Solomone 3 - Geeshsha Maxaafa

Geela7iw

¹ Qamma kumethi hiixan zin7ada, ta siiquwa demmanaw amottas; minthada koyas; shin demmabike.

² Katamaa giddon de7iya dalganne xuntha ogeta ubban yuuyas. Ta siiquwa demmanaw koyas; minthada koyas; shin demmanaw danda7abike.

³ Katamaa yuuyidi naageysati tana demmidosona; taani, “Ta siiquwa be7idetii?” yaagada oychas.

⁴ Enta aggada aadhida mela ta siiquwa demmas; I taape kessi ekonnaada minthada oykas. Ta aaye soo efas; ta yeletida kifiliya gelsas.

⁵ Hinteno Yerusalaame macca nayto, siiqoy baw dosidi dendana gakanaw, iya hinte barkisonna mela taani hintena gen7eninne woshi7en ammatayis.

Yerusalaame Geela7ota

⁶ Zal7ancho ixaanedanne karbeda sawiyara, cuya tuussu daaniyara, hanna mela biittafe yaara iya oonee?

⁷ Heko, Solomone para gaariya yawusu; he para gaariw Isra7eelepe dooretida, usupun tammu wolqaama tooranchoti ajabidosona.

⁸ Enti ubbay mashsha oythan meezetidosona; olanka paacetidosona. Qamma gakiya metuwa teqanaw, enti mashshe dancidi giigidosona.

⁹ Kawa Solomoney para gaare giddon, baw uttiya araata giigisis; iya araatay Libaanosepe yida mithan oosetis.

¹⁰ Araata tuussay biran lanxetis; zempoy worqan alleeqetis. Oydey ocha teera daaniya qacinan kametis; gaathay Yerusalaame geela7ota siiqon alleeqetis.

Geela7iw

¹¹ Hinteno, Xiyoone geela7oto, kawa Solomone be7anaw haayite. I daro ufaytida iya yaaganuwa gallas iya aayiya iya huuphen wothida kallacha wothis.