1 Bewura 14 - EBƆRƐ BE KAWƆL

Ewura Jeroboam pibinyɛn be luwu be asheŋ

¹ Saŋɛ nɛ ewura Jeroboam bee wora alubi a gbiti Enyɛnpe Ebɔrɛ na nɛ kulɔ pɛ mo pibinyɛn Abija.

² Ndoŋ nna nɛ ewura Jeroboam kaŋɛ mbe eche le: “Chɛrga fo asɔbuuso saŋɛ na so esa kama maaŋ pin fo, nɛ fo yɔ Shilo, kakpa nɛ anebi Ahija nɛ e kaŋɛ ma fanɛ meeŋ ki Israɛl be ewura na wɔ na.

³ Ta ebodobodo kudu nɛ ekrakashi nɛ mushoŋ kɔlba be bɔlɔ n ya sa mo nseŋ bishi mo kusɔ nɛ k beeŋ wora anyi be kebia ere.”

⁴ Ndoŋ nna nɛ ewura Jeroboam be eche yɔ anebi Ahija pe ashi Shilo. Loŋ be saŋɛ nɛ Ahija bel hale nɛ mbe anishi tan.

⁵ Ama Enyɛnpe Ebɔrɛ na teŋ kaŋɛ Ahija fanɛ Jeroboam be eche bee ba nɛ e ba bishi mbe kebia be kulɔ be asheŋ, nseŋ kaŋɛ Ahija kusɔ nɛ e beeŋ kaŋɛ mo. Ewura Jeroboam be eche ka ba ndoŋ, nɛ e wora mbe kumu fanɛ mannɛ mo nna.

⁶ Ahija ka nu mbe aya ka cha m ba fo kabuna to nɛ e kaŋɛ le: “Jeroboam be eche, luri m ba. Manɛ nna nɛ fee wora fanɛ mannɛ fo nna? Ŋ kɔ baru lubi nɛ n sa fo.

⁷ Ya kaŋɛ ewura Jeroboam fanɛ le nɛ Enyɛnpe nɛ e la Israɛl be Ebɔrɛ na yɛ: ‘N lara fo ashi fo basa to nna nseŋ ta fo ŋ ki ma basa Israɛlebi na be ejuŋkparpo.

⁸ N sɔ kuwurji na ashi ewura Deevid be kaman to ebi kutɔ nna n sa fo ama fo alɛ maŋ du fanɛ ma kayɛrbi Deevid nɛ e daa ji kashenteŋ a nu a sa ma, nsaa wora kusɔ kama nɛ ŋ kaŋɛ na.

⁹ Fo alubi nɛ fo wora gba chɔ bewura kama nɛ b juŋkpar fo na be alubi, ŋkpal manɛ so fo kini ma nseŋ nyaŋɛ ma agbo to ŋkpal fo ka ya ka bunyaŋ agbir nɛ fo ta abɛlso n lɔŋɛ na so.

¹⁰ Ŋkpal kusɔ nɛ fo wora ere so meeŋ mur fo kuwurji nseŋ mɔ fo kaman to ebi nɛ b la benyɛn nɛ benimu nɛ mbia kikɛ. Meeŋ mur fo kanaŋ nɛ b ki fanɛ kananɛ anabin bee chɔɔ a mur na.

¹¹ Njɔnɔ malɛ e naaŋ ji fo kanaŋ to be esa kama nɛ e wu kade to, nɛ ejita malɛ e ji ekama nɛ e wu kupuŋ to. Ma Enyɛnpe Ebɔrɛ na e malga na.’ ”

¹² Kumo be kaman nɛ anebi Ahija kaŋɛ Jeroboam be eche na le: “Bɛta a yɔ epe. Fo baŋ luri kade to, fo pibi na beeŋ wu.

¹³ Israɛl be basa kikɛ beeŋ shu mbe keeli nseŋ puli mo. Mo nawule e naŋ nya kepuli lela ashi ewura Jeroboam be kanaŋ to kikɛ, ŋkpal manɛ so, mo nawule nɛ Enyɛnpe, Israɛl be Ebɔrɛ na be kagbene fuli so ga.

¹⁴ Enyɛnpe Ebɔrɛ na beeŋ lara esa popɔr nɛ e ji kuwura ashi Israɛl be efuli so nseŋ mur ewura Jeroboam be kanaŋ kikɛ. K maaŋ chɛr gba nɛ loŋ e wora.

¹⁵ Enyɛnpe Ebɔrɛ beeŋ gberge Israɛlebi kusoe nɛ b baa chicha fanɛ kananɛ nchu bee shile a bɛr nchu to be afitiri nɛ a bee yigbuŋ to na. E beeŋ nya agbo nseŋ lara Israɛlebi ashi kasawule lela nɛ e ta n sa bumo nananyɛnana na so nseŋ shin nɛ b pesaŋ to n ya baŋ Yufreetes be lɔrgboŋ be epeŋilarkpa be kaba so kufɔ kufɔ ŋkpal b ka bee shuŋ kegbir nɛ baa tre Ashira na so so.

¹⁶ Enyɛnpe Ebɔrɛ beeŋ kplaŋ Israɛlebi so ŋkpal ewura Jeroboam ka wora kulubi nseŋ shin nɛ Israɛlebi kikɛ wora alubi so.”

¹⁷ Ewura Jeroboam be eche ka bɛta n yɔ mbe kade to Tiiza, pɔɛŋ nɛ e beeŋ luri mbe ebu to nɛ mo pibi na teŋ wu.

¹⁸ Nɛ Israɛlebi shu kebia na be keeli nseŋ ta mo n ya puli. Nɛ kusɔ nɛ Enyɛnpe Ebɔrɛ bɔla mbe kayɛrbi anebi Ahija so ŋ kaŋɛ na kikɛ bɔlɔ so.

¹⁹ B sibɛ kusɔ kama nɛ ewura Jeroboam daŋ wora kikɛ, kananɛ e kɔ ana, nɛ kananɛ e ji kuwura, be asheŋ nna n wɔtɔ Israɛl be bewura be adrasheŋ be nwɔl to.

²⁰ Ewura Jeroboam daŋ ji kuwura Israɛl be efuli so nfɛ adunyɔ nɛ anyɔ nna. E ka wu nɛ mo pibinyɛn Nadab sɔ mo so n ji kuwura.

Juda be ewura Rehoboam be asheŋ

²¹ Ewura Sɔlɔmɔn pibinyɛn Rehoboam daŋ ji nfɛ adena nɛ kako nna pɔɛŋ nseŋ ki Juda be ewura. Mo alɛ daŋ ji kuwura Jerusalɛm nɛ k la kade nɛ Enyɛnpe Ebɔrɛ lara ashi Israɛl be kasawule so kikɛ fanɛ b baa bunyaŋ mo na to nfɛ kuduashunu nna. Rehoboam mo nio e daa la Namaa nɛ e shi Ammɔn be efuli so na.

²² Judaebi na daŋ wora alubi nna ŋ gbiti Enyɛnpe Ebɔrɛ nseŋ wora asheŋ nɛ a nyaŋɛ mbe agbo to ga a chɔ kananɛ bumo nananyɛnana daŋ wora na.

²³ B daŋ pɔr agbirlambuana nna nseŋ ta ajembu m pɔr eshabɔrɛ nɛ kegbirche Ashira be mpɔrduli n yili abee so nɛ ndibigboŋ nɛ a maaŋ gbaŋgbaŋ amo be afantaŋ be afito nsaa bunyaŋ amo.

²⁴ B daa kɔ beche nɛ benyɛn be esakale kakpa nɛ baa shuŋ agbir na nna, nɛ Judaebi na daa wora ekishi be asheŋ nɛ basa nɛ Enyɛnpe Ebɔrɛ daŋ ju kasawule na so dra dra, saŋɛ so nɛ Israɛlebi na daa ba nɛ b ba chena kumo so na, daa wora na nna.

²⁵ Ewura Rehoboam ka ji kuwura be kafɛ nusopo to nɛ Shishak nɛ e la Ijipt be efuli so be ewura na ba kɔ Jerusalɛm ebi kena.

²⁶ E daŋ ta bɔrɛlambu na to nɛ ewura be laŋ to be yawu kpakpaso be asɔ lela nɛ shuwa be asɔ kuŋso nɛ benapo bee keta a yɔ kena to nɛ Sɔlɔmɔn daŋ lɔŋɛ na nna.

²⁷ Ewura Rehoboam daŋ wora danyaŋ be asɔkuŋso nɛ baa keta a yɔ kena to na nna n tal shuwa peya na to nseŋ ta amo m bɔɔ bekumpo nɛ baa keni ewura be laŋ to be kabunagboŋ na so na enɔ.

²⁸ Saŋkama nɛ ewura na baa yɔ bɔrɛlambu na to, bekumpo na bee ta asɔkuŋso na nna a keta. Ewura na baaŋ bɛta n yɔ epe nɛ b naŋ bɛta amo n ya wɔtɔ bekumpo be ebu na to.

²⁹ B sibɛ ewura Rehoboam be kusɔ nɛ e wora kikɛ n wɔtɔ Juda be bewura be adrasheŋ be nwɔl to.

³⁰ Saŋɛ so nɛ ewura Rehoboam daa la Juda be ewura na, mo nɛ Israɛl be ewura Jeroboam daa kɔ abar kena nna saŋkikɛ.

³¹ Ewura Rehoboam ka wu, kakpa nɛ baa puli bewurbi ashi Jerusalɛm nɛ k la ewura Deevid be kade to na nɛ b puli mo. Ndoŋ nna nɛ mo pibinyɛn Abija sɔ mo so n ji kuwura.