1 Bewura 19 - EBƆRƐ BE KAWƆL

Elaija ka yɔ kebee nɛ baa tre Sainai na so be asheŋ

¹ Ade kikɛ be kaman nɛ ewura Ahab kaŋɛ mbe eche Jɛzebel kusɔ kama nɛ anebi Elaija wora, nɛ kananɛ e shin nɛ b mɔ kegbir nɛ baa tre Baal na be agbirwuraana na kikɛ.

² Ndoŋ nna nɛ Jɛzebel shuŋi fanɛ b ya kaŋɛ Elaija kubɔya ere. E yɛ: “Ta a ba echefo saŋɛ ere so nɛ ŋ ka maŋ wora fo kusɔ nɛ fo wora agbirwuraana ere gbagba n tal to, kumo ere agbir na e mɔ ma.”

³ Anebi Elaija ka nu loŋ nɛ kufu pɛ mo nɛ e shile a mɔlga mbe kumu. E daŋ keta mbe kayɛrbi nna n yɔ Bɛshiba nɛ k wɔ Juda be efuli so be kelargato be kaseto na n ya yige mo ndoŋ.

⁴ Anebi Elaija be kachɛ lelemu nɛ e na kiyi to. Ndoŋ nna nɛ e ba tu kedibi ko n chena kumo be kifito nseŋ fɛ fanɛ e daŋ wu gba k bɔ mo so. Kumo be kaman nɛ e kule Ebɔrɛ ŋ kaŋɛ le: “Enyɛnpe, asheŋ ere bre chɔ ma so. Lara ma ŋkpa, ŋkpal manɛ so n chɛr a beeŋ wu nna!”

⁵ Kumo be kaman nɛ e dese kedibi na be kifito a di. Epul to nɛ Ebɔrɛ be malaika ba tiŋi mo ŋ kaŋɛ le: “Koso n ji ajibi.”

⁶ E ka koso ŋ gbɛ ŋ keni nɛ e wu bodobodo nɛ nchu ka wɔ kusɔ to a yil mbe kumu ase, nɛ e ji amo nseŋ naŋ laŋɛ n dese.

⁷ Ndoŋ nna nɛ Enyɛnpe be malaika na naŋ bɛta m ba mo kutɔ kela nyɔsopo m ba tiŋi mo ŋ kaŋɛ le: “Koso n ji, mannɛ aloŋ, fo enite na beeŋ nu fo.”

⁸ Nɛ anebi Elaija koso n ji nseŋ nuu nchu nɛ ajibi na sa mo eleŋ nɛ e nite nchɛ adena kikɛ hale n yɔ kebee cheembi nɛ baa tre Sainai na.

⁹ Kumo be kanyɛso nɛ e yɔ kebeelaŋ to n ya dese a di. Ndoŋ nɛ e wɔ nɛ Enyɛnpe Ebɔrɛ na bishi mo le: “Elaija manɛ nɛ fee wora nfe?”

¹⁰ Nɛ Elaija kaŋɛ le: “Enyɛnpetale Ebɔrɛ, fo nawule nɛ mee shuŋ saŋkikɛ. Ama Israɛlebi na bre ku kɔnɔkoŋwule be ŋkre nɛ fo nɛ bumo kɔ na to nna nseŋ da fo bɔrɛsureana n lɛ, m mɔ fo anebiana kikɛ. Naniere n nawule e ka nɛ baa sha kemɔ ma alɛ gba.”

¹¹ Nɛ Enyɛnpe Ebɔrɛ kaŋɛ mo le: “Lar n ya yili kebee na be esoso a jo ma, meeŋ ba choŋ.” Ndoŋ nna nɛ Enyɛnpe Ebɔrɛ shin nɛ afu lempo ko ba ber kebee na nseŋ bu kumo n lɛ m bure afalta nɛ a wɔ ndoŋ na to, ama Enyɛnpe na daa maŋ wɔ afu na to. Afu na ka yige nɛ kasawule be kegbuŋgbuŋ malɛ bɛ so ama Enyɛnpe na daa maŋ wɔ kumo alɛ gba to.

¹² Kasawule be kegbuŋgbuŋ na ka ba choŋ nɛ edɛ malɛ bɛ so ama Enyɛnpe na daa maŋ wɔ edɛ na gba to. Edɛ na ka ba choŋ, nɛ ebɔl fimbi ko kuli mmalga.

¹³ Anebi Elaija ka nu loŋ be ebɔl na nɛ e ta mbe piŋi m buu mbe anishi so nseŋ lar kebeelaŋ na to n ya yili kumo be kabuna to. Ndoŋ nna nɛ Enyɛnpe Ebɔrɛ naŋ bishi mo le: “Elaija manɛ nɛ fee wora nfe?”

¹⁴ Nɛ Elaija naŋ kaŋɛ le: “Enyɛnpetale Ebɔrɛ, fo nawule nɛ mee shuŋ saŋkikɛ. Ama Israɛlebi na bre ku kɔnɔkoŋwule be ŋkre nɛ fo nɛ bumo kɔ na to nna nseŋ da fo ebɔrɛsureana n lɛ m mɔ fo anebiana kikɛ. Naniere n nawule e ka nɛ baa sha kemɔ ma alɛ gba.”

¹⁵ Nɛ Enyɛnpe Ebɔrɛ kaŋɛ mo le, “Bɛta n yɔ kiyi nɛ k mata Damaskɔs be kade to na. Fo kaŋ fo ndoŋ nɛ fo ya fin kanyɛn ko nɛ baa tre Haziɛl na nseŋ chulgi ŋku n wurge mbe kumu so m buu mo Siriya be efuli so be kuwura.

¹⁶ Kumo be kaman nɛ fo yɔ Israɛl be efuli so n ya duga ŋku n do Nimshi pibinyɛn Jehu gba so m buu mo Israɛl be efuli so be kuwura, nseŋ naŋ duga ŋku n do Shafat pibinyɛn Elaisha nɛ e shi Abel Mahola na be kumu so saŋɛ na so fo luwu be kaman e beeŋ sɔ fo so ŋ ki anebi.

¹⁷ Meeŋ shin nɛ ewura Haziɛl e mɔ basa nɛ baa shuŋ kegbir nɛ baa tre Baal na kikɛ. Bumo alɛ be ekama nɛ e shile ŋ ŋana nɛ ewura Haziɛl maŋ nya mo m mɔ, ewura Jehu bre beeŋ mɔ mo. Ekama nɛ ewura Jehu malɛ maŋ nya m mɔ, anebi Elaisha bre beeŋ nya mo m mɔ.

¹⁸ Basa ŋgboŋ ashunu nɛ b maŋ gbir m bunyaŋ kegbir nɛ baa tre Baal na nɛ n yige n sa ma kumu.”

¹⁹ Anebi Elaija ka lar a yɔ nɛ e ya tu Shafat pibinyɛn Elaisha nɛ e kɔ ana dɔso a dɔ: Ana dɔso nɛ b chɛ m mata abar benyɔnyɔ kudukako e daŋ juŋkpar mo a dɔ. Nɛ mo alɛ keta katuŋ kuduanyɔsopo na a bɛ so. Ndoŋ nna nɛ anebi Elaija lara mbe piŋi n deŋi Elaisha so.

²⁰ Nɛ Elaisha yige mbe ana dɔso na nseŋ shile m bɛ anebi Elaija so ŋ kaŋɛ mo le: “Shin nɛ n ya kela n tuto nɛ n nio pɔɛŋ nseŋ ba bɛ fo so.” Nɛ Elaija kaŋɛ mo le: “Baa yɔ, ama sa maŋ kaŋ teŋ so kusɔ nɛ n wora fo ere so.”

²¹ Ndoŋ nna nɛ Elaisha ya mɔ mbe ana dɔso na nseŋ ta amo be abɔto be ndibi na m puga edɛ n daŋɛ amo be eblaŋ na n ta n sa basa na nɛ b we. Kumo be kaman nɛ e ya bɛ anebi Elaija so a chɛ mo to.