یهودا 1 - کتاب مقدس به زبان گیلکی - گویش رشت و غرب گیلان

¹ یهودا طرف جا، عیسی مسیحِ نوکر و یعقوبِ برار، اوشانی کی دوخواده بُبوستید و خُدای پئر درون، عزیزید، و اوشانی کی عیسی مسیحِ واسی حفظ بُبوستید ره:

² رحمت و صلح و سلامتی و محبت، فت و فراوان، شمرأ بایه.

دوروغِ آموجگاران

³ ای عزیزان، با اَنکی خَیلی ذوق دَشتیم تا اُ نجات باره کی امان همه، اونِ درون سام دَریمی شمرأ بینیویسَم، ولی لازم بیدِم اَ چن خط نیویشتنِ امرا، شیمی جا بخوام کی اُ ایمانِ درون کی ایوار همیشک ره، مقدّسینَ واسپارده بُبوسته، تقلا بُکونید.

⁴ چون مردومی کی اوشانِ محکومیت جه قدیم تعیین بُبوسته، خَلوتی شیمی میان راه پیدا بکودید. اَشان بی دینانی ایسید کی اَمی خُدا فیضَ به عیاشی تبدیل کونیدی و عیسی مسیح، تنها ارباب و اَمی خُداوندَ، حشا کونیدی.

⁵ با اَنکی شُمان ایوار، تمانِ اَشانِ جا خبر دَشتیدی، ولی خوائَم شیمی یاد باوَرَم، کی خُداوند عیسی، یهودِ مردومَ مصر سرزمین جا نجات بدَه، ولی ایوارده اوشانَ کی ایمان ناشتید، نابود بُکود.

⁶ اون، فیریشته ئانیَم کی خوشانِ اُ اقتدار مقام درون نئسائیدی، بلکی خوشانِ دُرُست جیگایَ ولَ کودید، ابدی زنجیلان امرا دَوَست و اوشانَ محاکمه واسی اُ پیله روجِ درون ظلمات میان بداشته.

⁷ اَطویی، سُدوم و عَمورَه و اُ دوروَرِ شاران، کی اوشانِ مانستن بی عفتی بکودید و اُ هرزگی دُمبال کی تنِ ره غیرِطبیعی بو، بشوئید، ابدی آتش درون مجازات بُبوستید، تا ایتا دَرس عبرت همتان ره بیبید.

⁸ با اَن همه، هَطویی، اَ مردومانَم به خوابانی کی دینیدی تکیه کونیدی، خوشانِ تن ئانَ نجستَ کونیدی و اقتدارَ رَدَّ کونیدی و آسمانی پیله چیانَ کفر گیدی.

⁹ ولی وقتی میکائیل، اُ پیله فیریشته، اُ موقع کی ابلیسِ امرا بحث کودی و موسی جنازه باره دعوا گیفتی، خورَه اجازه نَده، کی اونِ محکومیتِ اعلام کودَنِ موقع اونَ توهین بُکونه، بلکی فقط بگفت: «خُداوند، تَره توبیخ بُکونه!»

¹⁰ ولی اَشان اونچیَ کی نشناسیدی توهین کونید، اوشان بی‌شعور جانورانِ مانستنید کی هر اونچی کی غریزه جا فَهمیدی، هوشان، اَشانِ نابودی باعث به.

¹¹ وای بحالِ اوشان! چونکی هو راهیَ بشوئید کی قائِن بشو، و خوشانِ منفعتِ واسی، بَلعامِ غلطِ راهِ درون دَکَفتید و قورَحِ شورشِ درون، هلاک بُبوستیدی.

¹² اَشان، بی هی ترسی شیمی پُر محبتِ میمانی ئانِ درون، شیمی امرا خوریدی و نوشیدی ولی اُ صخره‌ ئانِ مانستن ایسید کی آبِ جیر درید و نیشه اوشانَ دِئن؛ اوشان چوپانانی ایسید کی فقط به خودشان فیکر کونیدی؛ بی وارشِ ابرانِ مانستن ایسید کی باد اوشانَ دترانه، و آخر پاییزِ بی بارِ داران ایسید کی دو مرتبه بَمردید و بَنه جا بکنده بُبوستید.

¹³ اَشان دریا پُر تلاطومِ کُولانِ مانستن ایسید کی اَشانِ بَده اعمال دریا کِخِ مانستن بیرون زَنه، و سرگردانِ ستارگان مانستن ایسید کی ابدی ظلمات اَشانِ ره تعیین بُبوسته.

¹⁴ خَنوخ، کی هَفت نسل بعدِ آدم بو، اَشانِ باره پیشگویی بُکوده و گه: «بیدین، خُداوند خو هازاران هازار مقدَسّینِ امرا آیه

¹⁵ تا همتانِ ره داوری بُکونه و تمانِ بی‌دینانَ، تمانِ اُ شریرانه کارانِ خاطری کی بی‌دینی درون بکودید محکوم بُکونه، و تمانِ اُ زشت گبانِ واسی کی بی دینِ گناهکاران، اونِ ضِد بگفتید، محکوم بُکونه.»

¹⁶ اَشان غُرغُر کونیدی و دائم ایراد گیریدی و خوشانِ گناه آلودِ خواسته ئانِ دمبال ایسید؛ اوشان مغرورانه گبان خوشانِ زوان سر آوریدی و خوشانِ منفعت ره، مردوم میان فرق نیئیدی.

دعوت استقامت ره، ایمان درون

¹⁷ ولی شُمان ای عزیزان، اَمی خُداوند عیسی مسیح رسولانِ پیشگوییَ به یاد بدَرید

¹⁸ کی شمرأ بگفتید: «آخرتا زماتِ درون، رخشن کونانی، خوائید آمون کی خوشانِ هوا وهوس ئانِ دمبال ایسید.»

¹⁹ اَشانید کی شیمی میان سیوایی توَدیدی، دنیایی آدمان ایسید و خُدا روحَ ناریدی.

²⁰ ولی شُمان ای عزیزان، خودتانَ اُ ایمانِ درون کی خَیلی مقدّسِ بنا بُکونید و روح‌القدّس امرا دعا بُکونید

²¹ و شمرأ خُدا محبتِ درون بدَرید، هُطوکی اَمی خُداوند عیسی مسیحِ رحمتِ رافا ایسید تا شمرأ ابدی زیندگی ره راهنمایی بُکونه.

²² نسبت به اُ آدمان کی دو به شک ایسید، رحیم بیبید؛

²³ بعضیانَ آتشِ جا بیرون فاکشید و نجات بدید؛ و بعضی دیگرَ ترس امرا، رحم بُکونید. ولی حتّی، اوشانِ رختِ جا کی جسمِ هوا و هوس امرا آلوده ایسه، بیزار بیبید.

²⁴ هسّا اونِ ره کی تانه شمرأ کَفتن جا حفظ بُکونه و خو جلالِ حضور درون بی‌عیب و پیله شادی جا پُر، حاضرَ کونه،

²⁵ اُ تنها خُدا و اَمی نجات‌دهندۀ یَ، بواسطۀ اَمی خُداوند عیسی مسیح، جلال و شکوه و سلطنت و اقتدار بِبه! اونَ کی جه بنا بو، الان ایسَه و تا ابد خوائه ایسان.آمین.