मरकुस 15 - गढवली नयो नियम

पिलातुस का संमणी यीशु

¹ अर सुबेर लै के प्रधान याजकों ल दाना-सयाणों अर मूसा की व्यवस्था तैं सिखांण वलो ल बल्कि सैरी महासभा का लुखुं ल योजना की चर्चा कैरी के यीशु तैं बन्धवै दींनि अर न्याय कनु कु यहूदिया जिला का रोमी गवर्नर मा लिजै कै पिलातुस मा सौंपी दींनि।

² पिलातुस ल यीशु तैं पूछि, “क्य तु यहूदियों कु राजा छै?” यीशु ल पिलातुस तैं जवाब दींनि, “तु अफी बुल्णी छै मि उ ही छो।”

³ प्रधान याजक यीशु पर भौत बातों कु भंगार लगांणा छा।

⁴ पिलातुस ल वेमा फिर पूछि, तु कुछ जवाब किलै नि दींणि छै देख यु लोग त्वे पर कथग बातों कु भंगार लगांणा छिन?

⁵ यीशु शांत छो इख तक कि वेल कुछ नि बोलि पिलातुस भैचक रै गै।

यीशु तैं मौत की आज्ञा

⁶ हर साल पिलातुस फसह का त्योहार मा कै एक कैदी तैं जै तैं भि लोग चांदा छा ऊंकी खातिर छोड़ी दींदु छो।

⁷ वीं बगत बरअब्बा नौं कु एक मनिख छो जु झगड़ा कनवलों दगड़ा कैद मा छो जौन रोमी सरकार का खिलाफ विरोध मा कुछ सिपैयूं की हत्या कैरी छै।

⁸ अर भीड़ पिलातुस मा ऐ अर बिनती कन लगि गै कि जन तु हम कु करदी औंणि छै उन ही कैर अर वेमा बोलि, हम कु एक कैदी तैं मुक्त कैर दे।

⁹ पिलातुस ल ऊं बट्टी पूछि, “क्य तुम चदयां कि मि तुम कु यहूदियों का राजा तैं छोड़ी द्यों”

¹⁰ किलैकि उ जंणदु छो कि प्रधान याजक ल यीशु तैं जलन खोरि मा पकड़वे छो।

¹¹ पर प्रधान याजक ल लुखुं की भीड़ तैं उगसै कि उ पिलातुस बट्टी यीशु तैं छुड़णा का बदला बरअब्बा तैं ऊंकी खातिर छोड़ी द्यो।

¹² यु सूंणि के पिलातुस ल ऊंमा फिर पूछि, “जैकु तुम यहूदियों कु राजा बुल्णा छा वेको मिल क्य कन?”

¹³ भीड़ फिर चिल्लै कि, “वे तैं सूली पर मारि द्या”

¹⁴ पिलातुस ल पूछि, “किलै येल क्य बुरै कैरी”पर भीड़ और जोर से चिल्लै “यु तैं सूली पर चढ़ै द्या”

¹⁵ तब पिलातुस ल भीड़ तैं खुश कने मनसा से बरअब्बा तैं ऊंकी खातिर छोड़ी दींनि अर यीशु तैं कोड़ा मरवै कै रोमी सैनिको तैं सौंपी दींनि कि उ सूली पर चढ़ै जौ।

सिपैयूं को यीशु की मजाक उड़ाण

¹⁶ सिपै यीशु तैं किला का भितर का चौक मा ली गैनी जैकु प्रीटोरियुम बुल्दा छा अर सैरी पलटण तैं बुलै दींनि जु एक सैनिको को भौत बड़ो झुण्ड छो।

¹⁷ तब ऊंल यीशु तैं बैंगनी जु शाही कपड़ा छा पैरेनि जन राजा पैरदो छो अर वेको ठट्टा कैरी अर कांडों कु मुगट बणै कै वेका मुंड मा रखि

¹⁸ अर इन बोलि के यीशु तैं प्रणाम कन लगि गैनी, “हे यहूदियों का राजा प्रणाम”

¹⁹ उ बार-बार वेका मुंड मा सरकंडा ल मरणा छा अर वेको अपमान कन कु वे पर कई बार थुकणा छा अर घुंडा टेकि के वे तैं प्रणाम कनु कु नाटक करणा रैनी।

²⁰ जब ऊंल यीशु को मखोल कैरेली छो त वे पर बट्टी बैंगनी कपड़ा उतारी दींनि अर वेका कपड़ा पैरे दींनि अर तब वे तैं सूली पर चढ़ाणु कु शहर बट्टी भैर ली गैनी।

²¹ जब उ शहर बट्टी भैर जांणा छा, तब शमौन नौं कु एक कुरेनि जु कै गौं बट्टी यरूशलेम शहर मा औंणु छो, सिकन्दर अर रुफुस कु बुबा छो अर उख बट्टी जांणु छो सैनिको ल वे तैं सूली उठै के वीं जगह पर लिजांणु कु जख यीशु तैं सूली पर चड़ौण छो लिजांण की आज्ञा दींनि।

यीशु तैं सूली पर चढ़ांण

²² सैनिको ल यीशु तैं पकड़ी के गुलगुता नौं कि जगा पर ली गैनी ज्यांकु नौं कु मतलब खोपड़ी छो।

²³ तब सैनिको ल यीशु तैं मुर मिल्युं दाखमधु दींनि जु दर्द तैं मैसूस नि हूंण मा मदद करदु छो पर यीशु ल नि लींनि।

²⁴ तब ऊंल यीशु तैं सूली पर कीलों ल ठोकी के चढ़ै दींनि अर वेका कपड़ोंं तैं बंटणु कु पर्ची बणै कि जै तैं जु भि मिललो वे तैं आपस मा बांटि द्याला।

²⁵ अर सुबेर का नौं बजी का बगत जब ऊंल यीशु तैं सूली पर चढ़ै।

²⁶ अर ऊंल यीशु को भंगार की एक तख्ती लिखीं के वेकी सूली का मथि ठोकी दींनि कि “यहूदियों कु राजा”

²⁷ ऊंल यीशु का दगड़ा अलग अलग सूली पर द्वी डाकूओं तैं एक वेकी दैंणि तरपां अर हैंका तैं वेकी बैं तरपां सूली पर चढ़ै दींनि।

²⁸ अर इन कै तब पवित्र शास्त्र कु उ वचन जु मसीह का बार च पूरो हवे कि उ परायूं का दगड़ा गणे गै।

²⁹ अर आंण-जांण वला भि मुंड हलै-हलै कै इन बोलि के वेकी बुरै कना छावा मन्दिर तैं ढुलण वला अर तीन दिनों मा बनांण वला

³⁰ सूली पर बट्टी उतरी के अफ तैं बचौ।

³¹ ई रीत से प्रधान याजक, मूसा की व्यवस्था तैं सिखांण वलो का समेत आपस मा मजाक उड़ाणा छा “येल औरों तैं बचै पर अफ तैं नि बचै सकदु।”

³² यु आदिम जु मसीह हूंणो कु दावा कनु छो, “हे इस्राएल का लुखुं का राजा मसीह सूली बट्टी उतरी के औ” हम भि त्वे तैं देखि कै विश्वास करुला जु द्वी मनिख यीशु का दगड़ा सूली पर चढैयां छा उ भि यीशु कि बुरै कना छा।

यीशु कु प्राण छुड़ण

³³ दोपहरा बारा बजि का लगभग बट्टी तीन बजि का लगभग तक, सैरा मुल्क मा अंधेरो छै गै।

³⁴ अर तीन बजि का लगभग यीशु ल जोर से धै लगै के बोलि, “इलोई-इलोई लमा शबक्तनी ज्यांकु मतलब च मेरा परमेश्वर-मेरा परमेश्वर तिल मि तैं किलै छोडे़ले”

³⁵ अर कुछ लोग जु उख नजीक खड़ा छा ऊंमा बट्टी कुछों ल सूंणि पर नि समझिनि अर एक दुसरा मा बोलि, “सूंणा यु एलिय्याह तैं अपड़ी मदद कु बुलांणु च।”

³⁶ अर ऊंमा बट्टी एक सिपै भागि के एक स्पंज तैं सिरका मा डुबै के एक सरकंडा पर रखि के यीशु तैं चुसै अर बोलि, “ठैरा अभि कुछ नि कैरा दिखदां, एलिय्याह वे तैं भुयां उतनु कु औंदु च कि नि औंदु।”

³⁷ तब यीशु बड़ा शब्द से चिल्लै कै मोर गै।

³⁸ अर यरूशलेम शहर का मन्दिर मा लटकयूँ मोटू परदा जु परमेश्वर की उपस्थित मा जांण से रुकदो छो मथि बट्टी मूड़ि तक फटी के द्वी टुकड़ा हवे गै।

³⁹ अर जु सुबदार यीशु का संमणी खड़ो छो जब वेल यीशु तैं जोर से चिल्लै कै मुरण देखि त वेल बोलि, “सचमुच यु मनिख परमेश्वर कु नौंनो छो”

⁴⁰ कथग ही जनन भि दूर बट्टी दिखणी छै: ऊंमा मरियम जु मगदल गौं की छै अर याकूब अर योसेस कि ब्वे मरियम अर सलोमी छै।

⁴¹ जब यीशु गलील जिला बट्टी हवे के जांणु छो त यु तीन जननों ल चेलों का रूप मा वचन सुनांणु कु वेका पिछनै चलदी छै अर वेकी सेवा भक्ति करदी छै अर और भि भौत जनन छै जु यीशु का दगड़ा यरूशलेम शहर बट्टी अयीं छै।

यीशु तैं गड़ै जांण

⁴² जै दिन यीशु तैं सूली पर चड़ै रुमुक हवे गै अर यु दिन यहूदियों का विश्राम कु दिन जु परमेश्वर को पवित्र दिन से पैली कु दिन छो जैकु तैयारी कु दिन बुल्दा छा

⁴³ अरिमतियाह शहर कु रांण वलो एक आदिम जैकु नौं यूसुफ छो यु उखै कि महासभा कु सम्मनित सदस्य छो अर यु भि ऊंमा बट्टी एक छो जु चांदा छा की जल्द ही परमेश्वर कु राज्य औ, उ बगैर कि डौर से पिलातुस मा गै अर यीशु का देह तैं सूली बट्टी मुड़ी निकलणु कु अर खडयोण की अनुमति मांगि।

⁴⁴ पिलातुस ल विश्वास नि कैरी की यीशु इथग जल्दी मोरि गै अर वेल सुबदार तैं बुलै कै पूछि, “क्य यु सच च की वे तैं मुरयां इथग देर हवे गै”

⁴⁵ जब पिलातुस ल सुबदार बट्टी हाल चाल जांणि लींनि तब वेल यीशु कि लांश यूसुफ तैं दे दींनिणे की अनुमति द्ये दींनि।

⁴⁶ तब यूसुफ ल यीशु कि लांश तैं सूली बट्टी उतारी अर एक चदरा लै के वेमा लपेटी के एक पोड़ पर खुदीं कब्र मा छै रखि दींनि अर कब्र का द्वार पर एक गोल ढुंगों लगै दींनि।

⁴⁷ मरियम जु मगदल गौं की छै अर याकूब अर योसेस कि ब्वे मरियम दिखणी छै कि यीशु तैं ऊंल कख रखि।