Mazmure 147 - Geeshsha Maxaafa

Xoossay Meqida Wozana Koolees

¹ Godaa galatite! Nu Xoossaa saboy lo77o; iya saboy ufaysiyabaanne bessiyaba.

² Goday Yerusalaame oorathana; Isra7eelepe di7etidaysata shiishana.

³ Wozani meqidaysata koolees; enta madunthaa pathees.

⁴ I xoolintota taybuwa erees; enta ubbaa enta sunthan sunthan xeegees.

⁵ Nu Goday gita; I wolqaama; iya akeekas zawi baawa.

⁶ Goday aadata zempisees; shin iitata sa7an yeggees.

⁷ Godaas galata yethi yexite; nu Xoossaas diithan yexite.

⁸ I saluwa shaara mayzees; biittas ira immees; zumata bolla maata dolisees.

⁹ Mehetas kathi, Koshatidi waassiya quuro naytas miyaba immees.

¹⁰ I parata wolqaninne tooranchota minotethan ufaytenna.

¹¹ Shin Goday baw yayyeysataninne iya maarotan ammaneteysatan ufaytees.

¹² Yerusalaame, Godaa galata! Xiyoone, ne Xoossaa galata!

¹³ I ne pengiya kobeta minthana; ne giddon de7iya ne asaa anjana.

¹⁴ I ne zawa sarotethan naagana; nena lo77o gisten kalsana.

¹⁵ I ba kiitaa biittas yeddees; iya qaalay eeson gakees.

¹⁶ I shachi bullukoda miccees; caagana bidoda laallees.

¹⁷ I shacha shuchada holees; iya meeguwan oonika eqanaw danda7enna.

¹⁸ I ba qaala kiittidi shacha maaysees. I carkuwa kiittin haathi goggees.

¹⁹ I ba qaala Yayqoobas, ba higgiyanne wogaa Isra7eeles awaajees.

²⁰ I hara kawotethatas hessa oothibeenna; enti iya higgiya erokona. Godaa galatite!