1 Bewura 20 - EBƆRƐ BE KAWƆL

Israɛlebi ka ya kɔ Siriyaebi kena be asheŋ

¹ Siriya be efuli so be ewura Bɛnhadad daŋ tre mbe benapo kikɛ nna m ba abar so nɛ bewura adesa nɛ anyɔ ko gba nɛ bumo be egbaŋɛ nɛ egbaŋɛturko ba ti bumo so nɛ b ya kulti Samɛria be kade n wɔtɔ nɛ b kɔ kumo kena.

² Ewura Bɛnhadad daŋ shuŋi mbɔ Israɛl be ewura Ahab nɛ e wɔ Samɛria be kade na kutɔ nɛ b ya kaŋɛ mo le: “Ewura Bɛnhadad yɛ an kaŋɛ fo fanɛ

³ fo ta fo shuwa nɛ gbiti nɛ fo beche nɛ b walɛ abita ga na nɛ fo mbia nɛ b kɔ eleŋ ga na m ba sa mo.”

⁴ Ndoŋ nna nɛ ewura Ahab kaŋɛ le: “Men ya kaŋɛ ewura Bɛnhadad fanɛ n shuli kusɔ nɛ e kaŋɛ na. Ma nɛ kusɔ nɛ ŋ kɔ kikɛ la mo peya nna.”

⁵ K maŋ chɛr ko nɛ ewura Bɛnhadad naŋ shuŋi mbɔ Ahab kutɔ fanɛ b ya kaŋɛ mo le: “N shuŋi mbɔ fo kutɔ fanɛ fo ta fo shuwa nɛ gbiti nɛ fo beche nɛ b walɛ abita ga na nɛ fo mbia nɛ b kɔ eleŋ ga na kikɛ n sa ma.

⁶ Echefo saŋɛ ere so meeŋ shuŋi ma benimu fo laŋ to nɛ fo benimuana be elaŋ to nɛ b ba keni n fin asɔ kama nɛ a walɛ na nseŋ ta amo kikɛ.”

⁷ Ndoŋ nna nɛ ewura Ahab tre kade na to be bejuŋkparpoana kikɛ ŋ kaŋɛ bumo le: “Men wu kananɛ kanyɛn ere bee sha nɛ e ta anyi n wɔtɔ asheŋ to nna na. Men wu e ka shoŋi ma ebɔl fanɛ e beeŋ ba sɔ ma beche nɛ b walɛ abita ga na nɛ ma mbia nɛ b kɔ eleŋ ga na nɛ ma shuwa nɛ gbiti kikɛ, nɛ n shuli.”

⁸ Nɛ bejuŋkparpo na kikɛ kaŋɛ le: “Sa maŋ tuge mo.”

⁹ Ndoŋ nna nɛ Ahab kaŋɛ mbɔ na fanɛ b ya kaŋɛ Bɛnhadad le: “Men ya kaŋɛ ewura na fanɛ n shuli sososo be kusɔ nɛ e kaŋɛ na ama kenyɔsopo ere bre, m maaŋ shuli kumo.” Mbɔ na ka yɔ nɛ ewura Bɛnhadad naŋ ta kubɔya popɔr n sa bumo.

¹⁰ E yɛ: “Meeŋ shin nɛ benapo e ba jija fo kade ere nɛ shɛŋ shɛŋ maaŋ naŋ ka ndoŋ. Nɛ ŋ kaa maŋ wora loŋ, kumo ere agbir nɛ mee shuŋ ere e mɔ ma!”

¹¹ Ndoŋ nna nɛ ewura Ahab kaŋɛ le: “Men ya kaŋɛ ewura Bɛnhadad fanɛ enapo kashenteŋ bre bee ji njɔŋ saŋɛ so nɛ b kɔ kena n loge nna, mannɛ saŋɛ nɛ b kraa yɔ kena to.”

¹² Saŋɛ so nɛ ewura Bɛnhadad nɛ bewura nɛ baa chɛ mo to na nɛ bejuŋkparpoana na wɔ bumo be ewajɛbu to a nuu bumo be nsa na be jemanɛ so nɛ ewura Ahab be kubɔya na tu mo. E daŋ kaŋɛ mbe benapo nna fanɛ b koso n ya kɔ kade na, nɛ bumo kikɛ wora shiriya nɛ b ya kɔ kumo.

¹³ Loŋ be jemanɛ nɛ anebi ko yɔ ewura Ahab kutɔ n ya kaŋɛ mo le: Enyɛnpe yɛ: “Men sa maa lɔ kufu ŋkpal benapo damta nɛ b kɔ ere so. Meeŋ shin nɛ men kɔ m pɔɔ bumo so, saŋɛ na so menyeeŋ pin fanɛ ma e la Enyɛnpe Ebɔrɛ na kashenteŋto!”

¹⁴ Nɛ ewura Ahab bishi le: “Bumo e naaŋ kɔ n sa anyi?” Nɛ anebi na kaŋɛ le: “Enyɛnpe na yɛ mbrantiɛbia nɛ b la mbonfu mbonfu be egomena be benapo na e naaŋ wora loŋ.” Nɛ ewura Ahab naŋ bishi le: “Nɛ wanɛ e naaŋ juŋkpar bumo kena na to?” Nɛ anebi na kaŋɛ le: “Fo e naa shin nɛ fo juŋkpar bumo.”

¹⁵ Ndoŋ nna nɛ ewura Ahab tre benapo fɔlbi nɛ b wɔ mbonfu mbonfu na m ba shɛr. B daa wɔ benapo alfa anyɔ nɛ adesa nɛ anyɔ. Bumo be kaman nɛ e naŋ tre Israɛl be benapo ŋgboŋ ashunu na malɛ m ba ti so.

¹⁶ Kumo be kapiidi nɛ ewura Ahab nɛ Israɛlebi be benapo lar nɛ b ya kɔ Ewura Bɛnhadad nɛ mbe basa kena. Loŋ be jemanɛ na so nɛ ewura Bɛnhadad nɛ bewura adesa nɛ anyɔ nɛ mo nɛ bumo wora kɔnɔ na wɔ ewajɛbu to a nuu nsa.

¹⁷ Benapo fɔlbi nɛ b shi mbonfu mbonfu na daŋ juŋkpar n lar. Ndoŋ nna Bɛnhadad be benapo nɛ baa ŋana a dara asheŋ na ba kaŋɛ mo fanɛ benapo be katuŋ ko shi Samɛria a ba nɛ b ba kɔ bumo kena.

¹⁸ Nɛ ewura Bɛnhadad ponte ŋ kaŋɛ le: “Kena so nɛ baa ba ŋko kayurwushiso nɛ baa ba, men pɛ bumo nɛ baa keni.”

¹⁹ Israɛl be benapo fɔlbi na daŋ juŋkpar nna a kɔ nɛ benapo gbagba na malɛ bɛ so.

²⁰ Israɛl be benapo na be ekama daŋ mɔ esa nɛ mo nɛ mo tu abar a kɔ na nna. Ndoŋ nna nɛ Siriya be benapo nɛ b wɔ ŋkpa to na lara aya fuful a shile nɛ Israɛl be benapo ju a bɛ bumo so. Ewura Bɛnhadad bre nɛ basa nɛ baa dii egbaŋɛ a kɔ kena na, daŋ dii egbaŋɛ nna n shile n ya ŋana.

²¹ Nɛ ewura Ahab nɛ mbe benapo ju m buu Siriya be benapo na so n ya mɔ bumo be bedamta nseŋ sɔ bumo be egbaŋɛ nɛ egbaŋɛturko na kikɛ.

²² Kede be kaman nɛ Anebi na yɔ Ewura Ahab kutɔ n ya kaŋɛ mo le: “Ya fin benapo n ti fo benapo nɛ fo kɔ na so ŋkpal manɛ so Siriya be ewura Bɛnhadad nɛ mbe benapo kraa beeŋ baa kɔ fo kena dɔchubɔrɛ be jemanɛ so.”

Siriyaebi ka lɔŋɛ ŋ kɔ Israɛlebi kena be asheŋ

²³ Nɛ ewura Bɛnhadad be benimuana malɛ kaŋɛ mo le: “Abee so nɛ Israɛlebi na be agbir wɔ, amoso nɛ b tiŋ ŋ kɔ m pɔɔ anyi so abee so na. Nɛ an baŋ kɔ bumo keplasawule, anyeeŋ pɔɔ bumo so.

²⁴ Amoso ju bewura adesa nɛ anyɔ na nseŋ ta fo gbagba be benapo be benimu n tal bumo be katelamu.

²⁵ Ade kikɛ be kaman nɛ fo naŋ fin benapo damta nɛ egbaŋɛ nɛ egbaŋɛturko fanɛ kananɛ fo daa kɔ na nɛ an ya kɔ Israɛlebi na keplasawule so. An baa nyi geeŋ fanɛ anyeeŋ pɔɔ bumo so kede bre.” Nɛ ewura Bɛnhadad shuli m bɛ kusɔ nɛ b kaŋɛ mo na so.

²⁶ Dɔchubɔrɛ be jemanɛ ka fo nɛ ewura Bɛnhadad gbargbar mbe benapo n yɔ Afɛk be kade to nɛ e ya kɔ Israɛlebi kena.

²⁷ Nɛ Israɛlebi na gba bela ase nɛ b ya tu bumo ŋ kɔ. Ndoŋ nna nɛ bumo kikɛ ya wora bumo be nyi to ŋ kilgi amo be anishito n shoŋi abar. Siriya be benapo daa shibi nna n sɔ kaplɛkama pɛlɛlɛ ama Israɛlebi be benapo na bre daa du nna fanɛ mboe be ntuŋ wurbi anyɔ ka yil m mata abar.

²⁸ Nɛ anebi na yɔ ewura Ahab kutɔ n ya kaŋɛ mo le: “Enyɛnpe Ebɔrɛ yɛ, ŋkpal Siriyaebi ka kaŋɛ fanɛ n la abee so be ebɔrɛ nna nsaa maŋ tre ma kepla so be ebɔrɛ na so, meeŋ shin nɛ men kɔ m pɔɔ bumo be benapo damta ere so nɛ fo nɛ fo basa e pin fanɛ ma e la Enyɛnpe na kashenteŋto.”

²⁹ Nchɛ lela ashunu nɛ Siriyaebi nɛ Israɛlebi na wɔ bumo be nyi to a keni abar. Kachɛ shunusopo na ka fo nɛ kena na fara nɛ Israɛlebi na mɔ Siriyaebi na be benapo ŋgboŋ kalfa.

³⁰ Bumo be bumo nɛ b maŋ nya m mɔ nɛ b shile n yɔ Afɛk be kade to na be basa ŋgboŋ adunyɔ nɛ ashunu nɛ kade na be egbal malɛ tɔr so m mɔ. Bɛnhadad gba daŋ shile nna n ya ŋana Afɛk be kade na be laŋ ko be kukɔlɔbi to be ebu to.

³¹ Kede be kaman nɛ mbe benimuana na yɔ mo kutɔ n ya kaŋɛ le: “An nu fanɛ Israɛl be bewura bee wu kuwɔr ga, amoso sa anyi ekpa nɛ an ta kagbenejijaso be asɔbuuso n dela anyi be nshɛr to nseŋ ta efɔl malɛ n chɛ anyi be abɔto kagbenejijaso n yɔ Israɛl be ewura na kutɔ. Ashere nɛ an wora loŋ e maaŋ mɔ fo.”

³² Ndoŋ nna nɛ b ta kagbenejijaso be asɔbuuso n dela bumo be nshɛr to nseŋ ta efɔl n chɛ bumo be abɔto kagbenejijaso n yɔ ewura Ahab kutɔ n ya kaŋɛ mo le: “Fo kayɛrbi Bɛnhadad bee kule fo nna fanɛ fo sa maŋ mɔ mo.” Nɛ ewura Ahab malɛ kaŋɛ le: “Bɛnhadad kraa wɔ ŋkpa to a? Kashenteŋto e du fanɛ n niopibi nna!”

³³ Bɛnhadad be benimuana na daa jo nna nɛ b nu asheŋ lela ashi ewura Ahab kutɔ. Amoso ewura Ahab ka tre Bɛnhadad mo niopibi na, k daŋ wora bumo ebel nna nɛ b kaŋɛ epul na to le: “Bɛnhadad la fo niopibi nna.” Nɛ Ahab kaŋɛ bumo le: “Men ya keta mo m ba ŋ kutɔ.” Bɛnhadad ka ba, nɛ Ahab shin nɛ e luri mbe gbaŋɛturko to n chena.

³⁴ Nɛ Bɛnhadad kaŋɛ le: “Meeŋ laŋɛ nde nɛ n tuto kɔ n sɔ fo tuto kutɔ na n sa fo. Saŋɛ na so feeŋ fara a ji yawu ashi Damaskɔs be kade to fanɛ kananɛ n tuto gba daŋ wora ashi Samɛria be kade na.” Nɛ ewura Ahab kaŋɛ le: “Nɛ fo tiŋ n wora loŋ bre kumo ere ma alɛ beeŋ sa fo ekpa nɛ fo baa yɔ.” Ndoŋ nna nɛ b wora kɔnɔkoŋwule be ŋkre nɛ ewura Ahab sa Bɛnhadad ekpa nɛ e yɔ.

Anebi ka kaŋɛ fanɛ Ahab maŋ la shɛŋ be asheŋ

³⁵ Loŋ be jemanɛ na so nɛ Enyɛnpe Ebɔrɛ kaŋɛ anebi ko fanɛ e kaŋɛ mo barkasa le: “Ŋmɛa ma.” Nɛ anebi na kini.

³⁶ Ndoŋ nna nɛ anebi na kaŋɛ mo le: “Ŋkpal fo ka kini kebɛ Enyɛnpe Ebɔrɛ be kɔnɔ so so, fo baŋ lar ŋ kutɔ nfe, buluŋ beeŋ mɔ fo.” E ka lar malɛ, epul na to nɛ buluŋ mɔ mo.

³⁷ Nɛ loŋ be anebi koŋwule na naŋ ya tu esa ko nseŋ kaŋɛ mo le: “Ŋmɛa ma!” Nɛ kanyɛn na ŋmɛa mo ga hale nɛ e doro.

³⁸ Ndoŋ nna nɛ anebi nɛ b ŋmɛa na ta kechɛbi m buu anishi so saŋɛ na so b maaŋ pin mo. Kumo be kaman nɛ e ya yili kubɔrbi so a jo Israɛl be ewura.

³⁹ Ewura na ka bee choŋ nɛ anebi na boŋ to n tre mo nseŋ kaŋɛ mo le: “Yiramu! Kena nɛ anyee kɔ nɛ enapo ko keta edompo ko ka shile kena m ba ŋ kutɔ m ba kaŋɛ le: ‘Baa keni kanyɛn ere so, nɛ fo baŋ yige nɛ e shile, feeŋ paŋ fo ŋkpa, ŋko ŋ ka gbiti be ndarbi ŋgboŋ asa.

⁴⁰ Ama ŋkpal ma kenishi ka daŋ pere ashuŋana ko so so, nɛ kanyɛn na daŋ nya ekpa n shile.’ ” Nɛ ewura Ahab na kaŋɛ le: “Fo ji fo gbagba be kumu demu nna na, feeŋ nya kumo be kasogberge.”

⁴¹ Ndoŋ nna nɛ anebi na bugi kechɛbi nɛ k buu mbe anishi so na, nɛ ewura na pin epul na to fanɛ anebiana na be eko e la mo.

⁴² Nɛ anebi na kaŋɛ ewura na fanɛ Enyɛnpe na yɛ: “Ŋkpal ŋ ka kaŋɛ fo fanɛ fo mɔ ewura Bɛnhadad nɛ fo shin nɛ e shile so, fo alɛ gba beeŋ paŋ fo ŋkpa nɛ fo benapo malɛ kikɛ e wu ŋkpal bumo alɛ gba ka shin nɛ mbe basa shile ŋ ŋana so.”

⁴³ Ndoŋ nna nɛ ewura Ahab ta agbo kagbenejija m bɛta n yɔ Samɛria.