1 Bewura 17 - EBƆRƐ BE KAWƆL

Elaija nɛ ewule be asheŋ

¹ Anebi Elaija nɛ e shi Tishbe nɛ k wɔ Giliad be kasawule so na daŋ yɔ ewura Ahab kutɔ kachako nna n ya kaŋɛ mo le: “Enyɛnpe nɛ e la Israɛl be Ebɔrɛ nsaa wɔ ŋkpa to saŋkikɛ nɛ mee shuŋ na be ketre to nɛ mee kaŋɛ na fanɛ bɔrɛ ŋko bunyaŋ maaŋ tɔr n ya fo nfɛnyɔ ŋko nfɛ asa ama ma e baŋ kaŋɛ k ba pɔɛŋ nɛ k ba.”

² Kede be kaman nɛ Enyɛnpe Ebɔrɛ kaŋɛ Elaija le:

³ “Lar nfe n yɔ epeŋilarkpa be kaba so be kabombi nɛ baa tre Cheriff nɛ k wɔ Jɔɔdan be lɔr na be epeŋilarkpa na n ya ŋana.

⁴ Ŋ kaŋɛ emɔmɔ fanɛ b baa sa fo ajibi ndoŋ nɛ fo baa nuu kabombi na to be nchu malɛ.”

⁵ Ndoŋ nna nɛ anebi Elaija wora Enyɛnpe Ebɔrɛ kasonu, nseŋ ya kaa wɔ Cheriff be kabombi na ase.

⁶ Kabombi na be nchu nɛ e daa nuu, nɛ emɔmɔ bee bar mo ajibi nɛ eblaŋ kachipurso nɛ kaaseso kikɛ.

⁷ K maŋ chɛr ko nɛ kabombi na wɔlto cheche ŋkpal bɔrɛ ka maŋ naa ba so.

Elaija nɛ Zarefaat be ekulpoche na be asheŋ

⁸ Ndoŋ nna nɛ Enyɛnpe Ebɔrɛ na kaŋɛ anebi Elaija le:

⁹ “Yɔ kade nɛ baa tre Zarefaat nɛ k mata Sidɔn be kade na n ya ka wɔ ndoŋ ŋkpal manɛ so ŋ kaŋɛ ekulpoche ko nɛ e wɔ ndoŋ fanɛ e baa sa fo ajibi.”

¹⁰ Anebi Elaija ka bee yɔ Zarefaat, n ya ka taga to kade na be kabunagboŋ na, nɛ e wu ekulpoche ko ka bee kil ndibi nɛ e kaŋɛ mo le: “Jande, sa ma nchu nɛ n nuu.”

¹¹ Kache na ka bee yɔ nɛ e ya jɔ nchu na m ba, nɛ e naŋ kaŋɛ mo le: “Jande wora n fin ajibi gba n ti so a bar ma.”

¹² Ndoŋ nna nɛ kache na kaŋɛ le: “Enyɛnpe fo Ebɔrɛ na be ketre to, m maŋ kɔ ajibi kikɛ ma laŋ to. Kusɔ nɛ m baa kɔ kikɛ e la nyifu enɔ be bɔlɔ nɛ a wɔ cheenshi to nɛ ɔlif be ŋku gbrɛ. M ba nfe nna nɛ m ba kil ndibi n ya daŋɛ kusɔ kama nɛ ŋ kɔ, nɛ ma nɛ ma kebia e ji. Kumo e naaŋ baa la anyi be lalaloge be ajibi nɛ anyeeŋ ji nseŋ wu.”

¹³ Ndoŋ nna nɛ anebi Elaija kaŋɛ le: “Sa maa fɔŋ, fo ere e yɔ n ya daŋɛ fo ajibi ama, pɔɛŋ nɛ fo daŋɛ amo na, ya daŋɛ fo ajibi nɛ fo kɔ na be gbrɛbi m bar ma pɔɛŋ, kumo be kaman nɛ fo daŋɛ amo nɛ a ka na nɛ fo nɛ fo kebia na e ji.

¹⁴ Ŋkpal manɛ so, kusɔ nɛ Enyɛnpe Israɛl be Ebɔrɛ na kaŋɛ nde: ‘Nyifu maaŋ loge katishaŋ na to kikɛ ŋku malɛ gba maaŋ loge kɔlba na to kikɛ hale n ya fo kachɛ nɛ Enyɛnpe Ebɔrɛ beeŋ shin nɛ bɔrɛ e ba.’ ”

¹⁵ Ndoŋ nna nɛ ekulpoche na ya wora kusɔ nɛ anebi Elaija kaŋɛ mo na gbagba chap, amoso mo nɛ mbe kebia na nɛ Elaija nya ajibi yɛlyɛla so a ji nchɛ damta.

¹⁶ Ŋkpal kɔnɔ nɛ Enyɛnpe Ebɔrɛ daŋ bɔla anebi Elaija so n nase na so, nyifu nɛ a wɔ katishaŋ na to na daa maŋ loge nɛ ŋku nɛ a daa wɔ kɔlba na to na gba daa maŋ loge.

¹⁷ K maŋ chɛr nɛ kulɔ pɛ ekulpoche na be kebia na, nɛ e wu.

¹⁸ Ndoŋ nna nɛ ekulpoche na kaŋɛ anebi Elaija le: “Ebɔrɛ be esa, manɛ nna nɛ fo wora ma le? Fo ba nfe nna nɛ fo ba kaŋɛ Ebɔrɛ alubi nɛ n wora saŋɛ na so ma kebia beeŋ wu a?”

¹⁹ Ndoŋ nna nɛ anebi Elaija kaŋɛ mo le: “Ta kebia na m bar ma.” Nɛ e ta kebia na m ba sa Elaija nɛ Elaija ta mo n dii n yɔ kuchoŋi be esoso be ebu nɛ e wɔtɔ na to, n ya nase kakpa nɛ e bee dese na,

²⁰ nseŋ kule Ebɔrɛ awɔrso le: “O Enyɛnpe nɛ fo la ma Ebɔrɛ, manɛ nna nɛ fo shin nɛ le be kagbenejija be kesheŋ ere nya ekulpoche ere? Kelela damta nɛ e wora ma ere kikɛ be kaman nɛ fo mɔ mo pibi a?”

²¹ Kede be kaman nɛ anebi Elaija teŋi to n dese kebia na so ale asa nseŋ kule Ebɔrɛ ŋ kaŋɛ le: “O Enyɛnpe nɛ ma Ebɔrɛ, jande shin nɛ kebia ere e bɛta m ba ŋkpa to.”

²² Ndoŋ nna nɛ Enyɛnpe Ebɔrɛ na nu anebi Elaija be kabɔrɛkule na nseŋ shin nɛ kebia na naŋ fara a fute.

²³ Nɛ anebi Elaija ta kebia na ŋ gbelge to m ba kuchoŋi na be kaseto m ba sa mo nio nseŋ kaŋɛ mo le: “Fo kebia na naŋ nya ŋkpa!”

²⁴ Nɛ kache na kaŋɛ le: “Naniere nɛ m pin fanɛ Enyɛnpe Ebɔrɛ be esa e la fo kashenteŋto nɛ e bee bɔla fo so a malga!”