko nɛ Filistiebi be benapo na naŋ bɛta n ta kena n ya purgi Refaebi be ketaŋɛ na to be nde kikɛ.

¹⁴ Nɛ Deevid naŋ bishi Enyɛnpe Ebɔrɛ kusɔ nɛ e beeŋ wora, nɛ Enyɛnpe Ebɔrɛ kaŋɛ mo le: “Men sa maŋ kaŋ ta kena n tu bumo nfe, ama men wora shiriya a kulti bumo a yɔ ndibi nɛ baa tre balsam ere ase n ya kɔ bumo ndoŋ.

¹⁵ Men ka baŋ nu awɔr ka shi ndibi na so a ba fanɛ benapo ka bɛ abar so a nite na, kumo ere men fara a kɔ bumo, ŋkpal manɛ so meeŋ juŋkpar menyi n ya kɔ m pɔɔ Filistiebi be benapo na so.”

¹⁶ Ndoŋ nna nɛ Deevid wora kusɔ nɛ Enyɛnpe Ebɔrɛ kaŋɛ na nseŋ yili Gibiɔn n ju Filisti be benapo na kikɛ n ya fo Gɛza.

¹⁷ Amoso Deevid be ketre daŋ dii n yɔ kaplɛkama nna, nɛ Enyɛnpe Ebɔrɛ shin nɛ efuli kama so ebi bee ŋana mo.