اوّل یوحنا 5 - کتاب مقدس به زبان گیلکی - گویش رشت و غرب گیلان

دنیایَ حَریف بوستن

¹ هركَس ايمان دَره کی عيسی هو مسيحِ موعودِ، خُدا جا بزا بُبوسته دَره؛ هرکَس پئرَ دوست دَره، اونِ زاکم دوست دَره.

² جه اَيا دَنيم كی خُدا زاكانَ دوست دَریم كی خُدایَ دوست بدَریم و اونِ حکمانَ جا اطاعت بُکونیم.

³ چون خُدایَ محبت كودن اَنه، کی اونِ حکمانَ بجا باوریم و اونِ حکمان، سنگینِ بار نیه.

⁴ چونكی هرکَس خُدا جا بزا بُبوسته بِبه، دُنیا سر حریفَ به و اَمی ایمان اُ پیروزی ایسه کی دُنیایَ حریفَ بوسته.

⁵ كيسه اونکی دُنیایَ حریفَ به، جغیر اُ کَس کی ایمان دَره عيسی خُدا پسرِ؟

⁶ اونِ کی آب و خون مَرا بامو، یعنی عیسی مسیح. نه فقط آبِ مَرا، بلكی آب و خون مَرا؛ و خدا روح ایسه کی گُوائی دِئه، چون خدا روح، حئیقتِ.

⁷ چونكی اَ سه تا ایسید کی گُوائی دیئید:

⁸ خُدا روح، آب و خون؛ و اَ سه تا، ایتائید.

⁹ اَگه اَمان آدمی گُوائیَ قُبیل کونیم، خُدا گُوائی خَیلی پیله تَره، چونكی اَن گُوائی ایسه کی خُدا، خو پسر باره فَدَه.

¹⁰ هركی خُدا پسرَ ایمان دَره، اَ گُوائیَ خو درون دَره. ولی اونکی خُدا گُوائیَ واور نُکونه، اونَ دوروغگو دَنه، چون اُ گُوائی کی خُدا خو پسر باره فَده، واور نُکوده.

¹¹ و اُ گُوائی اَنه کی خُدا امرا ابدی زیندگی بِبخشه، و اَ زیندگی اونِ پسر دُرونِ.

¹² اونکی پسرَ دَره، زیندگی دَره و اونکی خُدا پسره نَدَره زیندگیَ نخوائه داشتن.

آخربسر

¹³ اَ چیانَ شمرأ بینیویشتم، کی خُدا پسرِ نامَ ایمان دَرید، تا بدَنید کی ابدی زیندگیَ دَریدی.

¹⁴ اَن، هو اطمینانی ایسه کی اونِ محضر میان دَریم، کی هر زمات ایچی مطابق اونِ خواسته بخوائیم، اَمی صِدایَ ایشتاوه.

¹⁵ و اَگه دَنیم هر اونچیَ کی اونِ جا بخوائیم اَمی صدایَ ایشتاوه، پس اطمینان دَریم اونچیَ کی اونِ جا بخواستیم، فیگیفته ایم.

¹⁶ اَگه ایکس بيدينه كی اونِ برار گُناهی کودن دَره کی مرگَ ختم نیبه دُعا بُکونه و خُدا اونَ زیندگی خوائه فَدن. اَنه اُ کَس باره گَم کی اونِ گُناه مرگَ ختم نیبه. گُناهی نَئه کی مرگَ ختم بِه، اَجور گُناه باره نَگم کی بایسی دُعا کودن.

¹⁷ تمانِ نادُرُستِ کاران گُناهِ، ولی گُناهی ئَم نَئه کی مرگَ ختم نیبه.

¹⁸ اَمان دَنیم کی هرکس خُدا جا بزا بُبوسته دَره، گُناهِ درون ادامه نَدِه، بلکی عیسی کی ’خُدا جا بزاسته بُبوست‘ اونِ جا محافظت کونه و اُ شریرِ دَس اونَ فأنرسه.

¹⁹ اَمان دَنیم کی جه خُدا ایسیم، و تمانِ دُنیا اُ شریر قدرتِ جیر دَره.

²⁰ و اَنم دَنیم كی خُدا پسر بامو و امرا فهم بِبخشه، تا اونَ کی حئیقت ایسِه بشناسیم و اَمان اونِ درون کی حئیقتِ ایسائیم، يعنی اونِ پسر، عيسی مسيحِ درون. اونِ حئیقتی خُدا و ابدی زیندگی.

²¹ ای کوجه زاکان، شمرأ بُت ئان جا دور بِدَرید.