Solomone 7 - Geeshsha Maxaafa

Panthaa

¹ Kawo na7ada lo77iyare, Laxana caamma aathida ne tohoti waani lo77i! Ne sheechey hiillanchoy qoxidi, alleeqisida al7o shuchu daanees.

² Ne gul7ay woyney kumida birille daanees; ne xeessa yuushoy ciishshan qashetida giste mirqe daanees.

³ Ne dhanthati mente yeletida, gen7e mari daanosona.

⁴ Ne qoodhey dangarsa zaalen alleeqetida adussa shako mela. Ne ayfey gita Haseboona katama pengiya matan, de7iya zeero haatha daanees. Ne siidhey Damasqoko zaaridi gimbida, Libaanose gimbiya daanees.

⁵ Ne huuphey Qarmeloosa zuma daanees; ne binaanay qacina xaathi daanees; ne huuphiya dathay kawa ufaysees.

⁶ Ta siiqe, ne waanna lo77ay! Ne waanida yegelsse! Ne siiqoy tana waani ufaysi!

⁷ Ne geesay zamba daanees; ne dhanthay zamba mor77e daanees.

⁸ Taani, “Zamba bolla keyana; iya ayfiya maxana” yaagas. Ne dhanthay woyne mor7e mela; ne siidhiyara keya peenoy apileda sawees.

⁹ Ne doonape keyiya peenoy lo77o woyne mela. Hiza lo77iya woyne ushshay, ne siiqe mettershafenne achafe giddora, lepi gidi goggo.

Geela7iw

¹⁰ Taani ta siiquwaba; ika tana amottees.

¹¹ Ta siiquwaw, haaya; katamaape keyidi gaxare boos; nam7ay qamma yan aathana.

¹² Wonta guura woyne atakiltiya giddo boos; woyney ciiyidaako, ayfe aathidako, oromaaney ayfidaako ane be7oos. Taani ta siiquwa nena yan bessaana.

¹³ Inkoye ayfe sawoynne dumma dumma ufaysiya atakilte ayfey nu karen kumis. Ta siiquwaw! Ha ayfetape teeridaysanne oorathi maxidaysa new wothas.