Mazmure 44 - Geeshsha Maxaafa

Nuna Maaddanaw Ellesa

Akeekan xaafida ginxo

¹ Xoossaw, beni wode ne oothidaba nu si7ida; nu aawata wode ne oothidaba nuus odidosona.

² Kawotethata ne kushen goodda kessadasa; nu aawata enta biittan tokadasa. Hara kawotethata seeradasa; shin nu aawata aakisadasa.

³ Enti banta mashshan olidi he biitta laatibookona; enti banta minotethan xoonibookona. Shin neeni enta dosida gisho, enta ne ushacha kushey, ne qeseynne ne som7uwa poo77oy xoonisis.

⁴ Yayqooba kochaas xoono kiittiya, ta kawoynne ta Xoossay nena.

⁵ Nenan gididi nu morketa xoonana; ne sunthan nuna ixeyisata yedhana.

⁶ Taani ta tooran ammanetike; ta mashshay tana ashshena.

⁷ Shin ne nuna nu morketape ashshaasa; nuna ixeyisata neeni kawushaasa.

⁸ Nuuni ubba wode Xoossan ceeqetana; ne sunthaa merinaw galatana. Salaha.

⁹ Shin ha77i nuna aggadasa; kawushadasa; nu olanchotara issife olas keyaka.

¹⁰ Nu morketa sinthafe nuna baqatisadasa; nu ixeysati nuna bonqidosona.

¹¹ Nuna dorsada shuhas aatha immadasa; kawotethata giddon nuna laalladasa.

¹² Neeni ne asaa laafa gaten bayzadasa; ay wodheka demmabaaka.

¹³ Nu shooroti nuna boranaada oothadasa; nu heeran de7eysati nuna qilqisanaadanne nu bolla miicanaada oothadasa.

¹⁴ Nuna kawotethata giddon hayses aggadasa; enti banta huuphiya nu bolla qaathana mela oothadasa.

¹⁵ Gallas kumethi taani tooshetas; ta som7uwa yeelli kammis.

¹⁶ Hessi haniday tana cayeysatanne boreyisata gaasoninne, ta morketanne tana mandeyisata gaasona.

¹⁷ Nuuni nena dogonna de7ishin, ne caaquwa menthonna de7ishin, ha ubbay nuna gakis.

¹⁸ Nu wozanay nena aggibeenna; nu tohoy ne ogiyape kare keybeenna.

¹⁹ Shin neeni nuna mentherethada do7a ollan yeggadasa; sakana dhuman kammadasa.

²⁰ Nu, Xoossaa sunthaa dogidaba gidiyako, hara xoossatako nu kushiya miccidaba gidiyako,

²¹ Wozana xuuraa Xoossay eriya gisho, I haysa xeellidi demmennee?

²² Gidoshin, ne gisho ubba gallas hayqoos; shukanaw efiya dorsada taybetida.

²³ Godaw, denda, Ayis dhiskay? Denda, merinaw nuna aggofa.

²⁴ Ne som7uwa nuupe ayis genthay? Nu qohuwanne nu un7aa ayis dogay?

²⁵ Nuuni baanan yegetida; nu asatethay biittara oyketis.

²⁶ Godaw, denda, nuna maadda; ne siiquwa gisho gada nuna woza.