Yoonasa 1 - Geeshsha Maxaafa

Yoonasi Xoossafe Baqatuwa

¹ Godaa qaalay Amaate na7aa, Yoonasas haysada yaagidi qoncis.

² “He katama asa iitatethay ta sinthe gakida gisho, dendada hini wolqaama katama Nanawe bada sabbaka” yaagis.

³ Shin Yoonasi Godaa sinthafe betidi Tarsesa biitta baanaw keyis. I, Yoophe katama wodhidi Tarsesa biya markabe demmis. Godaa sinthafe betanaw koyidi Tarsesa baanaw koshshiya miishe ciggidi markabiyan gelis.

⁴ Shin Goday abba bolla wolqaama carkuwa denthis. Abban wolqaama hobbey wolqaamida gisho markabiya meqanaw gakasu.

⁵ Yaatin markabiya oosanchoti yayyidosona. Issoy issoy ba xoossaako ba xoossaako waassis. Qassi markabey kawuyana mela giddon de7iya caana denthidi abban yeggidosona. Shin Yoonasi markabiyas giddo gelidi wolqaama dhisko dhiskis.

⁶ Markabiya laaggeysi iyako shiiqidi, “Haysa mela saaten waana dhiskay? Denda ne xoossa woossa! Ooni eri I nuus qadhetidi nuna ashshanekonne” yaagis.

Yoonasi Abban Yegetis

⁷ Markabiya oosanchoti issoy issuwako, “Haa yiite, ha iitabay nuna oodde gaason gakidaako eranaw saama yeggana” yaagidosona. Saama yeggin, saamay Yoonasa bolla wodhis.

⁸ Enti Yoonasako, “Ha iitabay oodde gaason nu bolla gakidaako ane nuus oda. Ne oosoy aybee? Awupe yadii? Ne biittay awee? Neeni oodde baggee?” yaagidi oychidosona.

⁹ Yoonasi zaaridi, “Taani Ibraawe asi; abbanne biitta medhida Godaa, salo Xoossa goyinniya asi” yaagis.

¹⁰ I entaw koyrottidi odidaysada I Godaa sinthafe beteysa eridosona. Hessa gisho, enti yayyidi, “La ayba palaba oothadi” yaagidosona.

¹¹ Abbaa hobbey kaseysafe haa darida gisho asati Yoonasa, “Nuus abbay si77i gaana mela nena nuuni waatino?” yaagidi oychidosona.

¹² Ika, “Ha wolqaama hobbey hinte bolla dendiday ta gaason gideysa taani erayis. Hessa gisho, tana ekidi abban yeggite. Yaatiko abbay hintew si77i gaana” yaagis.

¹³ Shin markabiya oosanchoti markabiya gaxa kessanaw gita pidhidosona. Shin abba hobbey haa darida gisho gaxa kessanaw danda7ibookona.

¹⁴ Hessa gisho, enti Godaako, “Abeeti Godaw, haa ura shempuwa gisho, neeni nuna dhaysonadanne ha geeshsha suutha acuwa neeni nuupe achonada nuuni nena minthidi woossoos” yaagidi Godaa woossidosona.

¹⁵ Hessafe guye, Yoonasa denthidi, abban yeggidosona. Abbaa hobbayka si77i gis.

¹⁶ Yaatin asati Godaas daro yayyidi yarsho yarshidosona; iyaw qangidosona.

¹⁷ Yoonasa mittana mela issi gita molo Goday giigisis. Yoonasi he moluwa ulon heedzu gallasinne heedzu qamma gam7is.