Mazmure 71 - Geeshsha Maxaafa

Taani Daaburiya Wode Tana Aggofa

¹ Godaw, taani neeko baqatada attiya gisho, awudeka tana yeellayopa.

² Ne xillotethan tana naaga; ne haytha taako zaara; tana ashsha.

³ Neeni ta ubba wode geemmada attiya zaalla taani geemmada attana mela mino miixaa gida; ee, neeni ta zaallanne ta miixa.

⁴ Ta Xoossaw, iitata kushepenne, qadhey bayna asatape tana ashsha.

⁵ Abeeti Godaw, ta na7atethafe doomada, neeni ta ufaysaanne ta ammanetetha.

⁶ Ta yeletida wodepe doomada nenan zempas; ta aaye ulope tana kessiday nena; taani ubba wode nena galatana.

⁷ Neeni ta qosetada attiya bessi gidida gisho, ta de7oy daro asaas leemiso gidis.

⁸ Gallasa ubban ta doonay ne galataninne ne bonchuwan kumis.

⁹ Taani cimida wode tana yeggofa; ta wolqay ixida wode tana aggofa.

¹⁰ Ta morketi ta bolla tobboosona; Tana wodhanaw koyeysati ta bolla maqetoosona.

¹¹ Enti, “Xoossay iya aggis; yedethidi oykoos; iya ashshanay oonika baawa” yaagosona.

¹² Xoossaw, taape haakofa ta Xoossaw, tana maaddanaw ellesa.

¹³ Tana mooteysati yeellatidi dhayo; Tana qohanaw koyeysati, yeellanne kawushe ma7o.

¹⁴ Shin taani ubba wode ufaysan nena naagana; zaara zaaradaka nena galatana.

¹⁵ Ne oothidaba ta taybanaw xoonetikoka, ta doonay gallas ubban ne xillotethaanne ne atotethaaba odana.

¹⁶ Taani Ubbaa Haariya Godaa wolqan yada; ne xalaala xillo gideysa awaajana.

¹⁷ Xoossaw, neeni ta na7atethafe doomada tana tamaarsadasa; ha77ika ne malaalsiya oosuwa ta odana.

¹⁸ Xoossaw ne wolqaanne ne minotethan yaa yeleta ubbaas odana gakanaw, taani cimada puulumikoka tana aggofa.

¹⁹ Xoossaw, ne xillotethay salo gakis; gitaba oothida Xoossi, ne meli oonee?

²⁰ Neeni ta bolla daro meto ehadasa; gidoshin ta de7uwa zaarada ooraxisadasa; neeni tana biitta garsafe kessadasa.

²¹ Neeni ta bonchuwa darsadasa; tana zaarada minthethadasa.

²² Ta Xoossaw, ne tumatethaa gisho, ta nena diithan galatana. Abeeti Isra7eele geeshshaw, ta nena maasinqon sabbana.

²³ Ta mettershay ufaysan dhoqu oothidi yexees; neeni tana ashshida gisho taani nena sabbana.

²⁴ Tana qohanaw koyeysati yeellatida gishonne kawuyida gisho ta inxarsay ne xillo maaduwaba gallas ubban odana.