1 Kronikɛls 10 - EBƆRƐ BE KAWƆL

Ewura Sɔɔl be luwu be asheŋ

¹ Kebeegboŋ nɛ baa tre Gilbɔa na so nɛ Filistiebi na daŋ yili a kɔ Israɛlebi na. B daŋ mɔ Israɛlebi na be bedamta kena na to nna nɛ bumo nɛ b ka na nɛ ewura Sɔɔl nɛ mbe mbinyɛnsobi shile.

² Filistiebi na daŋ ju m buu Sɔɔl nɛ mbe mbia na so nna n ya mɔ Sɔɔl be mbinyɛnsobi asa, Jonatan nɛ Abinadab nɛ Malkishuwa.

³ Kena na be kenishipere be kakpa nɛ Sɔɔl daa wɔ, ŋkpal loŋ so bedoŋ na be atanyembi daŋ da mo nna n doro mo alegaiso.

⁴ Nɛ Sɔɔl kaŋɛ enapo nɛ e bee sulɔ mbe akɔsɔ na le: “Pee fo tokobi m mɔ ma! M maa sha Filistiebi, nnyamase ere ka wora ma eyurto nseŋ mɔ ma.” Ama enapo na daŋ kini kewora loŋ nna ŋkpal kufu ka daŋ pɛ mo ga so. Ndoŋ nna nɛ Sɔɔl ta mo gbagba be tokobi be kumu ase n yuu kasawule nseŋ tɔr kumo so.

⁵ Enapo nɛ e bee sulɔ Sɔɔl be akɔsɔ na ka wu fanɛ Sɔɔl wu na, nɛ mo alɛ gba wora kananɛ Sɔɔl wora na gbagba m mɔ mbe kumu.

⁶ Kananɛ Sɔɔl nɛ mbe mbinyɛnsobi asa nɛ mo kurgepoana nyɛnso kikɛ daŋ wu kachɛ koŋwule nna na. Kachɛ koŋwule na nɛ Sɔɔl nɛ mbe benapo na kikɛ daŋ wu.

⁷ Israɛlebi nɛ b wɔ Jizreel be ketaŋɛ to na ka nu fanɛ Israɛl be benapo shile nɛ b mɔ Sɔɔl nɛ mbe mbinyɛnsobi, nɛ bumo alɛ gba shile ŋ ka bumo be nde, nɛ Filistiebi na ba sɔ amo n chena.

⁸ B ka kɔ kena na ŋ ŋklade na nɛ Filistiebi na yɔ nɛ b ya muu bubuni na be asɔ, nseŋ ya wu Sɔɔl nɛ mbe mbinyɛnsobi asa na nɛ b wu a dese kebeegboŋ nɛ baa tre Gilbɔa na so.

⁹ Ndoŋ nna nɛ Filistiebi na ku Sɔɔl be kumu nseŋ gbaŋ mbe kenyɛnkale nseŋ shuŋi mbɔ fanɛ b nite Filisti be efuli so be agbirlambu to nɛ kaplɛkama nɛ bumo be basa wɔ m bɔ baru lela ere.

¹⁰ Kumo be kaman nɛ b ta mbe kena to be akɔsɔ na n ya yili bumo be agbir be lambu ko to nseŋ ta mbe kumu na malɛ n shiga bumo be kegbir Dagɔn be lambu to.

¹¹ Jabesh be basa nɛ b wɔ Giliad na ka nu kusɔ nɛ Filistiebi na wora Sɔɔl na,

¹² nɛ bumo be basa nɛ b kɔ kenyɛn ga na koso n ya ta Sɔɔl nɛ mbe mbinyɛnsobi na be kebuni n yɔ Jabesh n ya puli kedibi gboŋgboŋi ko be kifito, nseŋ kishi nchɛ ashunu a ŋini kananɛ bumo be ŋgbene daŋ jija bumo.

¹³ Sɔɔl ka daa maa ji kashenteŋ a sa Enyɛnpe Ebɔrɛ so nɛ e daŋ wu na. E daŋ kini kebɛ Ebɔrɛ be mbra so nna nsaa yɔ belejipo kutɔ n ya ka kpal.

¹⁴ Loŋ so nɛ Enyɛnpe Ebɔrɛ daŋ shin nɛ e wu nɛ e ta mbe kuwurji n sa Jɛsi pibinyɛn Deevid na.