1 Bewura 22 - EBƆRƐ BE KAWƆL

Anebi Mikaya ka kpele Ahab kusoe be asheŋ

¹ Nfɛ asa nɛ Israɛlebi nɛ Siriyaebi maa kɔ kena.

² Kafɛ sasopo na to nɛ Juda be ewura Jehoshafat yɔ nɛ e ya bɔɔ Israɛl be ewura Ahab so.

³ Ndoŋ nna nɛ Ahab kaŋɛ mbe benimuana le: “Manɛ nna nɛ anyi maaŋ wora ania ŋ kɔ n sɔ Ramɔf nɛ k wɔ Giliad na ashi Siriya be ewura na be enɔ to? Efuli na la anyi peya nna!”

⁴ Kede be kaman nɛ ewura Ahab bishi ewura Jehoshafat le: “Feeŋ tu ma n ya kɔ Ramɔfebi kena a?” Nɛ ewura Jehoshafat kaŋɛ: “Saŋkama nɛ fo wora shiriya ma alɛ gba wora shiriya nɛ ma benapo nɛ benapo nɛ baa dii egbaŋɛ a kɔ na kikɛ gba wora shiriya. Anyeeŋ tu fo n yɔ.”

⁵ Nseŋ naŋ kaŋɛ le: “Ama pɔɛŋ nɛ an wora loŋ, a daga an ka pin Enyɛnpe Ebɔrɛ be nfɛra.”

⁶ Ndoŋ nna nɛ ewura Ahab tre anebiana alfa ana, m bishi bumo le: “N ya kɔ Ramɔfebi kena ŋko n sa maŋ yɔ?” Nɛ bumo alɛ kaŋɛ le: “Ya kɔ kumo, ŋkpal manɛ so Enyɛnpe Ebɔrɛ na beeŋ shin nɛ fo kɔ n sɔ kumo.”

⁷ Nɛ ewura Jehoshafat naŋ bishi: “Ama anebi kama maŋ naa wɔtɔ nɛ an ya sɔ Enyɛnpe Ebɔrɛ be nfɛra mo kutɔ n ti so a?”

⁸ Nɛ ewura Ahab kaŋɛ le: “Ekoŋwule ko kraa wɔtɔ nɛ anyeeŋ tiŋ n wu mo, mo e la Imla pibinyɛn Mikaya ama ŋ kishi mbe asheŋ ga ŋkpal manɛ so kusɔ kama nɛ e wu ŋ kaŋɛ ma maa walɛ.” Nɛ Jehoshafat kaŋɛ: “Sa maŋ kaŋ kaŋɛ loŋ!”

⁹ Ndoŋ nna nɛ ewura Ahab tre mbe benimu na be eko n shuŋi mo fanɛ e ya tre Mikaya m ba epul na to.

¹⁰ Bewura anyɔ na daŋ buu bumo be ewurpiŋi nna a tase bumo be nwurputi so ashi kugooro bri asɔ nɛ k wɔ Samɛria be kabunagboŋ na be ekarso na so, nɛ anebiana na kikɛ yil bumo be anishito a kaŋɛ kusɔ nɛ Ebɔrɛ kaŋɛ.

¹¹ Chinana pibinyɛn Zɛdikaya nɛ e la anebiana be eko bre daŋ bɛl abɛlso be alambɛ nna nseŋ kaŋɛ ewura Ahab le: “Enyɛnpe Ebɔrɛ yɛ, le be kusɔ ere nɛ feeŋ ta ŋ kɔ Siriyaebi na kena m pɔɔ bumo so cheche.”

¹² Anebiana na kikɛ daŋ kaŋɛ le nna: “Men ya kɔ Ramɔfebi. Enyɛnpe Ebɔrɛ na beeŋ shin nɛ men kɔ m pɔɔ so.”

¹³ Esa nɛ e daŋ yɔ Mikaya kutɔ na daŋ ya kaŋɛ mo nna le: “Anebiana na kikɛ daŋ wu ŋ kaŋɛ nna fanɛ ewura na beeŋ kɔ m pɔɔ so, amoso fo alɛ gba e ya kaŋɛ loŋ.”

¹⁴ Ama le nɛ anebi Mikaya daŋ kaŋɛ: “Kusɔ nɛ Enyɛnpe Ebɔrɛ nɛ e wɔ ŋkpa to na kaŋɛ ma nɛ meeŋ kaŋɛ!”

¹⁵ Amoso e ka yɔ ewura Ahab kutɔ, le nɛ e daŋ bishi mo: “Mikaya, k daga fanɛ ma nɛ ewura Jehoshafat ka ya kɔ Ramɔfebi kena ŋko k maŋ daga?” Nɛ anebi Mikaya kaŋɛ: “Men ya kɔ, ŋkpal manɛ so menyeeŋ pɔɔ so. Enyɛnpe Ebɔrɛ na beeŋ shin nɛ men kɔ m pɔɔ so.”

¹⁶ Nɛ ewura Ahab naŋ kaŋɛ: “Ŋ kaŋɛ fo alɛ damta fanɛ, fo baŋ yili Enyɛnpe Ebɔrɛ na be ketre to a malga, a daga fanɛ fo baa malga kashenteŋ! Alɛ fanɛ nɛ fee sha ŋ ka kaŋɛ fo le be kasheŋ?”

¹⁷ Ndoŋ nna nɛ anebi Mikaya naŋ kaŋɛ le: “N wu Israɛl be benapo na ka pesaŋ to n sɔ abee so fanɛ mbolpɔ nɛ b maŋ kɔ ekpapo na. Nɛ Enyɛnpe Ebɔrɛ kaŋɛ le: ‘Basa ere maŋ kɔ ejuŋkparpo, shin nɛ b ta kagbenewushi a yɔ epe.’ ”

¹⁸ Nɛ ewura Ahab kilgi ŋ kaŋɛ ewura Jehoshafat le: “N chɛr ŋ kaŋɛ fo fanɛ e maa wu asheŋ lela kikɛ a kaŋɛ ma kaplɛa so. Saŋkama asheŋ lubi nɛ e bee kaŋɛ a yɔ ma kaplɛa so!”

¹⁹ Nɛ anebi Mikaya kraa malga nseŋ kaŋɛ le: “Nu! N wu Enyɛnpe Ebɔrɛ na ka chena mbe kuwurputi so nɛ mbe emalaika kikɛ kulti mo ashi Ebɔrɛso,

²⁰ nɛ e kaŋɛ le: ‘Wanɛ e naaŋ tiŋ n shin nɛ ewura Ahab e yɔ Ramɔf nɛ b ya mɔ mo ndoŋ?’ Nɛ emalaika na be beko malga asheŋ ko nɛ beko malɛ malga asheŋ pɔtɛ.

²¹ Kumo be kaman nɛ kiyoyu lar m ba Enyɛnpe Ebɔrɛ be anishito m ba kaŋɛ le: ‘Meeŋ tiŋ n shin nɛ e yɔ.’

²² Nɛ Enyɛnpe Ebɔrɛ bishi mo le: ‘Ekpa mo so nɛ feeŋ bɔla n shin nɛ e yɔ?’ Nɛ kiyoyu na kaŋɛ: ‘Meeŋ ya shin nɛ Ahab be anebiana kikɛ e fule mo.’ ” Nɛ Enyɛnpe Ebɔrɛ na kaŋɛ: “Ya wora loŋ. Feeŋ pɔɔ so.”

²³ Kumo be kaman nɛ anebi Mikaya malga mbe lalaloge be kamalga ŋ kaŋɛ le: “Kusɔ nɛ k wora e la fanɛ Enyɛnpe Ebɔrɛ na e sa ekpa nɛ fo gbagba be anebiana kini keji fo kashenteŋ. Ama mo alɛ gbagba nyi fo ka beeŋ mur!”

²⁴ Ndoŋ nna nɛ anebi Zɛdikaya yɔ anebi Mikaya kutɔ n ya kpa mo etaŋ anishito nseŋ bishi mo le: “Saŋɛ mo nɛ Enyɛnpe Ebɔrɛ yige ma nseŋ ya malga fo kutɔ?”

²⁵ Nɛ anebi Mikaya kaŋɛ mo le: “Kachɛ nɛ feeŋ shile ŋkpal fo doŋana so n ya ŋana ebu nɛ k wɔ ketamanto na, nɛ feeŋ pin kumo be kashenteŋ.”

²⁶ Nɛ ewura Ahab ponte ŋ kaŋɛ le: “Men pɛ Mikaya n yɔ Ammɔn nɛ e la Samɛria be kade to be gomena na, nɛ ewurbi Jɔash kutɔ,

²⁷ n ya kaŋɛ bumo fanɛ b ti mo ebu n sa maŋ kaŋ sa mo ajibi kikɛ ama bodobodo nɛ nchu nawule hale nɛ n ya shi kena na to m bɛta m ba nɛ alenfia pɔɛŋ.”

²⁸ Nɛ anebi Mikaya kaŋɛ le: “Fo baŋ bɛta m ba nɛ alenfia bre, kumo ere mannɛ Enyɛnpe Ebɔrɛ na e malga n sa ma!” Nseŋ kilgi ŋ kaŋɛ jimaŋ na le: “Men sa maŋ kaŋ teŋ kusɔ nɛ ŋ kaŋɛ ere so.”

Ahab be luwu be asheŋ

²⁹ Ndoŋ nna nɛ Israɛl be ewura Ahab nɛ Juda be ewura Jehoshafat yɔ nɛ b ya kɔ Siriya be ewura kena ashi Ramɔf nɛ k wɔ Giliad na.

³⁰ Nɛ ewura Ahab kaŋɛ ewura Jehoshafat le: “An kaŋ baŋ yɔ kena na to, meeŋ chɛrga ma ewurpiŋi saŋɛ na so b maaŋ naŋ pin fanɛ n la ewura, ama fo ere beeŋ tiŋ m buu feya.” Amoso Israɛl be ewura na bre daa maŋ buu mbe ewurpiŋi n yɔ kena na to.

³¹ Siriya be ewura na daŋ kaŋɛ mbe benapo adesa nɛ anyɔ nɛ baa ta egbaŋɛturko a kɔ kena na be benimu nna fanɛ b sa maŋ kaŋ kɔ esa kikɛ ama Israɛl be ewura na nawule.

³² Amoso Siriya be benapo na ka wu ewura Jehoshafat na, nɛ b fɛ fanɛ mo e la Israɛl be ewura na nsaa shin nɛ b kɔ mo kena. Ndoŋ nna nɛ ewura Jehoshafat shu n tre Enyɛnpe Ebɔrɛ na nɛ Ebɔrɛ shin nɛ benapo na yige mo.

³³ Amoso Siriya be benapo ka wu fanɛ mannɛ Israɛl be ewura Ahab nna nɛ b yige keyakɔ bumo kena.

³⁴ Ama kena na to nɛ Siriya be enapo ko to keta n lɛ kanaŋkama, nɛ k ya bɔla ewura Ahab be asɔkuŋso anyɔ be kefɛato n da mo. Ndoŋ nna nɛ Ahab kaŋɛ mbe gbaŋɛturkodiipo le: “B doro ma! Ta ma n lar kena ere to manaŋ!”

³⁵ B ka bee kɔ kena na kacha lelemu kikɛ na, nɛ ewura Ahab gbar mbe gbaŋɛturko to a keni Siriyaebi na. Nɛ kakpa nɛ ketanyembi na da mo na shile ŋklaŋ hale nɛ mbe gbaŋɛturko kikɛ to sɔ ŋklaŋ. Epeŋi ka bee tɔr nɛ e wu.

³⁶ Epeŋi ka bee tɔr, nɛ Israɛl be benapo na be eko ponte awɔrso ŋ kaŋɛ mo braana le: “Ekama e yige kena na be kekɔ nseŋ bɛta a yɔ epe!”

³⁷ Ndoŋ nna nɛ b ta ewura Ahab n yɔ Samɛria n ya puli.

³⁸ Kepa nɛ k wɔ Samɛria nɛ esakale bee bɛr kumo to na nɛ b daŋ ya fɔr ewura Ahab be gbaŋɛturko na be ŋklaŋ na n wɔtɔ. Nɛ njɔnɔ dente mbe ŋklaŋ nɛ a wurge kasawule na n ji nɛ kusɔ nɛ Enyɛnpe Ebɔrɛ kaŋɛ na bɔlɔ so chap.

³⁹ B sibɛ kusɔ kama nɛ ewura Ahab wora, kananɛ e ta asɔlnyii n lɔŋɛ ewura be laŋ, nɛ nde nɛ e pɔr na kikɛ be asheŋ n wɔtɔ Israɛl be bewura be adrasheŋ be nwɔl to.

⁴⁰ Ewura Ahab ka wu, mo pibinyɛn Ahaziya e sɔ mo so n ji kuwura.

Juda be ewura Jehoshafat be asheŋ

⁴¹ Israɛl be ewura Ahab ka ji kuwura be kafɛ nasopo to nɛ Asa malɛ pibinyɛn Jehoshafat ki Juda be ewura.

⁴² Ewura Jehoshafat daŋ fo nfɛ adesa nɛ anu nna pɔɛŋ nseŋ ki Juda be ewura ama nfɛ adunyɔ nɛ anu nɛ e daŋ chena Jerusalɛm n ji kuwura. Mo nio e daa la Shilhi pibiche Azuba.

⁴³ Ewura Jehoshafat daŋ bɛ mo tuto Asa be aya so nna n wora kusɔ nɛ k walɛ Enyɛnpe Ebɔrɛ be anishito. Ama e daŋ maŋ jija mboŋ nɛ baa shuŋ nnyamase be agbirana na nɛ basa na kraŋ nya ekpa a lara esarga nsaa chɔɔ eduwu ndoŋ.

⁴⁴ Ewura Jehoshafat nɛ Israɛl be ewura daŋ maa kɔ abar kena.

⁴⁵ B daŋ sibɛ kusɔ kama nɛ Jehoshafat daŋ wora nɛ mbe kenyɛn nɛ e ji kikɛ nɛ ana nɛ e kɔ kikɛ nna n wɔtɔ Juda be bewura be adrasheŋ be nwɔl to.

⁴⁶ E daŋ ju esakalenyɛn nɛ becheso kikɛ nɛ b daa wɔtɔ a shuŋ agbirlambu to jemanɛ nɛ mo tuto Asa daa ji kuwurji na kikɛ na nna.

⁴⁷ Loŋ be jemanɛ na nɛ Edɔm be efuli so maŋ kɔ ewura, amoso Juda be ewura e daŋ lara mbe ebɛsopo nɛ e bee ji kumo be kuwura.

⁴⁸ Ewura Jehoshafat daŋ shin nna nɛ b lɔŋɛ nchu so be ekuloŋgboŋana, nɛ b ba ta a yɔ Ɔfir be kasawule so n ya kaa tɔ shuwa, ama a daŋ mur ashi Eziɔngɛba nna. A daŋ maŋ tiŋ n nite nchu so kikɛ.

⁴⁹ Ndoŋ nna nɛ ewura Ahab pibinyɛn Ahaziya nɛ e la Israɛl be ewura na kaŋɛ ewura Jehoshafat fanɛ e shin nɛ bumo be nchu so be beshumpo e baa cha abar to a shuŋ nɛ Jehoshafat kini.

⁵⁰ Ewura Jehoshafat ka wu, kakpa nɛ baa puli bewura Jerusalɛm ashi ewura Deevid be kade to na, nɛ b daŋ puli mo alɛ gba, nɛ mo pibinyɛn Jehoram sɔ mo so n ji kuwura.

⁵¹ Ewura Jehoshafat ka ji Juda be kuwura be kafɛ kuduashunusopo to nɛ Ahab malɛ pibinyɛn Ahaziya ki Israɛl be ewura nseŋ ji kuwura Samɛria to nfɛ anyɔ.

⁵² E daŋ wora kulubi nna ŋ gbiti Enyɛnpe Ebɔrɛ ŋkpal e ka daŋ bɛ mo tuto Ahab nɛ mo nio Jɛzebel nɛ ewura Jeroboam mo nɛ e shin nɛ Israɛlebi luri kulubi to so.

⁵³ E daŋ shuŋ Baal be kegbir fanɛ kananɛ mo tuto daŋ shuŋ kumo na nna nɛ kumo be loŋ shin nɛ Enyɛnpe Israɛl be Ebɔrɛ na be agbo kaa.