इब्रानी 7 - गढवली नयो नियम

मलिकिसिदक याजक

^1-3 यु मलिकिसिदक शालेम शहर कु राजा अर सबसे बड़ा पिता परमेश्वर कु याजक छो; वेको नौं कु मतलब छो “न्याय का दगड़ी शासन कन वलो राजा” अर शालेम का राजा कु मतलब च “शान्ति कु राजा” जब अब्राहम चार राजाओं तैं मारि के लौटि छो, तब मलिकिसिदक याजक वे तैं मिली अर वे तैं आशीष द्ये, अब्राहम ल मलिकिसिदक याजक तैं युद्ध मा जितण का बाद जु कुछ भि मिली छो, वेल वीं सभि चीजों कु दसवां हिस्सा (दशमांश) द्ये छो। जैको न त बुबा, न ब्वे, न वंशावली च, जै की न त दिनों की शुरुआत अर न जीवन कु अन्त च; पर पिता परमेश्वर का नौंनो का स्वरूप ठैरी कै उ हमेशा कु याजक बणयुं रै।

⁴ अब यु पर ध्यान कैरा कि मलिकिसिदक याजक कन महान छो जै तैं पुरखा अब्राहम ल अपड़ा दुश्मनों बट्टी युद्ध बट्टी जु कुछ लये छो वेको दसवां अंश द्ये।

⁵ मूसा की व्यवस्था सिखांद कि लेवी का वंशज, जु याजक बणदींनि, ऊं तैं इस्राएल देश का हैंका लोग, मतलब ऊंका अपड़ा विश्वासी लुखुं मा जु कुछ च, वेमा बट्टी दसवां हिस्सा लींण चयणु च; पर उ याजक अर हैंका लोग भयों का जन छिनी किलैकि उ सब अब्राहम का वंशज छिनी।

⁶ पर यु आदिम, मलिकिसिदक याजक, जु लेवी का वंशज भि नि छो, अब्राहम बट्टी दसवां अंश लै जबकि अब्राहम उ छो जै दगड़ी पिता परमेश्वर की करार कैरी, फिर भि मलिकिसिदक याजक ल वे तैं आशीष द्ये।

⁷ अर हम तैं पक्का पता च कि जु आशीष दींद उ आशीष पांण वला बट्टी भि बड़ो हूंद।

⁸ अर लेवी का वंशजों का याजक जु दशमांश लींदा छा, उ ऊई छा जु एक दिन मोरि जंदींनि, पर यु मलिकिसिदक याजक जैल दशमांश लै छो, वेका बारा मा परमेश्वर का वचन मा गव्है दिये गै कि उ अब भि जीवित च।

⁹ त हम यु भि बोलि सकदां, कि जब अब्राहम ल मलिकिसिदक याजक तैं दसवां हिस्सा द्ये, तब तक लेवी अब्राहम का कुटुम्ब मा पैदा नि हवे छो। पर फिर भि इन च कि अब्राहम का वंशज हूंणा का कारण लेवी ल अफ ही वे तैं उ दसवां हिस्सा द्ये।

¹⁰ किलैकि जै बगत मलिकिसिदक याजक ल अपड़ा बुबा बट्टी भेंट कैरी, वे बगत यु अपड़ा बुबा का देह मा ही छो।

एक नया याजक की जरूरत

¹¹ लुखुं तैं याजकों की रीति का आधार पर ही मूसा की व्यवस्था दीं छै जब लेवी गोत्र का हारुन बट्टी ए छै, पर ऊं तैं उ ही रीति का द्वारा सिद्ध नि बणये गयै छो; इलै एक और याजक का आंणै की जरूरत छै, एक इन याजक जु हारुन का जन न बल्कि मलिकिसिदक याजक का जन हो।

¹² किलैकि जब याजकों का वर्गों मा बदलाव हूंद, त व्यवस्था कु भि बदलाव हूंण जरूरी हूंद।

¹³ किलैकि हम या बात मसीह का बारा मा बुल्णा छा, जु एक अलग गोत्र बट्टी छो; वे गोत्र मा बट्टी कभी भि कै एक याजक का रूप मा वेदी पर सेवा नि कैरी छै।

¹⁴ त सभि जणदींनि, कि हमारो प्रभु यीशु यहूदा कु वंशज च अर मूसा ल यहूदा का कै भि वंशज का यहूदी याजक बनांण का बारा मा कुछ नि बतै अर न ही यहूदा कु कुई वंशज कभी याजक बंणि।

¹⁵ जै बारा मा मि बात कनु छो व बात और भि जादा साफ हवे गै, कि मूसा की व्यवस्था अर याजकों तैं बदली गै, किलैकि हमारो महायाजक जु अब ऐ, उ मलिकिसिदक याजक का जन च।

¹⁶ यीशु कै विशेष मनिख मतलब लेवी कु वंशज हूंणु कु या व्यवस्था अर विधियों का कारण याजक नि बंणि, पर उ अपड़ा जीवन का सामर्थ का कारण याजक बंणि गै जु कभी खत्म नि होला।

¹⁷ किलैकि वेका बारा मा परमेश्वर कु वचन गव्है दींद कि, “उ मलिकिसिदक याजक की रीति पर हमेशा कु महायाजक बंणि गयै।”

¹⁸ इन ही कै, पैली मूसा की व्यवस्था उन ही कैरी साकी जु कन चयणु छो; अर यांकि कुई कीमत नि छै इलै या बदली द्ये गै।

¹⁹ (इलै कि मूसा की व्यवस्था ल कै भि बात तैं सिद्धि नि कैरी) अर यांकि जगह पर हम तैं एक इन बड़ी आस च, जु यीशु मसीह मा च ज्यांका द्वारा हम पिता परमेश्वर का नजीक जै सकदां।

नया महायाजक की महानता

²⁰ अर यांका दगड़ी ही जब पिता परमेश्वर ल यीशु तैं याजक का रूप मा नियुक्त कैरी त वेल एक नई प्रतिज्ञा लै।

²¹ किलैकि लेवी का वंशज त बगैर सौं लियां यहूदी याजक ठैरे गैनी पर यीशु सौं का दगड़ी पिता परमेश्वर की तरपां बट्टी चुणै गै ज्वा यीशु का बारा मा बुल्दी, “प्रभु परमेश्वर ल या नई प्रतिज्ञा लै, मि अपड़ा फैसला बट्टी नि पछतौलु, कि तु हमेशा कु मलिकिसिदक का समान एक याजक छै।”

²² इलै यीशु उ च जु हम तैं नई प्रतिज्ञा की आस दींद।

²³ इख यीशु मसीह का याजक हूंणो कु एक और फैदा च, वे त भौत सी यहूदी याजक बणदी ऐनी, किलैकि ऊंमा बट्टी हर आदिम मोरि गै इलै उ अपड़ो काम तैं जारी नि रख सकिनि।

²⁴ पर यीशु हमेशा ही कु रौंद; इलै कुई भि याजक का रूप मा वेकी जगह अब नि ल्यालो।

²⁵ इलै की जु यीशु का द्वारा पिता परमेश्वर का संमणी औंदींनि उ, ऊं लुखुं कु पूरो-पूरो बचाव अर उद्धार कैरी सकद, किलैकि यीशु लुखुं कु पिता परमेश्वर बट्टी बिनती कनु कु हमेशा जीवित अर उपस्थित च।

²⁶ किलैकि यीशु इन महायाजक च जै की हम तैं जरूरत च; उ पवित्र च, अर पापरहित च, अर शुद्ध च, अर वे तैं स्वर्ग मा मथि उठै गै।

²⁷ अर उ महायाजक जु हारुन का वंशज छा, ऊं जन यीशु तैं जरूरत नि च कि रोज पैली अपड़ा पापों अर फिर लुखुं का पापों का बलिदान चढ़ौण; किलैकि यीशु ल एक ही बार मा सभि लुखुं का पापों कु अपड़ा आप तैं बलि चढ़ै दींनि।

²⁸ किलैकि मूसा की व्यवस्था त कमजोर लुखुं तैं महायाजक चुणदी; पर व नई प्रतिज्ञा जु मूसा की व्यवस्था का बाद ऐ वेल पिता परमेश्वर का नौंना हमारा यीशु मसीह तैं महायाजक का रूप मा चुणि ज्वा मूसा की व्यवस्था तैं बदली दींनि, अर यीशु तैं चुणदी जु हमेशा कु हम कु सिद्ध महायाजक बंणि गै।