1 Bewura 2 - EBƆRƐ BE KAWƆL

Lalaloge be kamalga nɛ Deevid sa Sɔlɔmɔn na be asheŋ

¹ Deevid ka bee shin nɛ e wu nɛ e tre mo pibinyɛn Sɔlɔmɔn m malga mbe lalaloge be kamalga n sa mo ŋ kaŋɛ le:

² “Ma luwu bee taga to, amoso nya eleŋ nɛ kagbene,

³ n wora kusɔ kama nɛ Enyɛnpe Ebɔrɛ kaŋɛ fanɛ fo wora na, nsaa bɛ mbe keŋini nɛ mbra kama nɛ an nananyɛn Mosis sibɛ n nase na so, saŋɛ na so, kusɔ kama nɛ fee wora nɛ kaplɛkama nɛ fo yɔ, asheŋ beeŋ nyalɛ n sa fo.

⁴ Fo nɛ fo kaman to ebi kikɛ baa nu a sa Enyɛnpe Ebɔrɛ na kashenteŋto nɛnɛ bre, mbe kɔnɔ kpakpaso nɛ e nase n sa ma fanɛ ma kanaŋ to be esa e naaŋ baa ji Israɛl be kuwura saŋkikɛ na, beeŋ bɔlɔ so.

⁵ Fo gbagba ere nyi kusɔ nɛ Zeruwa pibinyɛn Jɔab wora ma. E mɔ Neer pibinyɛn Abna nɛ Jɛta pibinyɛn Amasa nɛ b la Israɛl be benapo be benimu anyɔ na nna fanɛ kena to be bedoŋ na, nɛ b maa kɔ kena. E daŋ mɔ bumo nna nɛ b maŋ wora shɛŋ, ŋkpal mbe basa ka daŋ wu kena ko to ga so. Shin nɛ e nya mbe alubi be kakɔka.

⁶ Kanaŋkama nɛ feeŋ wora n lara mbe efute manaŋ, fo wora loŋ. Sa maŋ shin nɛ e bel n fuli kumu n wu.

⁷ Ama wora Bazilai nɛ e shi Giliad be efuli so na bre be mbinyɛnsobi na kelela nseŋ shin nɛ b baa tu fo a ji saŋkama, ŋkpal manɛ so b daŋ wora ma kelela ga saŋɛ so nɛ n daa shil a ŋana fo da Absalɔm so na.

⁸ Nyiŋi Gɛra pibinyɛn Shimei nɛ e la Bɛnjamin be yiri to be esa, nsaa shi Bahurim na gba. Mo e daŋ tege ma nseŋ sho ma kɔnɔ kachɛ nɛ mee yɔ Mahanaim na. Ama kumo be kaman e ka ba tu ma Jɔɔdan be Lɔr na ase na, n daŋ nase kɔnɔ kpakpaso ashi Enyɛnpe Ebɔrɛ be ketre to nna fanɛ m maaŋ shin nɛ b mɔ mo.

⁹ Ama sa maŋ kaŋ shin nɛ e ta mbe kumu n ji. Fo gbagba nyi kusɔ nɛ k daga fo ka wora mo. E tiŋ bel ama sa maŋ shin nɛ e wu Ebɔrɛso be luwu.”

Deevid be luwu be asheŋ

¹⁰ Deevid ka wu, Jerusalɛm nɛ baa tre Ewura Deevid be kade na, to nɛ b puli mo.

¹¹ Deevid daŋ ji kuwura Hibrɔn be kade to nfɛ ashunu nna nseŋ ji Jerusalɛm malɛ be kade to nfɛ adesa nɛ asa nɛ mbe kuwurji kikɛ daa la nfɛ adena.

¹² Sɔlɔmɔn e daŋ sɔ mo tuto ewura Deevid so n ji kuwura nɛ mbe kuwurji malɛ ji eleŋ ga.

Sɔlɔmɔn be kuwurji be asheŋ

¹³ Kachɛ nɛ Adonija yɔ Sɔlɔmɔn mo nio Bɛshiba kutɔ, nɛ Bɛshiba bishi mo le: “A wɔ ebel nna nɛ fo ba nɛ fo ba bɔ ma so a?” Nɛ Adonija kaŋɛ: “Mm a wɔ ebel nna.

¹⁴ M ba nna nɛ m ba fin fo kechɛto.” Nɛ Bɛshiba bishi mo: “Manɛ nɛ fee sha a?”

¹⁵ Ndoŋ nna nɛ Adonija kaŋɛ: “Fo nyi Israɛlebi kikɛ ka daa nyi fanɛ ma e daa shin nɛ ŋ ki ewura, ama Enyɛnpe Ebɔrɛ chɛrga asheŋ nseŋ ta n sipo Sɔlɔmɔn ŋ ki ewura.

¹⁶ Kusɔ koŋwule be kechɛto nɛ mee sha.” Nɛ Bɛshiba bishi mo: “Manɛ be kusɔ nna?” Ndoŋ nna nɛ Adonija kaŋɛ: “N nyi ewura Sɔlɔmɔn ka maaŋ kini kesa fo kusɔ kama nɛ fo kule mo.

¹⁷ Amoso, jande, ya kule mo fanɛ e shin nɛ n ta Abishag nɛ e shi Shunɛm na ŋ ki ma eche.”

¹⁸ Nɛ Bɛshiba kaŋɛ: “K nyalɛ, meeŋ malga ewura na kutɔ n sa fo.”

¹⁹ Ndoŋ nna nɛ Bɛshiba yɔ ewura Sɔlɔmɔn kutɔ nɛ e ya kaŋɛ mo kusɔ nɛ Adonija kaŋɛ na. Ewura Sɔlɔmɔn ka wu mo nio nɛ e koso n yili n chɔrɔ mo bunyaŋ so, nseŋ chena mbe kuwurputi so, n shin nɛ b ta kuwurputi ko malɛ m ba nase mbe jisoso nɛ mo nio chena so.

²⁰ Bɛshiba ka chena na nɛ e kaŋɛ le: “Kusɔ fimbi ko nɛ mee sha nɛ ŋ kule fo, amoso sa maŋ kaŋ mɔn ma kumo.” Nɛ Sɔlɔmɔn bishi: “N nio manɛ nna? Kaŋɛ kusɔ kama nɛ fee sha nɛ n wora kumo n sa fo.”

²¹ Ndoŋ nna nɛ Bɛshiba kaŋɛ: “Shin nɛ Adonija e ta Abishag ŋ ki mbe eche.”

²² Nɛ ewura Sɔlɔmɔn malɛ kaŋɛ mo le: “Manɛ nna nɛ fee sha ŋ ka ta Abishag n sa mo? Kumo ere kusɔ nɛ fee ŋini e la fanɛ n daŋ shin nɛ e ji kuwura ere gba k walɛ ŋkpal manɛ so e la n da nna nɛ bɔrɛmatapo Abiata nɛ Jɔab kikɛ yil mbe kaman!”

²³ Kede be kaman nɛ Sɔlɔmɔn nase kɔnɔ kpakpaso Enyɛnpe Ebɔrɛ na be anishito ŋ kaŋɛ le: “Nɛ m baa maŋ shin nɛ b mɔ Adonija, kumo ere Ebɔrɛ e gberge ma kusoe ga!

²⁴ Enyɛnpe Ebɔrɛ na bɛ mbe kɔnɔ nɛ e nase fanɛ e beeŋ ta Israɛl be kuwurji n sa ma nɛ ma kaman to ebi na so n ta ma ŋ ki ewura n chena n tuto ewura Deevid be kuwurputi na so. Enyɛnpe Ebɔrɛ nɛ e wɔ ŋkpa to na be ketre to, Adonija beeŋ paŋ mbe ŋkpa kabre kikɛ!”

²⁵ Kede be kaman nɛ ewura Sɔlɔmɔn ponte ŋ kaŋɛ Bɛnaya fanɛ e ya mɔ Adonija, nɛ Bɛnaya ya mɔ mo.

B ka ju Abiata nɛ e yɔ epe nɛ Jɔab be luwu be asheŋ

²⁶ Kede be kaman nɛ Ewura Sɔlɔmɔn shuŋi n tre bɔrɛmatapo Abiata ŋ kaŋɛ mo le: “Bɛta n yɔ Anatɔf nɛ k la fo kade to na. Fo alɛ gba daga luwu nna, ama ma alɛ maaŋ shin nɛ b mɔ fo naniere ŋkpal manɛ so, saŋɛ so nɛ fo daa wɔ n tuto Deevid kutɔ na, fo nɛ mo e daa ji mbe awurfoŋ kikɛ nɛ fo alɛ daŋ naa keni Enyɛnpe Ebɔrɛ be ŋkre be deka na so.”

²⁷ Ndoŋ nna nɛ ewura Sɔlɔmɔn ju Abiata ashi Enyɛnpe Ebɔrɛ be kabɔrɛmata be kushuŋ to, nɛ kusɔ nɛ Enyɛnpe Ebɔrɛ malga dra dra ashi Shilo a laŋɛ bɔrɛmatapo Eli nɛ mbe kaman to ebi be asheŋ na kikɛ e bɔlɔ so.

²⁸ Adonija nɛ Jɔab daa chɛ to nɛ e ki ewura, mannɛ Absalɔm, amoso e ka nu fanɛ Adonija wu nɛ e shile n yɔ Enyɛnpe be wajɛbu na ase n ya pɛ bɔrɛsure na be abonfu to be asɔ nɛ a duli alambɛ na to ŋ keta nɛ e kuŋ mbe kumu.

²⁹ B ka kaŋɛ ewura Sɔlɔmɔn fanɛ Jɔab shile n yɔ wajɛbu cheembi na to n ya yili bɔrɛsure na ase na, nɛ Sɔlɔmɔn shuŋi kabɔ fanɛ e ya bishi Jɔab kusɔ nɛ k ba nɛ e shile n yɔ bɔrɛsure na ase. Nɛ Jɔab kaŋɛ fanɛ ŋkpal e ka daa ŋana Sɔlɔmɔn na so nɛ e daŋ wora loŋ. Ndoŋ nna nɛ ewura Sɔlɔmɔn ponte ŋ kaŋɛ Bɛnaya fanɛ e ya mɔ Jɔab.

³⁰ Nɛ Bɛnaya ya luri Enyɛnpe Ebɔrɛ be wajɛbu na to ŋ kaŋɛ Jɔab le: “Ewura bee tre fo.” Nɛ Jɔab malɛ kaŋɛ le: “M-m, men yige ma nɛ n wu nfe.” Nɛ Bɛnaya bɛta n ya kaŋɛ Ewura na kusɔ nɛ Jɔab kaŋɛ.

³¹ Nɛ ewura na kaŋɛ Bɛnaya le: “Wora kusɔ nɛ Jɔab kaŋɛ na. Mɔ mo wajɛbu cheembi na to m puli, saŋɛ na so esa kama maaŋ wu ma ŋko ewura Deevid be kaman to ebi be ekama kulubi ŋkpal Jɔab ka mɔ basa nɛ b maŋ wora shɛŋ na so.

³² Ŋkpal e ka mɔ Abna nɛ e la Israɛl be benapo be enimu nɛ Amasa nɛ mo alɛ la Juda be benapo be enimu nɛ n tuto ewura Deevid maŋ nyi na so, Enyɛnpe Ebɔrɛ beeŋ gberge mo kusoe.

³³ Jɔab nɛ mbe kaman to ebi beeŋ nya kasogberge mbaanaayɔ ŋkpal kusɔ nɛ e wora ere so. Ama ewura Deevid nɛ mbe kaman to ebi bre, Enyɛnpe Ebɔrɛ beeŋ shin nɛ b baa ji kuwura kayurwushiso.”

³⁴ Ndoŋ nna nɛ Bɛnaya yɔ Enyɛnpe Ebɔrɛ be wajɛbu na to n ya mɔ Jɔab nɛ b ta mbe kebuni m puli keshishɛrsawule so ashi mbe kade to.

³⁵ Nɛ Ewura Sɔlɔmɔn ta Banaya n yili Jɔab be eyilikpa nɛ e ki mbe benapo be enimu, nseŋ ta bɔrɛmatapo Zadɔk malɛ n yili Abiata be eyilikpa nɛ e ki mbe bɔrɛmatapo.

Shimei be luwu be asheŋ

³⁶ Kumo be kaman nɛ ewura na shuŋi n tre Shimei ŋ kaŋɛ mo le: “Pɔr ebu Jerusalɛm nfe a wɔ kumo to. Sa maŋ kaŋ lar kade ere to kikɛ.

³⁷ Fo baŋ wora alefasha n lar kade ere to n dii ketaŋɛ nɛ baa tre Kidrɔn ere gba, feeŋ wu nɛ fo luwu malɛ be turju e baa bɛ fo.”

³⁸ Nɛ Shimei kaŋɛ: “K nyalɛ Yiramu! Meeŋ wora kusɔ nɛ fo kaŋɛ ere kikɛ.” Amoso e daŋ chena Jerusalɛm n chɛr ga.

³⁹ Kumo be nfɛ asa be kaman nɛ Shimei be anya be benyɔ shile n yɔ Maaka pibinyɛn Akish nɛ e la kade nɛ baa tre Gaaf na be ewura na kutɔ,

⁴⁰ Shimei ka nu fanɛ b wɔ ndoŋ nɛ e ta gaare n deŋi mbe kurma so n yɔ ewura na kutɔ. E ka ya wu bumo nɛ e keta bumo m ba epe.

⁴¹ Ewura Sɔlɔmɔn ka nu kusɔ nɛ Shimei wora,

⁴² nɛ e shuŋi n tre mo nseŋ kaŋɛ mo le: “N daŋ shin nna nɛ fo nase kɔnɔ Enyɛnpe Ebɔrɛ be ketre to fanɛ fo maaŋ lar Jerusalɛm to. Ma alɛ kpele fo kusoe fanɛ fo kaŋ baŋ pɛl n lar kumo to feeŋ wu nɛ fo shuli so n sa ma.

⁴³ Nɛ manɛ e ba nɛ fo maŋ bɛ fo gbagba be kɔnɔ nɛ fo nase ashi Enyɛnpe Ebɔrɛ be anishito na so nɛ ma mbra so?

⁴⁴ Fo gbagba ere nyi kulubi nɛ fo wora n tuto ewura Deevid. Enyɛnpe Ebɔrɛ na malɛ beeŋ gberge fo kusoe n tal to.

⁴⁵ Ama Enyɛnpe Ebɔrɛ beeŋ nɛfa ma nseŋ lɔŋɛ n tuto ewura Deevid be kuwurji n yili to kpakpa hale mbaanaayɔ.”

⁴⁶ Kumo be kaman nɛ Ewura Sɔlɔmɔn kaŋɛ Bɛnaya fanɛ e ya mɔ Shimei, nɛ e ya mɔ mo. Ndoŋ nna nɛ ewura Sɔlɔmɔn be kuwurji wora eleŋ n ti so.