1 Bewura 13 - EBƆRƐ BE KAWƆL

¹ Kachako nɛ ewura Jeroboam wɔ bɔrɛsure na ase a lara sarga ashi Bɛtɛl nɛ Enyɛnpe Ebɔrɛ yili Juda n shuŋi anebi ndoŋ.

² Kusɔ nɛ Enyɛnpe Ebɔrɛ kaŋɛ fanɛ anebi na e kaŋɛ a laŋɛ bɔrɛsure na be kaplɛa so e la fanɛ: “Baaŋ kurge kebia ko ashi ewura Deevid be kanaŋ to n nase mbe ketre Josaya. E beeŋ mɔ bɔrɛmatapoana nɛ baa lara esarga a deŋi kumo so ere n lara sarga n deŋi kumo so nseŋ chɔɔ dimɛdi be awibi kumo so.”

³ Kusɔ nɛ feeŋ ta m pin fanɛ Enyɛnpe Ebɔrɛ na e bɔla ma to a malga e la fanɛ: “bɔrɛsure ere beeŋ tɔr m bureto nɛ kumo be nsunɔ e franyaŋ to.”

⁴ Ewura Jeroboam ka nu loŋ, nɛ e teŋi enɔ ŋ ŋini anebi na nseŋ kaŋɛ: “Men pɛ mo!” Epul na to nɛ mbe enɔ na wɔl nɛ e nyɔŋ kumo to ŋ gben.

⁵ Nɛ bɔrɛsure na bureto nɛ kumo be nsunɔ na franyaŋ to fanɛ kananɛ anebi na kaŋɛ ashi Enyɛnpe Ebɔrɛ be ketre to na gbagba.

⁶ Ndoŋ nna nɛ ewura Jeroboam kaŋɛ anebi na le: “Jande kule Enyɛnpe fo Ebɔrɛ na nɛ e chɛ ma enɔ n sa ma!” Nɛ anebi na kule Ebɔrɛ nɛ mbe enɔ na nya alenfia.

⁷ Kumo be kaman nɛ ewura na kaŋɛ anebi na le: “Ba nɛ an yɔ epe nɛ fo ya fin kusɔ ko n ji. Meeŋ sa fo kakɛ ŋkpal kusɔ nɛ fo wora ere so.”

⁸ Nɛ anebi na kaŋɛ: “Hale fo ta fo asɔ nɛ fo kɔ kikɛ be bargato n sa ma gba, maaŋ bɛ fo so n ya ji fo ajibi ŋko n nuu fo nchu.

⁹ Enyɛnpe Ebɔrɛ na e kaŋɛ ma fanɛ n sa maŋ kaŋ ji ajibi ŋko n nuu nchu, ŋko n naŋ bɛta m bɔla ekpa nɛ m bɔla m ba na.”

¹⁰ Amoso e daa maŋ naŋ bɔla ekpa nɛ e daŋ bɔla m ba na ama e daŋ bɔla ekpa pɔtɛ nna.

Anebi nimuso ko nɛ e shi Bɛtɛl na be asheŋ

¹¹ Kumo be jemanɛ na so nɛ anebi nimuso ko nɛ e wɔ Bɛtɛl be mbinyɛnsobi ba kaŋɛ mo kusɔ nɛ anebi nɛ e shi Juda na ba wora kumo be kachɛ na ashi Bɛtɛl nɛ kusɔ nɛ e kaŋɛ ewura Jeroboam.

¹² Nɛ anebi nimuso na bishi: “E ka lar a yɔ na, ekpa mo nɛ e bɔla?” Nɛ mbe mbia na ŋini mo ekpa na.

¹³ Ndoŋ nna nɛ anebi nimuso na shin nɛ b ta gaare n deŋi mbe kurma so, nɛ e dii mo,

¹⁴ n ju m bɛ anebi nɛ e shi Juda na so. E ka ya wu mo nɛ e chena kedibi gboŋgboŋi ko be kifi to, nɛ e bishi mo le: “Fo e la Juda be anebi na a?” Nɛ kanyɛn na kaŋɛ le: “Mm, ma nna.”

¹⁵ Nɛ anebi nimuso na kaŋɛ mo le: “An yɔ laŋ to nɛ fo ya ji kusɔ ko.”

¹⁶ Nɛ anebi nɛ e shi Juda na kaŋɛ le: “M maaŋ tiŋ n tu fo n yɔ, ma alɛ maaŋ tiŋ n tu fo n ji ŋko n tu fo n nuu shɛŋ,

¹⁷ ŋkpal manɛ so Enyɛnpe Ebɔrɛ na kaŋɛ ma nna fanɛ n sa maŋ kaŋ ji ŋko n nuu shɛŋ, ŋko n naŋ bɔla ekpa nɛ m bɔla so m ba na n yɔ epe.”

¹⁸ Ndoŋ nna nɛ anebi nimuso na kaŋɛ le: “Ma alɛ gba la anebi nna. Enyɛnpe Ebɔrɛ be malaika e kaŋɛ ma fanɛ n yɛr fo ma laŋ to nɛ fo ya fin kusɔ ko n ji.” Ama anebi nɛ e shi Juda na daa maŋ nyi fanɛ anebi nimuso na daa ku efɛ nna.

¹⁹ Ndoŋ nna nɛ Juda be anebi na yɔ anebi nimuso na be laŋ to nɛ b ya ji ajibi.

²⁰ B ka tase a ji na nɛ Enyɛnpe Ebɔrɛ kaŋɛ anebi nimuso na

²¹ fanɛ e kaŋɛ Juda be anebi na le: “Enyɛnpe Ebɔrɛ yɛ, fo maŋ wora mo kasonu, nseŋ kini kusɔ nɛ e kaŋɛ fanɛ fo wora na.

²² E yɛ kakpa nɛ e kaŋɛ fanɛ fo sa maŋ kaŋ ji nɛ fo ba chena n ji. Amoso ŋkpal kusɔ nɛ fo wora ere so, feeŋ wu nɛ b maaŋ puli fo kakpa nɛ b puli fo kanaŋ to ebi na.”

²³ B ka ji ajibi na n loge na nɛ anebi nimuso na ta gaare n deŋi kurma so nɛ Juda be anebi na a dii a yɔ.

²⁴ E ka bee yɔ nɛ buluŋ ya tu mo ekpa to m mɔ mo. E daa dese kubɔrbi na so nna nɛ kurma na nɛ buluŋ na yil mbe kebuni ase.

²⁵ Basa ko ka bee choŋ nɛ b wu kebuni na ka dese kubɔrbi so nɛ buluŋ na yil kumo ase. Ndoŋ nna nɛ b yɔ Bɛtɛl n ya kaŋɛ kusɔ nɛ b wu na.

²⁶ Anebi nimuso na ka nu kumo be asheŋ nɛ e kaŋɛ le: “Anebi nɛ e kini kebɛ Enyɛnpe Ebɔrɛ be mbra so na nna na! Amoso nɛ Enyɛnpe Ebɔrɛ shin nɛ buluŋ mɔ mo nɛ Enyɛnpe be kamalga bɔlɔ so na.”

²⁷ Kumo be kaman nɛ e kaŋɛ mbe mbinyɛnsobiana le: “Men ta gaare n deŋi ma kurma so n sa ma.” Nɛ b wora loŋ,

²⁸ nɛ e dii kurma na m bɛ so n ya wu kanyɛn na be kebuni na ka dese kubɔrbi so nɛ kurma na nɛ buluŋ na yil kumo ase. Buluŋ na daa maŋ we kebuni na, kumo alɛ daa maŋ pɛ kurma na gba.

²⁹ Nɛ anebi nimuso na ta kebuni na n deŋi mbe kurma so m ba Bɛtɛl m ba shu mbe keeli nseŋ puli mo.

³⁰ Kakpa nɛ baa puli anebi nimuso na be kanaŋ to ebi nɛ e ya puli mo nɛ mo nɛ mbe mbinyɛnsobi shu mbe keeli ga ŋ kaŋɛ le: “O n niopibi. An niopibi Ebɔrɛ e yɔɔ fo nchaŋ.”

³¹ B ka puli mo n loge na nɛ anebi na kaŋɛ mbe mbinyɛnsobi le: “Ŋ kaŋ baŋ wu, men ta ma kebuni m puli m mata mo.

³² Kusɔ kama nɛ Enyɛnpe Ebɔrɛ na shin nɛ e malga a laŋɛ Bɛtɛl be bɔrɛsure nɛ Samɛria be agbirana be kaplɛa so na kikɛ beeŋ bɔlɔ so.”

Ewura Jeroboam be kulubi be asheŋ

³³ Ade kikɛ be kaman ewura Jeroboam maŋ yige alubi be kewora. E daa wɔtɔ nna a lara basa nɛ b maŋ shi Livai be kanaŋ to a ki bɔrɛmatapoana nɛ b baa shuŋ agbirlambu nɛ e pɔr na to. E daa ta esa kama nɛ e bee sha kabɔrɛmata be kushuŋ nna a ki bɔrɛmatapo.

³⁴ Le be kulubi nɛ e wora ere e naaŋ shin mbe kuwurji e tɔr nseŋ mur cheche kachako.