Yoonasa 2 - Geeshsha Maxaafa

Yoonasa Woosa

¹ Yoonasi moluwa ulon de7ishe, ba Godaa Xoossaa haysada yaagidi woossis.

² “Taani ta waayan de7ashe nena xeegas; neka taw si7adasa. Taani Si7oole ciimmuwa giddon de7ashe, maado koyada neeko waassas Neka ta waasuwa si7adasa.

³ Neeni tana abba ciimmuwan duge yeggadasa. Haathi ta yuushuwa teqis; wolqaama zuley ta bollara aadhis.

⁴ ‘Taani ne sinthafe wora holetas, Shin ne Geeshsha Keetha zaarada be7ana’ gada qopas.

⁵ Haathi taw qoodhe gakis, Abbaa ciimmoy tana mittis. Abban de7iya maatay ta huuphen xaaxetis.

⁶ Taani haatha garsan de7iya dereta baasuwa gakada mitettas, biitta wulay merinaw ta bolla gordetis, Shin ta Godaw Xoossaw, neeni ta shempiw iita ollafe kessadasa.

⁷ Ta shempiya doccida wode, Godaw ta nena qopas; ta woosay neeko ne Geeshsha keethaa gakis.

⁸ Hada gidida eeqa xoossata bolla zempeysati, new de7iya banta ammanetetha aggoosona.

⁹ Shin taani galata mazmure new yarshana. Ta qangidabaaka new gathana. Ayis giiko, atotethay Xoossafe” yaagis.

¹⁰ Hessafe guye, Goday moluwa kiittis. Moloy Yoonasa mela biitta bolla cooyis.