1 यूहन्ना 4 - गढवली नयो नियमआत्माओं तैं परखा 1 हे प्रियों, हरेक जु पिता परमेश्वर की पवित्र आत्मा बट्टी बुल्णो को दावा करदींनि; ऊंमा बट्टी हरेक पर विश्वास नि करयां, पर आत्माओं तैं परखा, कि उ आत्मा पिता परमेश्वर की तरपां बट्टी च कि न; किलैकि भौत सारा झूठा संदेश दींणवला छिनी जु बुल्दींनि की हम पिता परमेश्वर कि तरपां बट्टी बुल्दियां दुनिया मा ऐ गैनी। 2 पिता परमेश्वर का आत्मा तैं तुम इन ही कै पछांण सकदियां, कि जु कुई आदिम मणी लींद, कि यीशु मसीह मनिख बंणि के ऐ, उ पिता परमेश्वर की तरपां बट्टी ऐ। 3 अर जु कुई आदिम यीशु तैं नि मंणदु, उ पिता परमेश्वर की तरपां बट्टी नि च; यु ही मसीह का बैरी की आत्मा च; जैका बारा मा तुम ल सूंणि येले, कि उ औंण वलो च अर अब भि दुनिया मा च। 4 हे प्रिय नौंनो, तुम पिता परमेश्वर का लोग छा अर तुम ल ऊं झूठा लुखुं पर जीत पयले; किलैकि जु पवित्र आत्मा तुम मा च, उ शैतान बट्टी भि बड़ो च, जु ईं दुनिया का लुखुं पर राज्य करदो। 5 उ झूठा संदेश दींणवला दुनिया का छिनी, उ दुनिया की बातों तैं बुल्दींनि, अर दुनिया का लोग वेकी सुणदींनि। 6 हम पिता परमेश्वर का तरपां बट्टी छा। जु पिता परमेश्वर तैं जंणदु च, उ हमारी सुणदो; जु पिता परमेश्वर तैं नि जंणदु उ हमारी नि सुणदो; इन्ही के हम सच की आत्मा तैं अर झूठ की आत्मा तैं पछांण सकदा छा। प्रेम का द्वारा परमेश्वर तैं जनण 7 हे प्रियों, हम आपस मा प्रेम रखा; किलैकि प्रेम पिता परमेश्वर की तरपां बट्टी च अर जु कुई दूसरों बट्टी प्रेम करदो, उ पिता परमेश्वर की सन्तान च अर पिता परमेश्वर तैं जंणदु च। 8 जु दूसरों बट्टी प्रेम नि करदो उ पिता परमेश्वर तैं नि जंणदु, किलैकि पिता परमेश्वर प्रेम च। 9 जु प्रेम पिता परमेश्वर हम बट्टी करदु, उ यां बट्टी प्रकट हवे कि पिता परमेश्वर ल अपड़ा इकलौता नौंना यीशु मसीह तैं दुनिया मा भेजि कि हम वेका द्वारा अनन्त जीवन पां। 10 सचै यां मा नि च, कि हम ल पिता परमेश्वर बट्टी प्रेम कैरी, पर यांमा च कि पिता परमेश्वर ल हम बट्टी प्रेम कैरी, अर हमारा पापों का प्रायश्चित बलिदान का कारण अपड़ा नौंना तैं भेजि। 11 हे प्रियों, जब पिता परमेश्वर ल हम बट्टी इन प्रेम कैरी, त हम तैं भि एक दुसरा बट्टी प्रेम रखण चयणु च। प्रेम का द्वारा पिता परमेश्वर तैं दिखण 12 पिता परमेश्वर तैं कभि कैल नि देखि; जु हम आपस मा प्रेम कैरा, त पिता परमेश्वर हम मा बणयूँ रौंद; अर पिता परमेश्वर को प्रेम हम मा सिद्ध होलो। 13 यां बट्टी ही हम जंणदा, कि पिता परमेश्वर हम मा, अर हम पिता परमेश्वर मा रौंदयां, किलैकि पिता परमेश्वर ल हम तैं अपड़ी पवित्र आत्मा मा बट्टी हम तैं दियूं च। 14 अर हम ल यीशु मसीह तैं देखि अर वेकी गव्है दींणा छा कि पिता परमेश्वर ल अपड़ो नौंना यीशु मसीह तैं दुनिया का लुखुं कु उद्धारकर्ता हूंणु कु भेजि। 15 जु कुई यु मणी लींद, कि यीशु पिता परमेश्वर को नौंनो च त पिता परमेश्वर वेमा रौंदो, अर उ पिता परमेश्वर मा रौंदो। 16 अर हम अच्छा ढंग ल जांणि ग्यां अर हम विश्वास भि करदां कि पिता परमेश्वर हम बट्टी प्रेम करदो। पिता परमेश्वर प्रेम च अर जु कुई प्रेम मा रौंदो उ पिता परमेश्वर मा रौंदो अर पिता परमेश्वर वेमा रौंद। 17 यां बट्टी ही प्रेम हम मा पूरा हवे कि, न्याय का दिन हम तैं हिम्मत मिलो की उ हम तैं दंड नि द्यो, किलैकि मसीह का जन हम दूसरों बट्टी प्रेम करदां अर ईं दुनिया मा मसीह ही जन रौंदयां। 18 प्रेम मा डौर नि हूंद, नथरी सच्चा प्रेम डौर तैं दूर कैरी दींद, किलैकि जु डरदु च उ दंड बट्टी ही डरदु, जु डरदु च, उ प्रेम मा सिद्ध नि हवे। 19 पिता परमेश्वर ल हम बट्टी प्रेम कैरी इलै हम पिता परमेश्वर अर एक दूसरों बट्टी प्रेम करद्यां। 20 जु कुई बोलु, मि पिता परमेश्वर बट्टी प्रेम करदु छो, पर अपड़ा विश्वासी भैय बट्टी बैर रखो; त उ झूठो च; किलैकि जब उ अपड़ा ही विश्वासी भैय बट्टी, जै तैं वेल दिखयूं च, प्रेम नि करदो, त उ पिता परमेश्वर बट्टी जै तैं वेल नि देखि प्रेम नि कैरी सकद। 21 अर मसीह बट्टी हम तैं य आज्ञा मिली च, कि जु कुई अपड़ा पिता परमेश्वर बट्टी प्रेम करद, उ अपड़ा विश्वासी भैय बट्टी भि प्रेम कैरो। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.