Taybo 1 - Geeshsha Maxaafa

Koyro Isra7eele Asa Taybetetha

¹ Isra7eele asay Gibxe biittafe keyida nam7antho laythan, nam7antho ageenan, he ageena koyro gallasan, Goday Siina mela biittan Geeshsha Dunkaaniyan Museko haysada yaagis;

² “Neeranne Aaronara Isra7eele asa ubbaa enta kochan kochan, qassi enta soo asan asan taybadi, adde asaa sunthaa xaafite.

³ Laythi laatamanne iyape bolla gidida, oletanaw danda7iya Isra7eele asa ubbaa taybite.

⁴ Kochape kochape issi issi asi ba soo asaas halaqa gididi hintena maaddo.

⁵ Hintena maaddana asaa sunthay haysafe kaallidi xaafetidaysa. Robeelape, Shade7ura na7aa Elixura;

⁶ Simoonape Sursadaya na7a Salumi7eela;

⁷ Yihudape Amnadaabe na7aa Na7asoona;

⁸ Yisakoorape Zu7ara na7aa Natina7eela;

⁹ Zabloonape Heloona na7aa Eli7aaba;

¹⁰ Yoosefa naytape, Efreemape Amhuda na7aa Elishama7a; Minaasepe Padazuura na7aa Gamali7eela;

¹¹ Biniyaamepe Gadiyoona na7aa Abdaana;

¹² Daanape Amsadaya na7aa Aki7ezera;

¹³ Aseerape Okraana na7aa Pagi7eela;

¹⁴ Gaadape Ragu7eela na7aa Elyaasafa;

¹⁵ Niftaalemepe Enaana na7a Akira;

¹⁶ Ha asay banta aawata keethaa asaape kaalethanaw dooretida Isra7eele yarata halaqata” yaagis.

¹⁷ Yaatin Museynne Aaroni he dooretida asata ekidi,

¹⁸ nam7antho ageenan koyro gallasan kumetha maabara xeegidi shiishidosona. Asay banta kochan kochan, qassi banta soo asan asan laatamu laythinne iyape bolla gidida adde ubbay xaafetis.

¹⁹ Goday iya Kiittidaysada Musey enta Siina mela biittan taybis.

^20-21 Oletanaw danda7iya adde ubbay, laatamu laythinne iyape bolla gidida adde ubbay taybetidi huuphen huuphen xaafetidosona. Enti banta kochan kochaaninne banta soo asan shaaketidi haysafe kaallidi de7iya taybo maaran mazgabetidosona. Bayra na7aa Robeelape 46,500

^22-23 Simoonape 59,300

^24-25 Gaadape 45,650

^26-27 Yihudape 74,600

^28-29 Yisakoorape 54,400

^30-31 Zabloonape 57,400

^32-33 Yoosefa na7aa Efreemape 40,500

^34-35 Yoosefa na7aa Minaasepe 32,200

^36-37 Biniyaamepe 35,400

^38-39 Daanepe 62,700

^40-41 Aseerape 41,500

^42-43 Niftaalemepe 53,400

⁴⁴ Musey, Aaroninne banta soo asaape asaape dooretida tammanne nam7u Isra7eele kochaa halaqati taybida asay haysata.

⁴⁵ Oletanaw danda7iya adde ubbay, laatamu laythinne iyape bolla gidida asay banta soo asan asan taybetidosona.

⁴⁶ Kumetha asaa tayboy 603,550.

⁴⁷ Shin Leewe kochati taybetibookona.

⁴⁸ Gaasoyka kase Goday Museko haysada yaagis;

⁴⁹ “Leewe kochata taybopa; enta attida Isra7eele asaa taybon gelsofa.

⁵⁰ Leeweta, Geeshsha Dunkaaniyaninne iyan de7iya miisheta ubbaa bolla halaqa oothada shuuma. Enti Dunkaaniyanne iyan de7iya miisheta tookana; iya giddon oothananne iya yuushon dunkaanana.

⁵¹ Geeshsha Dunkaaney shodetiya wode Leeweti shoddo; Geeshsha Dunkaaney eqiya wode Leeweti esso; entafe hari oonika iyako shiiqiko hayqo.

⁵² Hanko Isra7eele asay banta heeraninne banta cugan cugan shaaketidi, banta dunkaaniya dunkaanona.

⁵³ Shin Godaa hanqoy Isra7eele maabara bolla wodhonna mela Leeweti Dunkaaniya yuushuwan banta dunkaaniya dunkaanidi naago” yaagis.

⁵⁴ Isra7eele asay Goday Muse kiitida ubbaa oothidosona.