Mazmure 145 - Geeshsha Maxaafa

Xoossay Gita

Dawita Galata Mazmure

¹ Ta Xoossaw, ta kawaw, ta nena gitayana; ne sunthaa merinaw galatana.

² Taani nena ubba gallas sabbana; ne sunthaa merinaw galatana.

³ Goday gita; aadho galati iyaw bessees; iya gitatethay asa qofape aadhees.

⁴ Issi yeletay hara yeletas ne oosuwa odana; ne malaalsiya oosota awaajana.

⁵ Enti ne bonchuwa, ne teemaanne ne gitatetha odana. Taani ne malaalsiya oosuwa zaara zaarada qopana.

⁶ Malaalisiya gita ne oosuwaba odana; taani ne gitatetha awaajana.

⁷ Enti ne keehatetha darotethaa odana; ne xillotethabaa ufaysan yexana.

⁸ Goday keehanne qadheteysa; hanqetanaw ellesenna; siiqon kumidaysa.

⁹ Goday ubbaas keeha; I ba medhetetha ubbaas qadhetees.

¹⁰ Godaw, medhetetha ubbay nena galatana; ne asa ubbay nena sabbana.

¹¹ Enti ne kawotethaa bonchuwaba odana; ne wolqaaba odana.

¹² Hessan enti ne wolqaama oosuwabaanne ne kawotethaa boncho teemaba erisana.

¹³ Ne kawotethay merina kawotethi; ne maatay yeleta ubbaa haarees. Goday ba gida qaala ubban ammanetees; ba ooso ubban keeha.

¹⁴ Goday kundanaw gedgadeyisata katisees; kundidaysata denthees.

¹⁵ Ubbaa ayfey nena xeellees; entaw koshshiya woden kathi immaasa.

¹⁶ Neeni ne kushiya miccada, medhetetha ubbaa amo alaasa.

¹⁷ Xoossay ba oge ubban xillo; ba ooso ubban keeha.

¹⁸ Goday bana xeegiya ubbaas, tuman bana xeegiya ubbaas matan de7ees.

¹⁹ I baw yayyeyisata amuwa kunthees; enta waasuwa si7idi ashshees.

²⁰ Goday bana doseyisata ubbaa naagees; shin iitata ubbaa dhaysana.

²¹ Taani ta doonan Godaa galatana; Medhetetha ubbay iya geeshsha sunthaa merinaw galato!